Arabia Saudite ekzekuton gjashtë iranianë, reagon Teherani
Arabia Saudite ka ekzekutuar gjashtë iranianë të dënuar për trafikim droge, raportoi të mërkurën agjencia shtetërore e lajmeve, SPA.
Ky veprim e nxiti Iranin që ta thërriste në takim ambasadorin saudit në Teheran, raporton agjencia e lajmeve “Reuters”.
Ministria e Punëve të Brendshme e Arabisë Saudite tha se gjashtë shtetasit iranianë ishin arrestuar dhe ishin akuzuar për trafikim të hashashit në territorin e saj, sipas agjencisë SPA, dhe më pas u ishte shqiptuar dënimi me vdekje.
Në deklaratë nuk u tregua se kur është bërë ekzekutimi i të dënuarve me vdekje.
Si kundërpërgjigje, Irani e thirri në takim ambasadorin saudit në Teheran për të “protestuar fuqishëm” për ekzekutimin e gjashtë shtetasve të tij, raportuan mediat iraniane.
“Një notë e protestës së fortë nga Irani, që e vë në pah papajtueshmërinë e këtij veprimi me bashkëpunimin e përgjithshëm në gjyqësor mes dy vendeve, iu përçua atij. Nevoja e ofrimit të shpjegimit të duhur për këtë çështje u theksua” – raportuan mediat iraniane.
Sipas një marrëveshjeje të ndërmjetësuar nga Kina më 2023, Teherani dhe Riadi i rivendosën marrëdhëniet pas disa viteve armiqësi, që i kishin kërcënuar stabilitetin dhe sigurinë në Gjirin Persik dhe që e kishin ndihmuar nxitjen e konflikteve në Lindjen e Mesme, nga Jemeni në Siri.
