Deputeti i PDK-së, Përparim Gruda, ka komentuar prezencën e sotme në Kuvend të zyrtarëve të ShBA-së dhe BE-së.

Ai ka bërë me dije se sot ishte një moment i ri në Kuvendin e Kosovës.

“Sot ishte një moment i ri në Kuvendin e Kosovës. Në seancën e Kuvendit, të pranishëm ishin edhe përfaqësues të Ambasadës së Shteteve të Bashkuara të Amerikës dhe të Bashkimit Evropian. Kjo prani nuk duhet parë thjesht si një detaj protokollar. Në rrethanat e krijuara, ajo ka një domethënie të veçantë politike dhe përçon një mesazh të qartë: partnerët tanë ndërkombëtarë janë kundër çdo përmbysjeje të rendit kushtetues. Funksionimi i Kuvendit, respektimi i Kushtetutës dhe i institucioneve të shtetit nuk mund të varen nga vullneti politik i një partie apo i një individi”, ka shkruar ai në profilin e tij në Facbook.

Kolektivi për Mendim dhe Veprim Feminist ka protestuar sot në Prishtinë, kundër vrasjes së grave.

Në protestën me moton “Vrasja e grave të trajtohet si urgjencë kombëtare”, janë adresuar kritika të ashpra ndaj institucioneve.

Qendresa Hyseni nga Kolektivi për Mendim dhe Veprim Feminist ka kërkuar që siguria e grave dhe vajzave të trajtohet si çështje me urgjencë kombëtare.

“Sot na qitën prapë në rrugë edhe dy jetë grash të humbura. Jemi dalë zemërthyme e të revoltume me bërtitë që ky patriarkat që po i shndërron burrat në kriminela po vret gra cep më cep Kosovës. Kemi dalë se jemi të binduna që ne si çika e gra të këtij vendi po jetojmë në gjendje lufte. Shumë prej nesh na mësohet prej fminisë që jeta jonë është në fije të penit. Jetëgjatësia e dinjiteti i trupit e qenësisë tonë varet prej burrave e nji sistemi patriarkal që e sheh qiken e gruan në shërbim të pushtetit mashkullor, qoftë në shpi, qoftë në institucione, qoftë në ekonomi. Kësisoji, na jemi dytsore e të rrezikume prej dhunes ekonomike, përdhunimit, rrahjes, dhunës psikologjike e në fund edhe vrasjes. Krejt kjo vjen prej dhunës patriarkale që ushtrohet përmes dorës së burrave. Prej të njëjtës dhunë mashkullore përdhunohen edhe burrat, siç na u bë e ditun përmes lajmeve që n’burgun e Dubraves 3 burra dhunuan një burrë tjetër. Këto fragmente mund të doken që s’kane lidhje me njana-tjetrën, po në fakt burojnë prej të njëjtit sistem e të njëjtës logjikë që rrah, përdhunon e vret”, ka thënë ajo.

Ministri në detyrë i Punëve të Brendshme, Xhelal Sveçla, ka bërë një deklarata qesharake sot në Gjykatën Themelorë në Prishtinë.

Derisa e ka dhënë fjalën e tij përfundimtare lidhur me rastin ku akuzohet për hedhje të gazit në Kuvendit gjatë vitit 2018, ai ka kërkuar nga gjykata që të marrë një vendim që nuk e dëmton historinë.

Ai ka thënë se është i pafajshëm në këtë rast.

“Për akuzën që më vihet në barrë ndihem i pafajshëm, realisht unë nuk po gjykohem për atë që kam tentuar të bëj, pengimin e personave zyrtarë që të falin tokë, e keqja është se aty isha i pasuksesshëm. Kërkoj nga ju që të merrni vendimin që nuk deformon historinë”, ka thënë Sveçla.

Deputeti i Aleancës, Bekë Berisha, ka folur për vrasjet e fundit në vend.

Për këto tragjedi, ai ka fajësuar edhe institucionet e vendit që merren me siguri.

