Numri i të vdekurve nga dy tërmetet e fuqishme në Venezuelë ka shkuar në 3.535, thanë të hënën autoritetet, ndërsa gati 18 mijë njerëz mbeten të pastrehë më shumë se një javë pas katastrofës që i goditi kryeqytetin dhe zonat e afërta bregdetare.

Kryetari i Asamblesë Kombëtare, Jorge Rodriguez, tha se të dhënat më të reja zyrtare tregojnë se 16 mijë e 740 njerëz kanë pësuar lëndime e 18 mijë e 854 kanë mbetur pa strehë pas tërmeteve të 24 qershorit, me fuqi prej 7,2 dhe 7,5 shkallësh, raporton agjencia e lajmeve “Reuters”.

Numrat e rinj e nënvizojnë nivelin e katastrofës në Karakas dhe La Guaira, zona bregdetare që është goditur më së shumti, përderisa shtohen kritikat ndaj reagimit të Qeverisë.

Autoritetet thanë se të paktën 12 mijë e 800 njerëz ishin duke qëndruar në 80 strehimore në Karakas dhe La Guaira.

Kombet e Bashkuara thanë se po vazhdonin që t’i shtonin operacionet e ndihmave në bashkërendim me Qeverinë në Karakas.

Edhe kur kishte operuar me OJQ, e pastaj edhe me një lëvizje urbane, Kurti kishte pasur ide ‘kreative’ për nxënësit e studentët, një përzierje kjo mes programeve lleftiste dhe përvojave të disa universiteteve. Një shujtë (kifle) dhe një gotë qumësht ishte vizioni i tij sesi nxënësit barkngopur do të jepnin rezultate më të mira në mësimnxënie. Por, si kryeministër, lëmi i prodhimit vendor të qumështit ka njohur një teposhtëz të frikshme. Larg prej ndonjë politike të favorshme fiskale a protektive për prodhimin vendor, të dhënat statistikore flasin sesi Kosova nga viti-në-vit po përjeton rënie të prodhimit të qumështit, pakësim të fondit të bagëtive, si dhe rritje importesh.

6 korrik 2026 – Pasditën e së hënës ende ndjehej era e athët e qumështit në rrugën ‘Ukshin Hoti’ pranë Kompleksit ‘Ramiz Sadiku’.

Një kamion me cisternë uji dhe disa punëtorë po merreshin me pastrimin e asfaltit dhe trotuareve.

Disa orë më herët, dhjetëra fermerë nga mbarë vendi protestuan përballë Ministrisë së Bujqësisë duke derdhur revoltativisht qindra litra qumësht.

“Pa fermerë nuk ka të ardhme”

Sipas organizatorëve nga Shoqata e Fermerëve Kosovarë të Qumështit, shteti thuajse i ka vënë në zgrip të falimentimit prodhuesit vendorë të qumështit.

Me thirrjet kundër dobësimit të industrisë vendore, ata kërkuan që të rifillojë grumbullimi i qumështit katër ditë pas mbylljes së përkohshme të qumështores ‘Vita’ nga inspektorët e Agjencisë së Ushqimit dhe Veterinarisë (AUV).

Edhe para se Qeveria në detyrë e Albin Kurtit të hapte një front të ri lufte me ‘oligarkët’, prodhuesit e qumështit veçse ishin vënë me shpatulla për muri përballë uljes së çmimit të qumështit.

Në fundmajin e këtij viti, në shumë nga pikat e grumbullimit çmimi i qumështit pësoi ulje nga 48 centë në 27-30 cent për litër.

“Shitja e litrës së qumështit nën 30 cent është padrejtësi dhe shfrytëzim”

Tri javë përpara se Vetëvendosja në shkurt të 2021-s të fitonte 50.28 për qind të votave, Kurti në fushatë e kishte zënë në gojë për herë të fundit çështjen e çmimit të ulët të shitjes së litrit të qumështit.

“Shitja e litrës së qumështit nën 30 cent është padrejtësi dhe shfrytëzim”, pati thënë Kurti me rastin e një vizite të bërë në një fermë në fshatin Tërdec të Drenasit.

Asohere, Vetëvendosja i kishte bërë një mbulim të pazakontë kësaj vizite duke e trumpetuar edhe vizionin partiak për prodhuesit e qumështit.

