Vrasja e dyfishtë në Malishevë, arrestohet i dyshuari

Prokuroria Themelore në Gjakovë ka njoftuar se është arrestuar i dyshuari për vrasjen e dyfishët dje në fshatin Gollubovc të Komunës së Malishevës.

Përmes një komunikate për media, prokuroria ka treguar se bëhet fjalë për A.I., i cili nga dita e djeshme është në kërkim të organeve të rendit.

Më tej, është bërë me dije se shumë shpejt ndaj të dyshuarit do të paraqitet kërkesa për caktimin e masës së paraburgimit.

“Lidhur me rastin, Policia e Kosovës, në koordinim të plotë me Prokurorin e Shtetit, është duke ndërmarrë të gjitha veprimet e nevojshme. Brenda afatit të paraparë ligjor, ndaj të dyshuarit A.I., do të paraqitet kërkesa për caktimin e masës së paraburgimit në Gjykatën kompetente”, është thënë në njoftimin e prokurorisë.

Pas arrestimit, Policia e Kosovës ka dhënë detaje të reja për rastin.

Përmes një njoftimi për media, policia ka treguar se i dyshuari ishte i plagosur.

“Sot, më datë 07.11.2025, rreth orës 06:25, në fshatin Pllaqicë, është arritur të arrestohet personi i dyshuar A. I. (1983), mashkull kosovar. Pas arrestimit, të dyshuarit i është ofruar trajtim mjekësor, pasi i njëjti ka pasur plagë që dyshohet të jetë shkaktuar nga arma e zjarrit. Ai është dërguar për trajtim të vazhduar mjekësor. Hetimet lidhur me rastin janë në zhvillim e sipër dhe po udhëhiqen në koordinim të plotë me Prokurorin e Shtetit”, është thënë në njoftim.

Ndër të tjera, në njoftim është thënë se në vendin e ngjarjes janë gjetur edhe dy armë zjarri.

Sipas njoftimit të policisë, të dy armët dyshohet të jenë përdorur në këtë rast.

“Dje më datë 06.11.2025, rreth orës 11:30, jemi njoftuar për rastin vrasje në fshatin Gollubovc të Malishevës ku viktimat e rastit ishin dy persona të gjinisë mashkullore, të moshës madhore (vëllezër). Njësitë e nevojshme policore kanë dalë menjëherë në vendin e ngjarjes dhe, gjatë ekzaminimit, janë gjetur dhe sekuestruar dy armë zjarri që dyshohet të jenë përdorur në këtë rast. Në koordinim me Prokurorin e Shtetit, janë ndërmarrë të gjitha veprimet e nevojshme hetimore për ndriçimin e plotë të rastit dhe identifikimin e të dyshuarit”, ka njoftuar policia, duke treguar detaje tjera.

Çka ndodhi?

Vrasje e djeshme në Malishevë ka tronditur Kosovën.

Dy vëllezër të moshës madhore janë vrarë me armë zjarri në afërsi të shtëpisë së tyre.

Ajo që dihet deri me tani është së i dyshuari kryesor është dhëndri i dy viktimave.

Gjatë ditës së djeshme për rastin janë deklaruar edhe organe e rendit dhe të drejtësisë.

Kryeprokurori i Prokurorisë Themelore në Gjakovë, Enis Gashi, ka treguar për masat që janë ndërmarr për kapjen e të dyshuarit.

Megjithatë, ai nuk ka dhënë shumë detaje për lidhjet familjare në mes të viktimave dhe të dyshuarit.

“Tani për tani nuk mund të japim këto informata, sepse duhet të bëhet verifikimi i këtyre informatave pastaj të dalim me një njoftim zyrtar, me qëllim që të jenë informatat më ta sakta.”, ka thënë ai, duke treguar se viktimat dhe i dyshuari kanë lidhje familjare.

Prokurori Gashi ka thënë se ende është herët të flitet për motivet e kësaj vrasje.

“Në mes vete kanë raporte familjare, por motivi ende nuk e dimë saktësisht. Kështu që, pasi t`i marrin të dhënat tjera më të sakta, atëherë do të dalim me një komunat zyrtare”, ka thënë Gashi.

Kurse, pas ndodhjes së rastit, zëdhënës i policisë për rajonin e Gjakovës, Sheremet Elezi, ka thënë për Nacionalen se motivi i kësaj vrasje të dyfishtë dyshohet të jetë një fjalosje paraprake.

Ai ka treguar se motivi i kësaj vrasje të dyfishtë dyshohet të jetë një fjalosje paraprake.

“Është një vrasje e dyfishtë, viktimat janë dy vëllezër. I dyshuari është dhëndër i tyre. I njohur për Policinë, nga një fshat në Drenas, për momentin është në kërkim. Arma është gjetur në vendin e ngjarjes. Motivi dyshohet për një fjalosje mes tyre”, ka thënë Graishta.

Të afërmit e viktimave kanë treguar se të dy vëllezërit kishin ardhur nga mërgimi për të marrë pjesë në varrimin e babait të tyre.

Sipas tij, vrasja ka ndodhur në hyrje të oborrit derisa vinin ende njerëz për ngushëllime.

“E pamja ishte kryer para tre ditësh, por ende vinin njerëz për me ngushëllu. Ai erdhi për me e marrë gruan, u kthye dhe i vrau në prag të shtëpisë. Kjo ta këputë shpirt. Edhe babën para pak ditësh e kemi pas varrosë,” ka thënë një i afërm i familjes për portalin “Sinjalin”.