Në një konferencë për media, ai ka thënë se rastet e fundit kanë qenë të tmerrshme.

“Sot jemi çu të tmerruar me këtë se çka po ndodh në mungesë të institucioneve, po flas në aspektin e sigurisë. Një 17-vjeçar e mbyt një 14-vjeçar me thikë. Një burrë e vret gruan e vet me fëmijë në bark. Një plak 80-vjeçar e vret gruan e vet. Edhe këto janë statistikat e fundit. Nëse i kqyr brenda dy muajve, këto janë tmerruese. Sot, prej këtu, bashkë me kolegët deputetë, i ftoj të gjithë me shku në një protestë në ora 12:00 në sheshin ‘Zahir Pajaziti’, me i mbështetë ata qytetarë, ata prindër që kanë shqetësim për këtë situatë që po ndodh”, ka thënë ai.

Më tej, ai ka treguar se pse po ndodhin këto raste të rënda.

“E pse po ndodh kjo? Po ndodh në mungesë të institucioneve. Të njerëzve të papërgjegjshëm që e kanë zënë peng edhe Qeverinë, edhe Kuvendin, edhe të gjitha institucionet. Ne po duam, vëllezër e motra të dashur, po duam me u faru në komunikacion. Për çdo ditë ka lajme të tmerrshme. Femicidi, pastaj vrasjet kriminale. Kërkush nuk merret me këtë punë, nuk flet për këtë punë ose nuk i lë hapësirë kësaj teme që ne po dojme me u faru si popull”, është shprehur Berisha.

Prezenca e përfaqësues të Ambasadës së ShBA-së dhe të BE-së sot në sallën e Kuvendit të Kosovës, ku deputetët e PDK-së të Aleancës ishin mbledhur sërish, ka nxitur reagime.

Një gjë të tillë, analisti Shenoll Muharremi ka e ka vlerësuar se veprim interesant.

Në profilin e tij në Facebook, ai ka shkruar se ky është një zhvillim me peshë.

“Hmmmmm... zhvillim i ri dhe me shumë peshë”, ka shkruar ai.

Deputetja e PDK-së, Ganimete Musliu, ka kritikuar ashpër VV-në për bllokimin e krijimit të institucioneve të reja.

Në adresimin e saj nga foltorja e Kuvendit, ajo ka folur për sfidat e qytetarëve të Kosovës.

Sipas saj, Kosova është marrë peng nga VV-ja.

“Sot dua të flas për qytetarët që presin zhvillim të politikave për një shërbim më të mirë shëndetësor. Për prindërit që mezi e dalin muajin. Për të riun që kërkon një vend pune me meritokraci. Për bujkun, për punëtorin, për biznesmenin që lufton çdo ditë për ta mbajtur biznesin gjallë dhe me të drejtë pyesin: Çfarë po ndodh me vendin tonë? Dhe përgjigja është e thjeshtë dhe shumë e qartë. Kosova është marrë peng dhe kjo është për turp. Kosova është marrë peng nga një parti e cila erdhi në pushtet me fjalë të mëdha. Kosova është marrë peng nga një parti e cila arriti që shpresën e qytetarëve për një jetë të mirëqenë ta keqpërdorë për ambiciet e veta për pushtet. Kosova është marrë peng nga një parti e cila veç mirëqenien e Kosovës nuk e ka në agjendën e saj”, ka thënë ajo, duke dhënë detaje tjera.

“Dhe kjo parti e ka lënë vendin sot pa institucione.Kjo parti po luan me besimin tuaj, qytetarë të dashur, dhe po luan me durimin e një populli që ka duruar më shumë se ç’duhet. Por çdo durim e ka edhe një fund.Kosova nuk mund të presë më. Nuk mund të presë që politikanë të papërgjegjshëm të qendrojnë mbi ligj e kushtetutë, ndërkohë që jeta e qytetarëve po shënon regres në çdo ditë dhe në çdo sferë”, është shprehur ajo.