Sipas afishimit të asaj kohe, Ministria e Bujqësisë do të ishte “në shërbim të atyre që njëmend punojnë e me djersë prodhojnë e hapin vende të reja pune, dhe jo më për mbështetësit e një partie apo tjetër siç jemi mësuar të shohim. Tregu do të sigurohet, kurse shitja e prodhimeve bujqësore nën çmimin e tregut do t’i takojë të kaluarës”.

Kifle dhe një gotë qumësht

Me kundërthënie e nota komike kishte kaluar edhe njëri nga ‘vizionet’ e Kurtit për ushqyerjen e nxënësve nëpër shkolla fillore.

Duke qenë se Vetëvendosja më 2013 për herë të parë e fitoi një komunë si Prishtina, kryeqytetit i ra për hise të provonte për së afërmi idenë që Kurti e kishte skicuar qysh në vitin 2006.

Shujta ditore dhe një gotë qumësht ishte programi që nisi ta vinte në zbatim ish-kryetari, Shpend Ahmeti, për shkollat fillore të Prishtinës.

Pas përfundimit të mandatit të tij, edhe programi i kifleve dhe qumështit u braktis dhe mbeti kujtim i largët.

‘Qeverisja’ e importeve gjatë viteve 2020-26

Tani kur pritet konsolidimi i institucioneve të reja dhe mandati i tretë për Albin Kurtin, të dhënat më të përditësuara japin një pamje të tjetërsojtë për bereqetin blegtoral të vendit.

Me një prodhim vendor të qumështit që vlerësohet prej 270 milionë litrash në vit, vendi prapëseprapë importon rreth 30-40 për qind për t’i plotësuar nevojat e përgjithshme për qumësht.

Nga 2020-a e vitet e mëpasme, importet kanë qenë papërjashtimisht të larta.

Sidoqoftë, ato kanë përjetuar një rrokaqiellëzim në sasi e vlera importi sidomos në dy vitet e fundit.

Të dhënat më të reja, me të cilat shërbehen edhe vetë institucionet shtetërore, nxjerrin në pah prirje interesante për sa i përket prodhimit të qumështit.

Sipas Raportit të Gjelbër 2025 – që është dokument themelor mbi sektorin e bujqësisë që nxirret nga Ministria e Bujqësisë, Pylltarisë dhe Zhvillimit Rural – fondi i përgjithshëm i gjedheve ka pësuar rënie të ndjeshme nga viti i pandemisë e këndej.

Pakësimi i fondit të lopëve qumështore

Më 2024, fondi i përgjithshëm i gjedheve ishte 240,848 krerë duke shënuar një rënie prej 2.7 për qind në krahasim me vitin paraprak.

Kështu, më 2023, vendi kishte pasur 247,493 gjedhe, kurse më 2022 250,899; më 2021 260,528 dhe më 2020 261,391.

Nga ky fond, lopët qumështore në vitin 2024, njësoj si edhe më 2023, përbënin 52.5 për qind të numrit të përgjithshëm të gjedheve.

Sipas këtyre të dhënave, më 2024 vendi kishte 126,549 lopë qumështore; më 2023 kishte 129,897; më 2022 130,493; më 2021 132,076, dhe më 2020 133,916.

Të varur, gjithnjë më të varur nga jashtë

Dorëpërdore me zvogëlimin e fondit të gjedheve dhe lopëve qumështore, edhe dy procese komplementare janë përbiruar gjatë këtyre viteve.

Më 2024, Kosova prodhoi 268,980 milionë litra qumësht, shifër kjo që ishte me rënie të shënueshme nga 2023-a kur ishin prodhuar 275,447 milionë litra qumësht.

Pak më shumë qe prodhuar më 2022 me 276,058 milionë litra; më 2021 u shënuan 278,746 milionë litra, kurse më 2020 ishin prodhuar 281,960 milionë litra.

Në anën tjetër, importi i qumështit ka kërcyer nga viti në vit, gjithnjë me prirje rritëse.

Më 2020, vendi importoi 109,976 milionë litra qumësht; më 2021 121,863 milionë litra; më 2022 128,714 milionë litra; më 2023 133,579 milionë litra, dhe më 2024 139,864 milionë litra.

