Kreu i Aleancës, Ardian Gjini, ka kritikuar ashpër qeverisjen e kryeministrit Albin Kurti, duke thënë se këtë periudhë do ta përkufizonte si “epokë të mashtrimit”.

Në emisionin “FRONTAL” në T7, Gjini ka deklaruar se, pavarësisht qëndrimeve të mëhershme të pushtetit ndaj Serbisë, Kosova vazhdon të furnizohet me produkte dhe mallra që vijnë nga ky shtet.

Sipas tij, përveç vagonëve të dërguar për intervenim në Serbi, nga atje importohen edhe materiale ndërtimore, energji dhe produkte që përdoren në sektorin e shëndetësisë.

“E kanë ditë. I kanë çu zyrtarët publikë me inspektu në Serbi. S’janë kry punët për të cilat janë paguar parët. Sot ka institucione shëndetësore në të cilat gjenden edhe infuzione të prodhuara në Serbi, infuzione që u jepen pacientëve”, ka deklaruar ai.

Ai ka përmendur edhe furnizimin me zall, energji dhe trenat si shembuj të bashkëpunimit ekonomik me Serbinë.

“Zalli blehet prej Serbisë, energjia, infuzionet, trenat. Këta kanë ardhë në pushtet me kauzën kurgjo me Serbinë”, ka thënë Gjini.

Kanadaja ka thënë se do të zbatojë taksë hakmarrëse deri në 50 për qind ndaj mallrave nga ShBA-ja me vlerë të 20 miliardë dollarëve, pas zotimit të kryeministrit Mark Carney për t’iu kundërvënë taksave të presidentit amerikan, Donald Trump, “dollar për dollar”.

Taksat e reja do të hyjnë në fuqi më 8 shtator dhe do të jenë në nivelet prej 15, 25 dhe 50 për qind ndaj 700 produkteve, thuhet në një deklaratë të qeverisë kanadeze, raporton gazeta “The Guardian”.

Në këtë listë përfshihen taksa prej 50 për qind ndaj importeve të çelikut dhe aluminit nga Shtetet e Bashkuara, si dhe një taksë prej 25 për qind ndaj djathit, peshkut të freskët dhe të ngrirë dhe ushqimit të detit.

Kanadaja do të vendosë një taksë prej 25 për qind edhe ndaj produkteve të amvisërisë, përfshirë rrobalarëset, tharëset e flokëve dhe stufat.

Në anën tjetër, presidenti amerikan tha se Kanadaja i ka ngarkuar bujqit amerikanë me taksë prej 400 për qind dhe kanë nxjerrë shumë kompani amerikane nga tregu.

“Unë merrem me shumë shtete dhe Kanadaja është bindshëm më e vështira dhe më e paarsyeshmja” – tha kreu i Shtëpisë së Bardhë.

Agjencia e Metrologjisë së Kosovës, në bashkëpunim me Inspektoratin Qendror të Mbikëqyrjes së Tregut, kanë nisur aksionin për mbikëqyrjen e peshës së bukës dhe kontrollimin e vlefshmërisë së peshoreve në furrat e Kosovës.

Sipas njoftimit të Ministrisë së Industrisë, Ndërmarrësisë, Tregtisë dhe Inovacionit, inspektimet kanë filluar në rajonin e Prishtinës dhe gjatë ditëve në vijim do të vazhdojnë edhe në komunat e tjera.

Aksioni vjen pas ankesave të konsumatorëve për dallime të mundshme ndërmjet peshës së deklaruar të bukës dhe peshës reale të produktit të blerë.

“Mospërputhja e masës së produktit të promovuar me masën reale të produktit të shitur konsiderohet mashtrim ndaj konsumatorit”, thuhet në njoftim, duke iu referuar Ligjit Nr. 06/L-034 për Mbrojtjen e Konsumatorit.

Për këtë shkelje, bizneset mund të gjobiten nga 1,000 deri në 10,000 euro.

Gjatë aksionit po kontrollohen gjithashtu afati i vlefshmërisë dhe rregullsia e peshoreve, si dhe nëse operatorët ekonomikë posedojnë pëlqimin për kushtet minimale teknike. Për përdorimin e mjeteve matëse të parregullta, subjektet juridike mund të gjobiten nga 500 deri në 1,500 euro.

AMK dhe IQMT u kanë bërë thirrje furrtarëve që “të sigurojnë matjen e saktë të produkteve dhe të respektojnë të gjitha kërkesat ligjore për mbrojtjen e konsumatorëve”.

Pas publikimit të aktakuzës ndaj Fatmir Shehollit, ku flitet edhe për planin serb për të përdorur ekstremizmin fetar islamik në Kosovë, ka reaguar profesori universitar Blerim Latifi, i cili ka thënë se është konfirmuar ajo që ndër vite është paralajmëruar.

