Departamenti i Shtetit i ShBA-së e ka miratuar shitjen e mundshme të aeroplanëve luftarakë “F-35 Lightning II Joint Strike Fighter” në Arabinë Saudite, njoftoi ky dikaster të enjten.

Shitja me vlerë të 24,3 miliardë dollarëve do të përfshinte 48 aeroplanë ushtarakë dhe 49 motorë “Pratt & Whitney” bashkë me pajisjet e komunikimit, pjesët rezervë dhe produkte të tjera, tha Departamenti i Shtetit, raporton agjencia e lajmeve “Reuters”.

“Shitja e propozuar e këtyre pajisjeve dhe mbështetja nuk do ta ndërrojnë baraspeshën ushtarake në rajon” – thuhet në njoftimin e publikuar në internet.

Vendimi i 16 shtatorit ka qenë kollaj i parashikueshëm meqë shenjat për të ishin kudo. Hidhërimi ynë është i madh, aq i madh sa na duket sikur Perëndimi e kreu një pabesi të madhe. Por nuk duhet të harrohet se garancat e dhëna që më 2015 nga ambasadat e Quint-it jetojnë në aktgjykim tekqë Paneli e tha shkoqur që nuk preket legjitimiteti i UÇK-së dhe qëllimi i saj për pavarësi. Faji është gjetkë. Politika populiste, tash e gjashtë vjet, e shndërroi Kosovën në një ishull vetmitar ku nuk ekziston asnjë aleat perëndimor. Duhet të shohim më mirë plagët që kullojnë gjak e të kuptojmë se ka edhe një fat në fatkeqësi. Është në interesin tonë që kur të publikohet i plotë aktgjykimi, teksti i tij të jetë plot e përplot me shkelje, paradoksalitete e anomali. Kur të ekspozohen ato para një komuniteti akademikësh e ekspertësh ndërkombëtarë, atëherë do të kemi mundësinë për një strategji të re e efikase të Mbrojtjes në Apel.

Col Mehmeti

Kur Tribunali u bë në verën e 2015-s, pas një trysnije të gjithanshme nga jashtë, garancitë e dhëna nga Perëndimi ishin fare gjenuine dhe të vërteta.

Në këto momente secili jemi sedërlënduar, por tronditja e madhe nuk duhet të na errësojë gjykimin sa të hipim në rimorkion e atyre që janë antiperëndimorë në shpirt.

Kur ambasadat e Quint-it në Prishtinë dilnin me deklarime të njëzëshme se lufta e UÇK-së ishte e drejtë e ky fakt nuk tjetërsohej nga çfarëdo gjykimi, këtu nuk kishte kurrfarë shtirje.

Në atë copë aktgjykimi, që u lexua paraditën e djeshme nga gjyqtari amerikan Charles L. Smith, gjenden të fiksuara mu këto garanca kur u tha shkoqur se “ky rast nuk ka të bëjë me legjitimitetin e Ushtrisë Çlirimtare të Kosovës dhe qëllimin e saj për një Kosovë të mosvarur”.

Kaq mjafton që të refuzohet hipja në rimorkion me vende të lira të atyre që na tërheqin në moçalin e urrejtjes antiperëndimore.

Le ta ngulisim një gjë si gozhdë në krye.

Teprimet e shkeljet që ecën dorë-për-dore në procesin e Hagës nuk e kanë adresën te Perëndimi.

Më tepër, ato duhen parë brenda përçarjeve të brendshme dhe, mbi të gjitha, fobisë patologjike ndaj Trumpit.

Në mungesë të guximit për t’u ballafaquar me të, qarqe të caktuara donin të hakmirreshin në njerëz që ndjesoheshin si të lidhur me MAGA-istët, d.m.th me Trumpistët më burimorë.

Ideja e një ‘tribunali special’ ishte një imperativ ndërkombëtar, madje edhe baballarët themelues të këtij shteti e dinin që, fill pas shpalljes së pavarësisë, do të përballeshin me procese gjyqësore.

Duhet të shohim pak përtej plagëve.

Ka edhe njëfarë fati në secilën fatkeqësi.

Ndonëse nuk është publikuar ende aktgjykimi i plotë, do të ishte në interesin tonë që totali i tij të jetë sa më paradoksal, me sa më shumë shkelje e sa më shumë kundërthënie.