Me një kërkesë të brendshme prej 406,690 milionë litra qumësht në vit, Kosova çaloi me prodhim vendor ngase shkalla e vetëmjaftueshmërisë qe vetëm 66,1 për qind.

Dikur dhe tash

Shifrat e viteve të fundit kontrastojnë thekshëm me ato të para më shumë se një dekade.

Fjala vjen, nga 2010 deri më 2013 prodhimi i qumështit ishte larg më i madh sesa që është gjatë këtyre viteve.

Në këtë hark kohor, Kosova prodhoi qumësht 340 deri në 370 milionë litra qumësht në vit.

Ky trend pozitiv vazhdoi edhe më 2014 më 279 milionë litra në vit; 2015 me 283 milionë litra në vit.

Më së keqi në kojshillëk

Se Kosova i ka keq punët për nga prodhimi vendor i qumështit, mjafton edhe një përqasje me rrethepërqarkun.

Shteti amë, Shqipëria, paraqitet mjaft mirë në rajon kur vjen puna për prodhim të qumështit.

Nëse do të veçohej 2024-a si vit krahasues, Shqipëria me një fond prej 260 mijë krerë lopë qumështore prodhoi 877 milionë litra qumësht me një shkallë vetëmjaftueshmërie prej 80-85 për qind të plotësimit të kërkesave vendore.

Më mirë se Kosova del edhe Maqedonia e Veriut e cila, me një fond prej 90 mijë lopësh qumështore, prodhoi më 2024 323 milionë litra qumësht me një shkallë vetëmjaftueshmërie prej 70-80 për qind të plotësimit të kërkesave vendore.

Në një pamje më të zgjeruar, kampione në prodhim të qumështit mbetet Serbia e deri-diku edhe Bosnja.

Më 2024, fqinji verior prodhoi 1.6 deri në 1.7 miliardë litra me një fond lopësh qumështore të vlerësuar mes 250-300 mijë krerë.

Shifra të tilla përkthehen me një përmbushje thuajse të plotë të kërkesave të brendshme dhe eksporte të larta.

Në anën tjetër, Bosnja, po për vitin e njejtë, me një fond prej 160 mijë lopësh qumështore prodhoi 400-450 milionë litra qumësht me një shkallë vetëmjafueshmërie të nevojave të brendshme për 70-80 për qind.

Lufta na shkatërroi

Për shkak të sfondit historik me luftën e vitit 1998-99, më shumë se gjysma e bagëtive në Kosovë u asgjësuan ose u vodhën nga ushtria, milicia dhe forcat e parregullta serbe teksa rreth 40 për qind e infrastrukturës blegtorale u shkatërrua

Sidoqoftë, fill pas luftës, fusha e blegtorisë, më saktë prodhimi qumështor, arriti të ngjallej e të përjetonte edhe rritje.

Së paku deri më 2014, ai kontribuonte rreth 10 për qind në GDP. /Nacionale/

Ndeshja e së hënës mbrëma mes Shteteve të Bashkuara dhe Belgjikës në Kupën e Botës ka shkaktuar debat politik e sportiv, pasi presidenti amerikan Donald Trump pranoi publikisht se kishte telefonuar presidentin e FIFA-s, Gianni Infantino, për të kërkuar rishikimin e kartonit të kuq të sulmuesit amerikan Folarin Balogun.

Balogun, golashënuesi kryesor i ekipit amerikan, ishte ndëshkuar direkt me karton të kuq në fitoren e ShBA-së ndaj Bosnje-Hercegovinës në fazën e 1/16-ave. Vendimi fillestar do ta linte atë jashtë përballjes eliminuese ndaj Belgjikës. Por Komisioni i Pavarur Disiplinor i FIFA-s vendosi ta pezullojë zbatimin e dënimit për një vit, duke i hapur rrugë aktivizimit të tij në sfidën për një vend në çerekfinale.

Trump tha në Zyrën Ovale se kishte parë episodin dhe, si “dashamirës i sportit”, kishte arritur në përfundimin se vendimi i arbitrit ishte i gabuar. “Nuk ishte faull, nuk ishte as shkelje,” tha Trump para gazetarëve. Presidenti amerikan shtoi se kishte telefonuar Infantinon dhe kishte kërkuar “një rishikim” të rastit.

