Dëshmitari 5 vazhdon dëshminë në Gjykatën Speciale: Çfarë deklaroi deri më tash?
Dëshmitari 5 në Dhomat e Specializuara të Hagës, po e vazhdon dëshminë e tij në seancë të mbyllur.
Përveç masave strikte mbrojtëse, pjesa më e madhe e dëshmisë së tij ka qenë e mbyllur. E në ato minuta sa ishte e hapur, dëshmitari ka bërë të ditur se ka qenë pjesë e UÇK-së.
Dëshmitari gjithashtu ka pretenduar se disa pjesëtarë të UÇK-së me maska, ia kishin kidnapuar disa anëtarë të familjes.
Ai gjatë përgjigjeve që ia dha fillimisht prokurorisë, deklaroi se disa anëtarë të UÇK-së me maska të zeza, ia kishin kidnapuar disa familjarë. Dëshmitari tha se i kishte ndjekur këta persona me armë.
“Po. Këta kanë pasur uniforma të zeza me emblemat e UÇK-së. Edhe maska të zeza në fytyrë. Pasi e kam marrë kerrin, e kam marrë edhe armën edhe i kam hyp kerrit që i kanë marrë të afërmit e mi me maska. Me dalje të fshatit i kanë zbrit dy të afërmit e mi nga makina, edhe babën e kishin lanë mrena në makinë”, deklaroi dëshmitari, raporton gazeta Nacionale.
Dëshmitari më u pas u ballafaqua me pyetjet e mbrojtjes së Hashim Thaçit. Njëri nga avokatët e pyeti dëshmitarin nëse ka pasur ndonjë dokument apo dëshmi, që e vërteton se ai ishte pjesë e UÇK-së.
Nacionale sjell një pjesë të dëshmisë së sotme:
Avokati: Kjo ka lidhje me ditën konkrete ku personi numër 1 u kidnapua. Të jemi të qartë do të flasim edhe më vonë. Ne nuk po e vëmë në dyshim se kanë ardhur burra të maskuar kanë hyrë në fshat dhe e kanë kidnapuar personin në fjalë. Duam të dijmë çfarë dëshmie ke dhënë ti për këtë ngjarje. Kishin maska të plota komplet fytyrën?
Dëshmitari: Po.
Avokati: Pra kishin marrë masa ekstreme që të mos i njihnit?
Dëshmitari: Sigurisht.
Avokati: Edhe pse ishte pak metra larg tyre, më duket se e kape një prej tyre ti nuk e identifikoeve se maskat ishin të plota?
Dëshmitari: Nuk dëgjohet.
Avokati: The se kishin uniforma të zeza. Dua të jem i qartë. Uniformat ishin thjesht tesha të zeza?
Dëshmitari: Nuk dëgjohet.
Avokati: Ishin identike apo thjesht tesha të zeza?
Dëshmitari: Çka kam parë unë kanë qenë identike.
Avokati: Mund të bliheshin thjeshtë, se vetëm tesha të zeza ishin?
Dëshmitari: Nuk e di ku i kanë marrë.
Dëshmitari: Policia ushtarake mbante uniforma identike.
Avokati: Duke pasur parasysh faktin se ishin uniforma të zeza. Ti nuk mund të thuash se ata ishin individë të Policisë ushtarake.
Dëshmitari: I kam parë me tesha të zeza, me uniformë të UÇK-së e me maska. Nuk e di çfarë pozicioni kanë pasur.
Avokati: Në thelb e pranon se mund të kishte qenë kushdo me uniformë të zezë?
Dëshmitari: Nuk dëgjohet.
Avokati: Ti nuk e di me siguri pse këta burra donin të flisnin me personin 6?
Dëshmitari: E kanë kërkuar personin 6 edhe nuk e kanë lënë me dalë, edhe më andej nuk e di pse e kanë kërkuar dhe pse e kanë marrë numrin 1. Me zbutë situatën, ka thënë hajde shkojmë te unë edhe ua bi numrin 6, bisedojmë në odë. Çkado që kërkoni bisedojmë aty.
Avokati: Ti nuk ishte i pranishëm vetë fizikisht, pasi u bë ky muhabet. Dhe informacionet që more në këtë bisedë, të erdhën nga bisedat me bashkëfshatarët?
Dëshmitari: Nuk dëgjohet.
Avokati: Gjatë 20 viteve a ke biseduar me bashkëfshatarët rregullisht lidhur me këtë ngjarje?
Dëshmitari: Kena bisedu gjatë. Veç rreth vrasjeve kena bisedu. Qysh ka ndodhë rasti, qysh e kanë marrë. Për këto kena bisedu. Pas vrasjes kena diskutu, se para vrasjes nuk kena mujt.
Avokati: Nëse e pranon se nuk mund të thuash konkretisht se çfarë ka ndodhur atë ditë, sepse kanë kaluar 20 vjet. A e pranon që nuk e bëni një ndarje të qartë me atë që di ti, dhe atë që kanë treguar?
Dëshmitari: Nuk di si ta shpjegoj.
Avokati: Sa i takon kidnapimit, ti e di se burrat e maskuar që morën numrin 1 e morën nga fshati por nuk e di nëse janë të njëjtët persona përgjegjës për vrasjen e këtij personi.
Dëshmitari: Njerëzit me maska e kanë marë numrin 1, 2 dhe 3. 2 dhe 3 i kanë zbrit, dhe e kanë bërë vrasjen e personit 1.
Avokati: Ti nuk e di 100% se kjo që mori personin 1 janë të njëjtit që e kanë vrarë?
Dëshmitari: Nuk kam qenë prezentë. Kur jam shku e kam gjetur të vrarë, edhe letrën e kam gjetur aty.
Avokati: Por ti e di që këto kanë ndodhur, por nuk e di që burrat e maskuar ishin përgjegjës për të dyja këto gjëra?
Dëshmitari: Vetë nuk kam qenë prezentë, por përpos tyne nuk besoj që ka pasur të tjerë.
“E kam parë 1 dhe 2. Treshin nuk e kam parë. Po edhe ai u kanë mrena po nuk e kam pa. Me sytë e mi i kam parë 1 dhe 2 kah janë shkuar poshtë. Nuk më lanë ata me maska me u afru. Kerri ecke, ata mrapa kerrit, dhe ma drejtoj armën tha nuk ki nevojë me u afru më afër”, deklaroi dëshmitari më tutje.
Dëshmisë së këtij dëshmitari i parapriu një debat ndërmjet avokatëve dhe prokurorisë. Kjo pasi mbrojtja kërkoi që seancat të jenë publike, sepse deklaroi që janë të interesuar që e vërteta të dalë në shesh.
