BE-ja do të sanksionojë nëntë persona për dhunën në Kongo, thonë diplomatët

Bashkimi Evropian pritet të sanksionojë nëntë individë në lidhje me dhunën në Republikën Demokratike të Kongos, thanë të premten dy diplomat të BE-së.

Ata nuk i identifikuan personat që do të futen në listën e sanksioneve, duke e respektuar praktikën e moszbulimit të hollësive të tilla para se sanksionet të miratohen zyrtarisht. Ministrat e jashtëm të vendeve të BE-së pritet t’i miratojnë sanksionet në Bruksel të hënën e ardhshme, raporton agjencia e lajmeve “Reuters”.

Rebelët e grupit M23 i kanë kapur dy qytetet më të mëdha të pjesës lindore të Kongos nga janari në një eskalim të një konflikti të gjatë.

Kongoja tani për tani është duke e shqyrtuar mundësinë për të dërguar përfaqësues në bisedimet e paqes me grupin M23, të cilat Angola planifikon t’i organizojë javën e ardhshme, thanë të enjten burimet qeveritare.

Ruanda akuzohet se po i mbështet rebelët e grupit M23, të cilët udhëhiqen nga anëtarët e komunitetit Tutsi. Sidoqoftë, fqinji i Kongos e ka mohuar akuzën.