Megjithatë, teksa përpiqej ta paraqiste ndërhyrjen si kërkesë për drejtësi sportive, Trump e lidhi debatin edhe me pretendimet e tij për zgjedhjet presidenciale të vitit 2020. Duke folur për ndeshjen me Belgjikën, tha: “Ne do të kemi ekip të plotë dhe Belgjika do të ketë ekip të plotë. Dhe e dini çfarë? Nëse na mundin, atëherë mund të jenë vërtet krenarë. Në mënyrën tjetër, nëse na mundin, do të themi se ishte — do të thosha — e manipuluar, ashtu siç u manipulua zgjedhja në vitin 2020.”

Vendimi i FIFA-s ka shkaktuar reagime të asgora në Belgjikë dhe te zyrtarë të tjerë evropianë të futbollit. Federata belge e futbollit, RBFA, kërkoi shpjegime zyrtare nga FIFA, duke thënë se nuk kishte marrë as vendimin, as arsyetimin për lejimin e Balogun që të luante. Sipas federatës belge, ajo kishte mësuar për zhvillimin përmes raportimeve në media dhe më pas kishte dërguar një letër ku kërkonte kopje të vendimit dhe shpjegim për procedurën.

RBFA tha se përgjigjja e vetme nga FIFA ishte një letër ku korrespondenca belge konsiderohej si apelim, ku ishte caktuar një gjyqtar dhe ku federatës i jepej vetëm pak orë për ta plotësuar ankesën. “Nuk u dha asnjë informacion nga FIFA,” deklaroi federata belge.

Ministri i Jashtëm i Belgjikës, Maxime Prévot, e cilësoi situatën si shqetësuese. “Nëse një telefonatë është vërtet ajo që shpjegon këtë vendim të pakuptueshëm, kjo do të përbënte minimin e rregullave më themelore të futbollit dhe sportit,” tha ai.

Përballë kritikave, Gianni Infantino doli me sqarim publik, duke deklaruar se organet gjyqësore të FIFA-s veprojnë në mënyrë të pavarur. “Organet gjyqësore të FIFA-s janë të pavarura. Ato veprojnë në mënyrë autonome, zbatojnë Kodin Disiplinor të FIFA-s dhe vendosin rastet bazuar në rregulloret e zbatueshme dhe faktet konkrete para tyre,” deklaroi ai.

Infantino pranoi se kishte marrë telefonatë nga Trump, por tha se presidentit amerikan i kishte shpjeguar se çështja ishte pjesë e një procesi ligjor në organet e pavarura të FIFA-s. “Po, unë diskutoj rregullisht çështje që lidhen me Kupën e Botës me Presidentin e Shteteve të Bashkuara, dhe për këtë çështje mora një telefonatë nga Presidenti Donald Trump,” tha Infantino. Ai shtoi se merr telefonata edhe nga krerë shtetesh, zyrtarë qeveritarë, aktorë të futbollit dhe drejtues biznesi nga e gjithë bota.

Sipas FIFA-s, vendimi për Balogun u mbështet në nenin 27 të kodit disiplinor, i cili lejon që organi gjyqësor të pezullojë plotësisht ose pjesërisht zbatimin e një mase disiplinore.

Trump këmbënguli se nuk i kishte thënë Infantinos “çfarë të bënte” dhe se, sipas tij, vendimin nuk e kishte marrë presidenti i FIFA-s, por një komision. “Mendoj se ishte një komision që e mori vendimin, dhe ata morën vendimin e duhur, sepse, së pari, nuk ishte faull, dhe ti do të shohësh një ndeshje me lojtarët më të mirë,” tha Trump.

Ish-presidenti amerikan Bill Clinton ka uruar ish-presidentin George W. Bush me rastin e 80-vjetorit të lindjes, duke e cilësuar miqësinë me të dhe familjen Bush si një nga dhuratat më të mëdha të jetës së tij.

Në mesazhin e publikuar, Clinton theksoi se miqësia e tyre i ka kujtuar gjithmonë se, përpara se të jenë politikanë, janë amerikanë dhe, mbi të gjitha, njerëz.

