Drejtori i ri i agjencisë izraelite të inteligjencës, Mossad, Roman Gofman, u takua me zyrtarë të lartë të administratës së presidentit amerikan, Donald Trump, gjatë një vizite para dy javësh në Uashington, i tha një burim të mërkurën televizionit CNN.

Burimi tha se Gofmani ndau të dhëna të inteligjencës rreth Malit të Kazmës, uraniumit dhe ekonomisë.

Mali i Kazmës është zonë e fortifikuar nëntokësore që është ndërlidhur me programin bërthamor të Iranit.

Televizioni CNN ka kërkuar koment nga Shtëpia e Bardhë. Agjencia Qendrore e Inteligjencës, CIA, refuzoi që të komentonte.

Gofmani u bë drejtor i Mossadit më herët këtë vit, pasi kishte shërbyer si sekretar ushtarak i kryeministrit Benjamin Netanyahu.

Tre persona janë dërguar në mbajtje dhe një tjetër është intervistuar në cilësinë e të dyshuarës në lidhje me përfshirje në veprimtari penale brenda Ministrisë së Punëve të Brendshme.

Policia e Kosovës në një komunikatë për media ka dhënë detaje për operacionin e realizuar në zyrat e Drejtorisë për Shtetësi, Azil dhe Migrim.

Mes tjerash bëhet me dije se gjatë aksionit janë sekuestruar edhe prova dhe dëshmi relevante.

“Policia ka sekuestruar prova dhe dëshmi relevante që lidhen me rastin. Janë arrestuar dy të dyshuar, zyrtarë të DShAM-së: G.J., (viti i lindjes 1975, femër kosovare) dhe F.Sh., (viti i lindjes 1979, femër kosovare). Në cilësi të të dyshuarit është arrestuar edhe D.K., (viti i lindjes 1988, mashkull, shtetas i huaj). Po ashtu në cilësi të të dyshuarës është intervistuar edhe E.Q., (viti i lindjes 1972, femër kosovare).

Personat e lartcekur, dyshohet se në bashkëkryerje kanë lëshuar leje qëndrimi për shtetas të huaj, duke u mundësuar atyre pajisjen me dokumentacionin përkatës, duke përfituar dobi pasurore në mënyrë të kundërligjshme. Ndaj të dyshuarave është iniciuar rasti karshi veprave penale: ‘keqpërdorimi pozitës apo autoritetit zyrtar’, ‘marrja e ryshfetit’, ‘falsifikimi i dokumentit zyrtar’ dhe ‘dhënia e ryshfetit’”, thuhet në njoftim.

Komunikata e plotë:

Shtetet e Bashkuara porsa kanë njoftuar se kanë arritur një marrëveshje për energjinë bërthamore me Arabinë Saudite.

Sekretari i Energjisë i ShBA-së, Chris Wright, dhe ministri i Energjisë i Arabisë Saudite, princi Abdulaziz bin Salman, nënshkruan një marrëveshje bashkëpunimi për energji bërthamore paqësore bashkë me një marrëveshje dypalëshe për masat e sigurisë, tha Departamenti i Energjisë i ShBA-së.

Në njoftim thuhet se marrëveshja e ndërton “bazën ligjore” për një “partneritet multimiliardësh e të gjatë me dekada”, raporton televizioni BBC.

Departamenti i Energjisë tha se “një marrëveshje për bashkëpunim bërthamor paqësor” do të ofroj “qasje të madhe” për kompanitë amerikane në programin saudit për energjinë bërthamore.

Më tej, në njoftim thuhet se “marrëveshja do t’i dërgohet Kongresit për rishikim”.

Ekspertë të energjisë bërthamore dhe ish-zyrtarë në Izrael kanë paralajmëruar se një marrëveshje e tillë mund ta bëjë Arabinë Saudite të aftë që të zhvillojë armë bërthamore.

Prokuroria Themelore në Prishtinë ka dhënë detaje pas arrestimit të tre zyrtarëve të Ministrisë së Punëve të Brendshme, të cilët tashmë janë ndaluar për 48 orë.

Në një njoftim nga Prokuroria, thuhet se zyrtarët e arrestuar dyshohen për “Keqpërdorim të detyrës apo autoritetit zyrtar” dhe “Falsifikim të dokumenteve”.

F.Sh dhe G.J dyshohet se në bashkëkryerje kanë lëshuar leje qëndrimi për shtetas të huaj, duke përfituar dobi pasurore në mënyrë të kundërligjshme.

“Nga personat e ndaluar, dy (2) janë në cilësinë e personave zyrtarë në Ministrinë e Punëve të Brendshme. Njëri prej tyre zyrtar në Divizionin për të Huaj, ndërsa tjetri është zyrtar në Agjencinë e Regjistrimit Civil (ARC).