Ai tutje ka thënë se në Kosovë kishin zgjedhur heshtjen dhe mbylljen e syve ndaj këtij kërcënimi. Ai tha se, kur ta kuptojnë, do të jetë vonë.

Latifi ka publikuar një pjesë nga dosja e aktakuzës ndaj Shehollit, ku në telefonin e tij është gjetur një dokument “Top Sekret” (i shënuar si “CONFIDENTIAL”), lidhur me një plan për përhapjen e ndikimit të radikalizmit islamik.

Reagimi i plotë i Latifit:

“Plani i madh i UDB-së (BIA), i gjetur në telefonin e Shehollit. Konfirmim i plotë i asaj që ndër vite e kemi paralajmëruar: Radikalizmi islamik në Kosovë është projekt i Serbisë për shkatërrimin e Kosovës përmes arabizimit të shoqërisë kosovare.

Nuk keni dashur të dëgjoni e të shikoni. Keni zgjedhur heshtjen dhe mbylljen e syve. Kuptohet, një ditë do të detyroheni t’i hapni, por mbase do të jetë vonë.

Ja plani i marrë nga dosja e prokurorisë dhe i botuar sot në media:

‘Pasi që të bëjmë marrëveshje me operativët tanë në Kosmet, mbledhjen e fondeve nga ambasadat islamike në Beograd, shumica e këtyre parave do të investohen në ndërtimin e xhamive. Xhamitë duhet të ndërtohen në vende të dukshme, si afër autoudhëve, shkollave, qendrave tregtare, ndërsa xhamitë në fshatrat e mëdha duhet të dyfishohen dhe trefishohen. Pranë xhamive, shkollat islamike (medresetë) duhet të shtrihen në të gjithë vendin, edhe në ato vende ku interesimi është më i vogël. Fëmijë dhe të rritur duhet të barten nga vendet ku feja është më e rëndësishme se kombi, si nga vendet Mitrovicë, Vushtrri, Deneral Jankovic, Kaçanik, Dragash dhe Prizren. Krahas operativëve shqiptarë, kontribut të madh do të japin edhe njerëzit tanë nga Maqedonia, Bosnja dhe Sanxhaku, duke përfshirë romët dhe ciganët, të cilët janë të gatshëm të punojnë për ne dhe të aktivizohen në Islam.

Udhëheqësit e bashkësive islamike të Serbisë, Maqedonisë, Bosnjës, Kosmetit janë nën kontrollin tonë dhe po punojnë që sa më shumë të inkuadrojnë njerëz me kombësi shqiptare me ndikim në sport, media, muzikë dhe politikë. Edhe në disa parti politike kemi njerëzit tanë, të cilët punojnë për ne dhe të cilët e përkrahin fuqishëm Islamin dhe të cilët janë të lidhur me udhëheqësit islamë, të cilët janë duke shpërndarë Islamin edhe në vendet ku nuk ka pasur kurrë xhami.

Në vendet perëndimore janë deleguar njerëzit tanë nga bashkësitë islame nga Kosova dhe Sanxhaku, të cilët janë nën urdhrat e ambasadave tona në Zvicër, Gjermani dhe Belgjikë. Me këtë do të arrijmë që t’i ndajmë shqiptarët të cilët jetojnë jashtë shtetit, kryesisht në Zvicër dhe Gjermani, ku jetojnë shqiptarët më të pasur dhe më të fuqishëm, të cilët e kanë përkrahur Rugovën.

Poshtë në Kosmet duhet të krijohet atmosfera, ashtu që njerëzit të ndihen sikur po jetojnë në një shtet të huaj, kështu që një pjesë e rinisë do të ikë jashtë Kosovës dhe një pjesë do të vendosë për fenë islame. Pas 20 vitesh Kosova do të duket si Kandahar. Fuqitë perëndimore do të ndryshojnë mendimin për Kosovën dhe kështu do të vendosin për kthimin e Kosovës nën juridiksionin e Serbisë.’”

Deputeti i LDK-së, Ukë Rugova, ka thënë se pret që së shpejti të bëhet i ditur emri i një presidenti konsensual.

Ai shpreson që kjo të ndodhë gjatë kësaj jave, duke theksuar se Kosova ka mjaft kandidatë të përgatitur.

Rugova tha se vetë nuk është kandidat për këtë post, pasi, sipas tij, ka emra më të përshtatshëm.

Aleancës nga sot i është bashkuar asambleisti i Komunës së Prishtinës, Betim Abdullahu.

Këtë e ka bërë të ditur kryetari i Aleancës, Ardian Gjini.

Ai ka thënë se Abdullahu sjell në Aleancë një përvojë të gjatë në shërbim të qytetarëve të Prishtinës, me mbi 10 vjet angazhim në institucionet lokale të kryeqytetit dhe së fundmi si përfaqësues i qytetarëve në Kuvendin Komunal të Prishtinës.