Kjo do ta ekspozonte vendimin e 16 shtatorit para një komuniteti ekspertësh e profesionisësh të huaj, e rrjedhimisht do të përgatitej një strategji e re dhe efikase në Apel.

Zemërata e vërtetë që duhet të na përshkojë është vetëm kur bëjmë dallimin mes 2015-s dhe 2026-s.

Në këtë dekadë çmendurie, i pabesë nuk ishte Perëndimi, por të pabesët ishim ne, ne ishim bukëshkalët e mosmirënjohësit përballë tij.

Më 2015, dera diplomatike për Kosovën ishte e hapur në Washington, Paris, Londër, Berlin e Romë.

Sot, të gjitha këto dyer janë të mbyllura me shula refuzimi dhe askush nuk e bën hesap një shtetëruc që sillet me arrogancë sikur të ishte Rusi, Iran apo ndonjë tjetër nga klubi i batakçinjve.

Kryeministrin e Kosovës sot e pret vetëm Hristijan Mickoski në Shkup.

Nëse dikur një burrështas nga Kosova mund të shtrëngonte duart me Obaman, Macronin e Merkelin, sot nuk është e mundur as të kapet për mëngësh një diplomat i rangut të tretë teksa endet shkallëve.

Aq e thellë është shpërfillja ndërkombëtare sa edhe kur dy mashtrues rusë e telefonuan Kurtin, ky foli me ta për 10 minuta resht duke menduar naivisht se në anën tjetër të telefonit po kuvendonte me presidentin e Letonisë, Edgars Rinkēvičs.

Më 2015, Kosova ndjesohej si një faktor lokal tek i cili Perëndimi llogariste në qetësinë e tij strategjike, por edhe në aftësinë e tij për të bërë probleme nëse ato ishin të ekspendientizueshme për një qëllim të caktuar të Perëndimit.

Sot, Kosova e vetëshkërdhyer nga populizmi e provincializmi nuk ka kurrfarë aftësie a takati për destabilitet.

Qetësia e saj as nuk i shënohet në defter sepse është shtet që gradualisht e ka zgjedhur një jetë ishullore, një izolim të plotë, një jetë nga zeroja si e Robinson Kruzosë.

Qysh në fund të 2024-s, për këdo që e përcillte procesin më me vëmendje, kuptohej qartë se Gjykata Speciale do ta dënonte ekzemplarisht krejt udhëheqjen e UÇK-së.

Gjatë kësaj kohe po kryheshin testime inxhinierike se cili do të ishte impakti social, sa do të ishte ndjeshmëria e njerëzve kur do të prekej identiteti i tyre.

Megjithëse institucionet ndërkombëtare të sigurisë para disa ditësh paralajmëronin skenarë potencialë dhune, peizazhet urbane në Kosovë, dje dhe sot, ishin të qeta, të vdekura e indiferente.

Ndjeshmëria kolektive praktikisht është e hiçtë dhe ka plot gjëra të tjera që mbiprodhojnë emocione, ndjeshmëri e elektrizim.

Filozofia antike greke nuk është ajo e thellësive dhe koncepteve të mëdha siç mendojmë. Jo!

Filozofia greke ishte veçse përpjekja për të thënë se si shkatërrohet bota kur turmat e bëjnë ligjin, kur sundon kallaballëku.

Dhe kishin të drejtë sepse populizmi ia përlau kryet këtij vendi.

Klinika Infektive e Qendrës Klinike Universitare të Kosovës (QKUK) ka njoftuar për rastin e parë të vdekjes së një pacienti të diagnostikuar me Virusin e Nilit Perëndimor.

Sipas njoftimit të QKUK-së, pacienti Rr. I., i lindur më 2 maj 1960, ishte hospitalizuar më 10 shtator në Klinikën Infektive, me diagnozën meningoencefalit akut dhe në gjendje të rëndë shëndetësore.

Para shtrimit në spital, pacienti ishte trajtuar për pesë ditë në mënyrë ambulatore. Në ditën e pranimit në Klinikën Infektive, atij iu kryen ekzaminimet e nevojshme diagnostikuese dhe menjëherë u nis trajtimi, ndërsa u realizuan edhe konsultat përkatëse mjekësore.