Me humor, ai shtoi se për muajin e ardhshëm është veçanërisht mirënjohës që më në fund ka dikë më të moshuar se ai. Clinton i uroi Bushit shumë vite të tjera me shëndet, lumturi dhe miqësi, duke theksuar se Shtetet e Bashkuara janë më të forta kur qytetarët kujtojnë se ato që i bashkojnë janë më të mëdha se ato që i ndajnë.

FIFA e ka hedhur poshtë apelin e Belgjikës rreth të drejtës së sulmuesit amerikan, Folarin Balogun, pasi shtëpia botërore e futbollit vendosi që ta shfuqizonte pezullimin e tij për një ndeshje para sfidës vendimtare të një të gjashtëmbëdhjetës së finales në Kupën e Botës, pikërisht kundër Belgjikës.

Edhe pse mori karton të kuq në lojën kundër Bosnjës, sulmuesi do të ketë të drejtë që të luajë të hënën kundër Belgjikës në Seattle, pas një ndërhyrjeje që i përfshiu presidentin amerikan, Donald Trump, zyrtarë qeveritarë, federatën amerikane të futbollit dhe një ekip të gjerë ligjor, raporton gazeta “The New York Times”.

Belgjika ishte ankuar zyrtarisht për vendimin, duke thënë se “nuk kishte alternativë pos ta sfidonte të drejtën [e lojtarit amerikan] për ndeshjen e radhës”.

Megjithatë, Komiteti i Apeleve i FIFA-s e ka cilësuar si “të papranueshme” kërkesën e dorëzuar nga Federata Mbretërore Belge e Futbollit (RBFA).

Balogun, ylli i sulmit amerikan me tri gola të shënuara deri më tani në Kupën e Botës, mori karton të kuq, pasi ia shkeli këmbën lojtarit të Bosnjës, Tarik Muharemoviq në fitoren e së mërkurës, duke u pezulluar automatikisht me një ndeshje moslojë.

FIFA njoftoi të dielën se kjo masë ishte shfuqizuar për rundin e një të gjashtëmbëdhjetës së finales, vendim i jashtëzakonshëm që u çmua nga Trumpi, por që e zemëroi ekipin belg. Duket se kjo është hera e parë që nga viti 1962 që një karton i kuq gjatë Kupës së Botës nuk rezulton në pezullim.

Deputeti i zgjedhur i PDK-së, Artan Behrami, ka reaguar ndaj deklaratës së Arbërie Nagavcit nga Vetëvendosje, e cila tha se votat për formimin e qeverisë ekzistojnë, por se më pas duhet konsensus për zgjedhjen e presidentit.

Behrami e interpretoi këtë qasje si paralajmërim për një skenar që, sipas tij, çon vendin drejt zgjedhjeve të reja.

“Kjo është formula për të shkuar në zgjedhje”, tha Behrami.

Ai tha se një rend i tillë politik - konstituimi i Kuvendit, zgjedhja e kryetarit, votimi i qeverisë, miratimi i buxhetit dhe marrëveshjeve ndërkombëtare, e më pas çështja e presidentit - është përdorur edhe më herët në periudha që kanë përfunduar me zgjedhje nacionale.

Sipas Behramit, arsyeja pse kryeministri në detyrë Albin Kurti mund të synojë zgjedhje të reja lidhet me Marrëveshjen e Ohrit.

Ai pretendoi se Kurti ka frikë ta zbatojë një marrëveshje që, sipas tij, është e dëmshme për interesat e Kosovës dhe të cilën e ka pranuar në Bruksel dhe në Ohër.

“Dhe arsyeja pse don me shku në zgjedhje e kemi diskutuar disa herë, nuk ka ndryshu. Pra, qytetarët e Kosovës duhet ta dinë, është frika absolute e z.Kurti për të implementuar një marrëveshje të dëmshme për interesat e Republikës së Kosovës, të cilën e ka pranuar në Bruksel dhe në Ohër”, deklaroi Behrami.

Katër persona kanë mbetur të lënduar si pasojë e një aksidenti trafiku që ka ndodhur sot në fshatin Parallovë të Novobërdës.

Rastin e ka konfirmuar zëdhënësi i Policisë për rajonin e Gjilanit, Ismet Hashani, i cili tha se në aksident janë përfshirë dy vetura.

Sipas tij, të lënduarit kanë marrë ndihmën e parë dhe më pas janë dërguar për trajtim në Qendrën Emergjente në Gjilan.