Sipas dyshimeve të bazuara në fazën fillestare, të dyshuarit me inicialet F.Sh., dhe G.J., në cilësinë e personave zyrtarë, dyshohen se kanë kryer veprën penale ‘’Keqpërdorimi i detyrës apo autoritetit zyrtar’’ nga neni 414 të Kodit Penal të Republikës së Kosovës, si dhe i dyshuari me inicialet D.K., dyshohet për kryerjen e veprës penale ‘’Falsfikimi i dokumenteve’’, nga neni 390 i Kodit Penal të Republikës së Kosovës.

Po ashtu, nga hetimet e deritanishme rezulton se të dyshuarit F. Sh., dhe G.J., në cilësinë e personave zyrtarë dyshohen, se në bashkëkryerje kanë lëshuar leje qëndrimi për shtetas të huaj, duke u mundësuar atyre pajisjen me dokumentacionin përkatës, përmes të cilit dyshohet se kanë përfituar dobi pasurore në mënyrë të kundërligjshme.

Ndërkaq, i dyshuari me inicialet D.K., dyshohet se ka falsifikuar dokumente të ndryshme me qëllim që t’iu mundësojë personave të tjerë të aplikojnë dhe të pajisen në mënyrë të kundërligjshme me leje qëndrimi në Republikën e Kosovës”, thuhet në njoftim.

Ish-ministri i Punëve të Jashtme, Enver Hoxhaj ka thënë se 16 vite pas Opinionit të Gjykatës Ndërkombëtare të Drejtësisë, Kosova është më e izoluar se në çdo periudhë të pasluftës.

Ai në një shkrim në Facebook, ka thënë se marrëdhëniet me aleatët janë dëmtuar, anëtarësimi në organizata ndërkombëtare është bllokuar dhe dialogu me Serbinë është shndërruar në një process të menaxhimit të krizave.

“Kjo trashëgimi është zbehur pas gjashtëmbëdhjetë vitesh. Kosova është më e izoluar se në çdo periudhë të pasluftës. Marrëdhëniet me aleatët tanë strategjikë janë dëmtuar, rruga drejt anëtarësimit në organizatat ndërkombëtare ka mbetur e bllokuar, ndërsa dialogu me Serbinë është shndërruar nga një proces për normalizim në një proces të përhershëm të menaxhimit të krizave. Vendimi i GJND-së nuk ishte fundi i rrugëtimit tonë. Ai ishte themeli mbi të cilin duhej të ndërtohej etapa përfundimtare e konsolidimit të shtetit të Kosovës.

Ky përvjetor duhet të na kujtojë se fitoret diplomatike nuk ruhen vetvetiu. Ato kërkojnë punë, vizion dhe partneritet të fortë me Shtetet e Bashkuara dhe Bashkimin Evropian. Vetëm kështu Kosova mund ta rikthejë momentumin e humbur, të fitojë njohje të reja dhe ta përmbyllë me sukses konsolidimin e saj ndërkombëtar”, ka shkruar ai.

Ministri në detyrë i Punëve të Brendshme, Xhelal Sveçla ka thënë se janë arrestuar tre zyrtarë të këtij institucioni, pasi dyshohet se kanë kryer shërbime duke anashkaluar procedura ligjore.

Sipas tij, dy zyrtarë të arrestuar janë nga Divizioni për të Huaj dhe një nga Agjencia për Regjistrim Civil.

“Mirëpres aksionin e përbashkët të Policisë së Kosovës dhe Agjencisë së Kosovës për Inteligjencë, i cili rezultoi me arrestimin e dy zyrtareve të Divizionit për të Huaj, një të Agjencisë së Regjistrimit Civil dhe një shtetasi të huaj, për të cilët ekziston dyshimi se në kuadër të ushtrimit të funksioneve të tyre zyrtare e ndërmjetësuese dhe me qëllim të përfitimit financiar, kanë kryer shërbime ndaj palëve duke anashkaluar procedurat ligjore.

Ne mbetemi të përkushtuar ndaj parimeve të integritetit, ligjshmërisë dhe llogaridhënies së çdo zyrtari publik. Çdo dyshim për keqpërdorim të detyrës zyrtare, korrupsion apo cenim të besimit të qytetarëve do të trajtohet me seriozitet të plotë dhe në bashkëpunim të ngushtë me institucionet përgjegjëse të sigurisë dhe drejtësisë”, ka shkruar ai.

Lëvizja Vetëvendosje do të mbajë një takim me mërgatën më 1 gusht.