Në kuadër të analizave laboratorike u krye edhe testi RT-PCR për Virusin e Nilit Perëndimor, i cili rezultoi pozitiv.

Gjatë hospitalizimit, gjendja e pacientit vazhdoi të ishte tejet e rëndë dhe kërkoi trajtim intensiv. QKUK ka bërë të ditur se gjatë gjithë periudhës së qëndrimit në spital u ndërmorën masat dhe procedurat e nevojshme mjekësore, ndërsa terapia medikamentoze u përshtat në përputhje me gjendjen klinike.

Pavarësisht trajtimit dhe përpjekjeve të stafit mjekësor, pacienti ndërroi jetë më 15 shtator, në orën 08:40.

Ky, sipas QKUK-së, është rasti i parë i vdekjes i raportuar në Kosovë te një pacient i diagnostikuar me Virusin e Nilit Perëndimor.

Kryeministri i Suedisë, Ulf Kristersson, ka dhënë dorëheqje, pasi blloku i tij djathtist u mposht me rezultat të ngushtë nga opozita e qendrës së majtë në zgjedhjet e përgjithshme.

Ai e dha njoftimin në një shkrim të publikuar në rrjetin X të enjten pasdite, pasi numërimi preliminar i votave nga zgjedhjet e së dielës tregoi rreth 5 mijë vota dallim mes dy blloqeve në shtetin me rreth 10 milionë njerëz, raporton televizioni BBC.

Partitë opozitare, të udhëhequra nga Magdalena Andersson e socialdemokratëve pritet të fitojë 176 ulëse në kuvendin me 349 anëtarë.

Kirstersson, i cili ka qëndrime konservatore, ishte mbështetur nga qeveri nga Demokratët e Suedisë dhe u kishte premtuar atyre pozita në kabinetin qeveritar, nëse do t’i fitonte zgjedhjet.

Blloku i tij djathtist pritet të fitojë 173 ulëse, sipas të dhënave nga Autoriteti Zgjedhor i Suedisë.

Rezultatet duhet të certifikohen formalisht ditëve në vijim dhe pritet të finalizohen këtë fundjavë.

Në Suedi ekzistojnë dy blloqe politike kryesore – katër parti në krahun e djathtë dhe katër të tjera në të majtin – prandaj suedezët janë të mësuar me koalicione dhe me qeveri të pakicës.

Futbollisti i njohur me origjinë shqiptare, Granit Xhaka, ka reaguar pas verditk dënuar për Gjykatën Speciale për ish-krerët e UÇK-së.

Ai ka ndarë një mesazh mbështetje për Hashim Thaçin, Kadri Veselin, Jakup Krasniqin e Rexhep Selimin.

Përmes rrjeteve sociale, ai ka publikuar një fotografi të ish-krerëve ndërsa në të shkruhet: “Luftuan në tokën e tyre, për lirinë e atdheut. Liria ka emër”.

Qytetarë të shumtë po vazhdojnë të qëndrojnë në Sheshin “Skënderbeu” të Prishtinës, afër ndërtesës së Qeverisë së Kosovës, edhe në orët e vona të së mërkurës.

Sipas disa fotografive të siguruara nga reporterët e gazetës “Nacionale”, në shesh shihen ende shumë qytetarë të mbledhur pranë ndërtesës së Qeverisë, e cila po ruhet nga një kordon i policisë, me ndihmën e pengesave metalike.

Në shesh, bashkë me qytetarët e rëndomtë, janë parë edhe disa deputetë të partive opozitare, PDK e Aleanca.

Presidentja e Komisionit Evropian i ka mbështetur propozimet që Kanadaja të bëhet anëtare e asociuar” e Bashkimit Evropian. Ky shtet do të ishte i pari me status të tillë brenda bllokut.

Ursula von der Leyen i tha Parlamentit Evropian të mërkurën se ajo dëshiron të punojë rreth “hapjes së derës” për Kanadanë, që do të përfshinte lidhje më të ngushta në sektorë kyçë, raporton televizioni BBC.

Kryeministri kanadez, Mark Carney, javën e kaluar foli për synimin e një “aleance unike” me Bashkimin Evropian. Ky shtet tani për tani ka marrëdhënie të tensionuara me Shtetet e Bashkuara, të përkeqësuara nga një përplasje për tregtinë.