“E falënderoj Betimin për besimin dhe vendimin për t’iu bashkuar Aleancës. Angazhimi i Betimit dhe i profesionistëve të tjerë në Aleancë na jep forcë për të shtyrë përpara procese të rëndësishme”, ka shkruar Gjini në profilin e tij në Facebook.

Kryetari i Aleancës ka vlerësuar edhe punën e kryetarit të Aleancës në Prishtinë, Kreshnik Smajlaj, për angazhimin e vazhdueshëm në fuqizimin e Degës dhe organizimin e strukturave të Aleancës në kryeqytet.

Ministria e Mbrojtjes ka hapur konkurs për rekrutimin e personelit profesional, teknik dhe mbështetës në Kompleksin për Prodhimin e Municioneve në Jahoc të Gjakovës.

Pozitat përfshijnë inxhinieri, prodhim, mirëmbajtje, kontroll cilësie, siguri dhe logjistikë.

Përzgjedhja do të bazohet në meritokraci, transparencë dhe profesionalizëm, ndërsa të përzgjedhurit do të trajnohen para angazhimit.

Aplikimi është i hapur nga 24 deri më 30 gusht 2026.

Deputetja e LDK-së, Janina Ymeri, ka vazhduar kritiken ndaj ndërmarrjes publike “Trainkos” për riparimin e vagonëve të Kosovës në Serbi.

Ajo ka bërë me dije se kjo kompani i ka besuar shumë kontraktorit për këtë çështje.

Në profilin e saj në Facebook, ajo ka shkruar se për këtë fakt Trainkos e ka nënshkruar kontratën pa çmime në paramsë.

“Aq shumë i ka besuar TrainKos kontraktorit për Vagonë sa që është nënshkru kontrata afër gjysëm milioni pa çmime në Paramasë. Kjo i bjen me Tahmin, e çmimet saktë i qet kontraktori nga Republika e Serbisë. Çfarë besimi”, ka shkruar ajo.

Kryetari i Organizatës së Veteranëve të Luftës së UÇK-së (OVL-UÇK), Hysni Gucati, ka bërë të ditur se kjo organizatë e mbështet Marshin për Liri, të organizuar nga platforma “Liria ka Emër”, i cili do të mbahet më 12 shtator në Prishtinë.

Në një konferencë për media, ai u ka bërë thirrje qytetarëve që t’i bashkohen protestës, e cila organizohet pak ditë para seancës përmbyllëse të procesit gjyqësor ndaj ish-krerëve të UÇK-së në Hagë.

Sipas tij, këtij mardhi duhet t`i bashkohen të gjithë qytetarët.

“Është thirrur një protestë nga ‘Liria ka Emër’ më 12 shtator, ku ne si OVL bëjmë ftesë të gjithë qytetarëve që t’i bashkohen protestës. Ne do ta mbështesim protestën dhe bëjmë thirrje që të jetë një protestë sa më e madhe”, ka deklaruar Gucati.

Sekretarja e Përgjithshme e PDK-së, Vlora Çitaku, ka komentuar procesin ndaj ish-krerëve të UÇK-së në Hagë.

Ajo ka bërë me dije se në paraburgim në Hagë nuk janë Haxhim Thaçi, Kadri Veseli, Jakup Krasniqi e Rexhep Selimi si emra te përveçëm.

Në profilin e saj në Facebook, ajo ka shkruar se në burg është UÇK-ja.

“Nuk është në burg Hashim Thaçi i PDK-së. Në burg është Hashim Thaçi i UÇK-së. Hashim Thaçi i Kosovës. Nuk është në burg Kadri Veseli i PDK-së. Në burg është Kadri Veseli i UÇK-së. Kadri Veseli i Kosovës. Nuk është në burg Jakup Krasniqi i PDK-së. Në burg është Jakup Krasniqi i UÇK-së. Jakup Krasniqi i Kosovës. Nuk është në burg Rexhep Selimi i VV-së. Në burg është Rexhep Selimi i UÇK-së. Rexhep Selimi i Kosovës. Në burg është UÇK-ja. Historia jonë. Lufta jonë për liri. Një pjesë e pandashme e asaj që jemi sot”, ka shkruar ajo.

Sipas Çitakut, më 16 shtator vendoset për lirinë e Kosovës.

“Prandaj, më 16 shtator nuk vendoset vetëm për fatin personal të katër burrave. Vendoset për historinë tonë. Për të vërtetën e luftës sonë. Për mënyrën se si brezat që vijnë do ta lexojnë dhe do ta kuptojnë rrugën e Kosovës drejt lirisë. Sepse historia që ua lëmë fëmijëve tanë është po aq e rëndësishme sa e ardhmja që ndërtojmë për ta. Më 16 shtator, përtej partive e dallimeve tona, është Kosova”, ka shkruar ajo.