Sipas një njoftimi të bërë nga kjo parti, takimi do të mbahet në sheshin "Adem Jashari", ku do të marrë pjesë edhe Albin Kurti.

"Pjesëmarrës dhe folës në këtë takim do të jetë edhe kryetari i Lëvizjes, njëherazi kryeministri i Republikës së Kosovës, Albin Kurti. Takimi fillon në orën 20:00", thuhet në njoftim.

Deputetja e Lidhjes Demokratike të Kosovës, Hykmete Bajrami, ka kërkuar mbylljen e deponisë së Sferkës dhe hetim të plotë për përgjegjësinë institucionale lidhur me zjarrin që, sipas saj, ka vazhduar për afro dhjetë ditë.

Bajrami ka mirëpritur vendimin e Forcës së Sigurisë së Kosovës dhe urdhrin e komandantit të FSK-së, gjenerallejtënant Bashkim Jashari, për angazhimin e njësive të specializuara në deponi.

“E mirëpres vendimin e Forcës së Sigurisë së Kosovës dhe urdhrin e Komandantit të FSK-së, Gjenerallejtënant Bashkim Jashari, për angazhimin e njësive të specializuara në deponinë e Sferkës”, ka deklaruar ajo.

Megjithatë, Bajrami ka kritikuar vonesën e reagimit institucional, duke theksuar se ndërhyrja ka ardhur pas disa ditësh djegieje të pandërprerë.

“Fatkeqësisht, ky angazhim vjen pas afro dhjetë ditësh djegie të pandërprerë”, ka thënë deputetja e LDK-së.

Ajo ka kërkuar që të hetohet përgjegjësia për vonesën, mosveprimin institucional dhe dëmet e shkaktuara ndaj shëndetit të qytetarëve, mjedisit dhe pronës.

Deputeti Avdullah Hoti ka kërkuar reagim të menjëhershëm të institucioneve pas dëmeve të shkaktuara nga stuhia me erëra të forta dhe reshje të dendura.

Në një shkri mnë Facebook, ai ka thënë se erërat e forta dhe reshjet kanë dëmtuar biznese, prona private, automjete dhe veçanërisht sektori i bujqësisë, duke bërë thirrje që institucionet të evidentojnë dëmet dhe të nisin sa më parë kompensimin e familjeve, bizneseve dhe fermerëve të prekur.

“Në këto momente nuk mjaftojnë vetëm deklaratat. Është detyrë e institucioneve që të dalin menjëherë në terren, të evidentojnë dëmet dhe të ndërmarrin masa konkrete për kompensimin e familjeve, bizneseve dhe fermerëve të prekur.

Asnjë qytetar nuk duhet të mbetet vetëm përballë pasojave të kësaj fatkeqësie. Qeveria duhet të mobilizojë të gjitha mekanizmat në dispozicion për t’u dalë në ndihmë sa më shpejt të gjithë të dëmtuarve. Mbështetja në këto momente është jo vetëm një detyrim institucional, por edhe një përgjegjësi njerëzore”, ka thënë ai.

Presidenti i Shteteve të Bashkuara, Donald Trump, ka kërcënuar se forcat e vendit të tij do të shkatërrojnë nga një urë ose central bërthamor të Iranit secilën herë kur forcat iraniane sulmojnë një anije në Ngushticën e Hormuzit.

Ai tha në një postim në rrjetin “Truth Social” se në mesin e caqeve të mundshme do të ishin ato që “ndodhen pranë ose në” kryeqytetin Iranian, Teheran, raporton televizioni BBC.

Kundërpërgjigjgja ushtarake do të pasonte çfarëdo forme të sulmit ndaj lundrimit në rrugën detare jetike, “qoftë përmes raketës, dronit ose ndonjë pajisjeje ose arme tjetër”, paralajmëroi kreu i Shtëpisë së Bardhë.

Kërcënimi i tij erdhi pas sulmeve amerikane ndaj Iranit për natën e 11-të rresht. Teherani e ka paralajmëruar Uashingtonin kundër shënjestrimit të objekteve bërthamore.

Komanda Qendrore e ushtrisë amerikane tha se qëllimi i valës së sulmeve është që “ta vazhdojnë degradimin e aftësisë së Iranit për ta kërcënuar lundrimin komercial” në Ngushticën e Hormuzit.

Mediat shtetërore iraniane raportuan se mbrojtja ajrore u aktivizua në Teheran. Shpërthime u raportuan edhe në qytetin veriperëndimor, Tabriz, portet juglindore, Chabahar dhe Konarak, dhe në qytetin jugor, Bushehr, ku ndodhet centrali i vetëm bërthamor i Iranit.