“Ju njoftoj se sot në ora 15:20 kemi pranuar informatën për një aksident trafiku në fsh.Parallovë,KK-Novobërdë. Njësitet e Trafikut rajonal, ndihma e parë dhe zjarrëfikësit kanë dalë, në vendngjarje”, ka deklaruar Hashani.

Ai ka bërë të ditur se njësitet përkatëse të Policisë së Kosovës janë duke hetuar rrethanat e aksidentit.

“Nga hetuesit e aksidentit jemi njoftuar se në aksident janë të përfshira dy vetura dhe janë të lënduar katër persona të cilët nga ndihma e parë janë transportuar në QE-Gjilan. Policia e Kosovës njësitet e trafikut rajonal janë duke i hetuar rrethanat se si ka ardh deri te aksidenti”, thuhet në konfirmim.

Presidenti amerikan Donald Trump ka konfirmuar se i kërkoi FIFA-s të rishikonte pezullimin me një ndeshje të sulmuesit të ShBA-së, Folarin Balogun, në Kupën e Botës.

Balogun, 25 vjeç, rrezikonte të mungonte në ndeshjen e 1/8-ve kundër Belgjikës pasi u ndëshkua me karton të kuq për një ndërhyrje ndaj Tarik Muharemovic. Megjithatë, FIFA vendosi të dielën të pezullojë për 12 muaj zbatimin e dënimit, duke i lejuar lojtarit të jetë i disponueshëm për ndeshjen në Seattle. Ai ka shënuar tre gola në këtë turne.

Trump. sipas BBC-së, tha se kishte kërkuar rishikim pasi nuk e konsideronte ndërhyrjen faull, duke shtuar se kishte folur me presidentin e FIFA-s, Gianni Infantino, por nuk kishte ushtruar presion për vendimin. Ai e cilësoi vendimin si të drejtë dhe tha se pezullimi do të dëmtonte imazhin e turneut.

“Mendoj se ishin dy sportistë të mëdhenj që u përplasën me njëri-tjetrin dhe u ngatërruan,” tha Trump.

“Mendoj se ai [pezullimi] do të kishte lënë një njollë të madhe. Nuk mund t’u them atyre çfarë të bëjnë. Nuk besoj se ata e morën vendimin; besoj se vendimin e mori komisioni. Dhe ishte vendimi i duhur.”

Ish-Shefja e Grupit Parlamentar të Vetëvendosjes, Arbërie Nagavci, ka treguar se si kjo parti e sheh rendin e gjërave me t’u thirrur seanca për konstituimin e kuvendit.

Ajo tha për Radion Evropa e Lirë se do të konstituojnë kuvendin dhe pastaj të votojnë qeverinë.

Sa i përket çështjes së presidentit, ç’gjë duhet të kryhet 60 ditë nga konstituimi i kuvendit, ajo tha se “do të angazhohemi për arritjen e konsensusit.”

“Sa i përket Qeverisë, ne i kemi votat e nevojshme. Prandaj, menjëherë pas konstituimit të Kuvendit pa humbur kohë duhet të vazhdojmë me procedurën për votimin e Qeverisë, ndërsa brenda afateve kushtetuese do të angazhohemi edhe për arritjen e konsensusit rreth zgjedhjes së presidentit/es,” tha Nagavci.

Ish-presidentja e Kosovës, Vjosa Osmani, është deklaruar pas takimeve që ka pasur sot në LDK.

Ajo ka bërë me dije se nuk është takua vetëm me kryetarin e LDK-së.

Osmani ka bërë me dije se ka pasur edhe disa takime tjera.

“Nuk jemi taku vetëm me zotin Abdixhiku, kemi pas shumë takime të tjera. Kemi biseduar qysh me ec përpara edhe ma fuqishëm”, ka thënë Osmani.

E pyetur për nismën e mbledhjes së nënshkrimeve për shkarkimin e Lumir Abdixhikut nga posti i kryetarit të LDK-së, ajo ka thënë se deri me tani nuk janë deponuar nënshkrimet për thirrjen e Kuvendit.

“Besoj që mundeni me i dërgu këto pyetje te zëdhënësi i LDK-së, por nuk është deponu asnjë nënshkrim”, ka deklaruar Osmani.