Pa e përmendur në emër presidentin amerikan, Donald Trump, zonja Von der Leyen tha se ofrimi i një lloj anëtarësimi për Kanadanë “nuk është partneritet kundër askujt tjetër, por për fuqinë tonë të përbashkët”.

Carney ishte i pranishëm në fjalimin vjetor në Strasburg dhe pritet t’i drejtohet Parlamentit Evropian të enjten.

Analisti Krasniqi ka reaguar pas dënimeve drakonike të Gjykatës Speciale ndaj krerëve të UÇK-së.

Ai ka thënë se themelet e shtetit të Kosovës janë ngritur mbi sakrificën dhe idealin për liri.

Në profilin e tij në Facebook, ai ka shkruar se ish-krerët e UÇK-së janë heronj të gjallë.

“Në emër të popullit të Kosovës, ju shpallim heronj të gjallë! Themelet e shtetit të Kosovës janë ngritur mbi sakrificën dhe idealin për liri. Në këto themele qëndron lufta çlirimtare e UÇK-së - një kapitull i pandashëm i rrugëtimit tonë drejt lirisë dhe shtetësisë. Kosova u ndërtua mbi sakrificë. Liria u fitua me shumë mund. E vërteta dhe drejtësia do të triumfojnë. Dje. Sot. Gjithmonë. Për Kosovën”, ka shkruar ai.

Kryetari i PDK-së, Bedri Hamza, ka shkruar në Facebook, për takimet që ka pasur sot. Ai tha se me kërkesë të tij ka takuar të tre liderët e partive paralamentare.

I pari i PDK-së tha se ndaras me secilin prej tyre ka diskutuar se si të bashkëpunojnë në këtë periudhë të rëndësishme për popullin.

E plotë:

Sot, me kërkesën time, pas vendimit në Hagë, u takova ndaras me tre liderët e partive parlamentare, z. Kurti, z. Abdixhiku dhe z. Gjini.

I falënderoj të tre për takimet.

Ne biseduam për seriozitetin e situatës së krijuar, sfidat me të cilat po përballemi, si dhe për mundësitë e bashkëpunimit në këtë periudhë të rëndësishme për popullin dhe shtetin tonë.

Avokati i Popullit, Naim Qelaj, ka deklaruar se pas aktgjykimit ndaj ish-krerëve të UÇK-së, mundësia për rivendosjen e drejtësisë tashmë mbetet te shqyrtimi i çështjes në shkallën e dytë.

Në një intervistë për Klan Kosova, Qelaj ka thënë se institucionet e Kosovës duhet të tregohen më të vëmendshme ndaj zhvillimeve në Gjykatën Speciale dhe të kërkojnë përgjegjësi për veprimet dhe vendimet e saj.

“Unë mendoj që padrejtësia tashmë ka ndodhur. E vetmja mundësi për ta rivendosur drejtësinë është marrja e një vendimi të drejtë”, deklaroi Qelaj.

Sipas tij, një gjykim i drejtë nuk mund të shihet vetëm si një përfundim formal juridik, por duhet të jetë rezultat i një procesi të pavarur dhe të paanshëm.

Qelaj ka theksuar se një proces i tillë duhet gjithashtu të krijojë besim te publiku, duke vlerësuar se Gjykata Speciale nuk ka arritur ta sigurojë këtë besim te qytetarët e Kosovës.

“Besimi i publikut është thelbësor. Nga reagimet publike mund të konstatoj pa dyshim që Gjykata ka dështuar në krijimin e këtij besimi në raport me qytetarët e Kosovës”, tha Qelaj.

Ai ka bërë thirrje që mbrojtja të angazhohet fuqishëm në fazën e apelit, ndërsa ekipet profesionale mbështetëse të kontribuojnë me argumente konkrete në këtë proces.

“Përderisa publiku nuk është i bindur se verdikti është i drejtë, drejtësia nuk ka triumfuar as për viktimat dhe as për të akuzuarit”, u shpreh Avokati i Popullit.

Qelaj ka paralajmëruar gjithashtu për pasojat që do të mund të sillte një vendim i padrejtë ndaj një personi të pafajshëm.

Sipas tij, në një skenar të tillë, dëmi nuk do të kufizohej vetëm te të akuzuarit, por do të prekte edhe besimin në sistemin juridik dhe gjyqësor të Kosovës.