Bideni s’është i sigurt që pushteti në ShBA do të ndërrohet paqësisht, nëse Trumpi humb
Presidenti i Shteteve të Bashkuara, Joe Biden, ka thënë se nuk është i sigurt që do të ndodhë ndërrim paqësor i pushtetit pas zgjedhjeve presidenciale të nëntorit atje.
“Nëse Trumpi fiton, jo, nuk jam i sigurt fare. Dua të them, nëse Trumpi humb, nuk jam i sigurt fare” – tha kreu i Shtëpisë së Bardhë në një intervistë për televizionin CBS, që pritet të transmetohet e plotë këtë të diel, raporton gazeta “The Guardian”.
Kjo është intervista e parë e presidentit amerikan që nga tërheqja e tij nga fushata zgjedhore muajin e kaluar dhe ofrimi i mbështetjes për nënpresidenten Kamala Harris për ta zëvendësuar atë si e nominuar e Partisë Demokratike për president.
Për Trumpin, Bideni shtoi: “Ai e ka njëmend atë që e thotë, ne nuk e marrim atë seriozisht. Ai e ka njëmend, tërë kjo gjë për atë se “nëse ne humbim, do të ketë gjakderdhje… [dhe] “zgjedhje të vjedhura”, nuk mund ta duash vendin tënd vetëm kur fiton.”
Televizioni CBS publikoi një pjesë të intervistës në rrjetin X.
In his first TV interview since exiting the 2024 race, President Biden tells CBS News' @costareports he's "not confident at all" that a peaceful transfer of power will happen in January 2025 if former President Donald Trump loses.
— CBS Sunday Morning 🌞 (@CBSSunday) August 7, 2024
"He means what he says. We don't take him… pic.twitter.com/uE4dj5Vzrs
Në mars të këtij viti, i nominuari i Partisë Republikane për president dhe ish-presidenti Donald Trump kishte thënë: “Tani, nëse unë nuk zgjidhem, do të jetë një gjakderdhje. Kjo do të jetë më e pakta e kësaj. Do të jetë një gjakderdhje për vendin.”
Para se të tërhiqej nga gara, Bideni ishte përqendruar shumë në fushatë te paraqitja e Trumpit si kërcënim ndaj demokracisë amerikane.