Deputetja e Aleancës, Time Kadrijaj, ka akuzuar VV-në për harrimin e rastit të aktivistit Astrit Dehari.

Duke komentuar vizitën e kryeministrit në detyrë në Institutin e Mjekësisë Ligjore, ajo ia ka rikujtuar Kurtit mostrat e humbura të aktivistit të VV-së, i cili ka vdekur para disa viteve në burgun e Prizrenit.

Në profilin e saj në Facebook, ajo ka shkruar se tash drejtësi për Astritin duhet të kërkojë opozita.

“Albin Kurti, dje kish vizituar Institutin e Mjeksisë Ligjore. Sigurisht o interesu edhe për mostrat e Astrit Deharit. Drejtësi për Astrit Deharin tash po kërkojmë ne!”, ka shkruar Kadrijaj.

Aktivisti nga Shqipëria i VV-së, Bojken Abazi, të cilit deputetja Albulena Haxhiu që ushtron edhe pozitën e detyrës së presidentes, ia ka dhënë shtetësinë e Kosovës, kishe bërë një deklaratë skandaloze.

Vite më parë, Abazin, i cili në vitin 2016 ishte dëbuar nga vendi, kishte fyer rëndë të gjithë ata që e konsiderojnë nënë Kosovën.

Në profilin e tij në Facebook, ai kishte shkruar se kush e konsideron "nënë" Kosovën e ka "babë" Serbinë”.

“Ideja e ndryshimit të psikologjisë kolektive në Kosovë nga “Nëna Shqipëri” te krijimi i një nëne të re, pra “Nëna Kosovë”, që lind “kombin” kosovar, e anashkalon faktin se “Nëna Kosovë” ka për “babë” Serbinë, që e ka krijuar idenë e kësaj “nëne” të re nëpër dekada përmes ndarjes së Kosovës nga Shqipëria dhe (për)dhunimit sistemik kolonialist”, kishte shkruar ai në vitin 2016.

Prokurori Avni Namani ka kërkuar dënimin e ministrit në detyrë, Xhelal Sveçla, në rastin gjyqësor për hedhjen e gazit lotsjellës në Kuvendin e Kosovës në vitin 2018.

Në fjalën e tij përfundimtare gjatë seancës që po mbahet sot, ai ka deklaruar bazuar në raportet e ekspertizave, bombola e gazit lotsjellës konsiderohet armë.

Prandaj, sipas tij, zyrtari i VV-së duhet të dënohet.

Në adresimin e tij, ai ka bërë me dije Prokuroria ka hequr dorë nga ndjekja për veprën penale “Pengimi i personit zyrtar në kryerjen e detyrave zyrtare”, për shkak të parashkrimit.

“E ndryshon dispozitivin e aktakuzës, ashtu që tani duhet të jetë, i pandehuri Xhelal Sveçla, në vitin 2018, në sallën e seancave plenare të Kosovës, gjatë mbajtjes së seancës së jashtëzakonshme plenare, ka përdorur armë, bombolën e gazit lotsjellës me përmbajtje të…, në mënyrë frikësuese ndaj deputetëve dhe personave të tjerë në sallë, ashtu që në disa raste gjatë asaj seance e ka aktivizuar bombolën dhe e ka hedhur brenda sallës së seancave plenare pa asnjë paralajmërim paraprak, pa iu lënë atyre mundësi largimi, duke shkaktuar përhapjen e gazit irritues në hapësirën e mbyllur të sallës, në atë mënyrë që personat e pranishëm, nga frika për shëndetin e tyre, janë detyruar që të lëshojnë seancën e Kuvendit dhe seanca është ndërprerë. Ka kryer veprën penale të përdorimit të armës dhe mjetit të rrezikshëm. Prokuroria heq dorë nga vepra për pengim të personit zyrtar për shkak të parashkrimit të kësaj vepre, pjesa tjetër mbetet e njëjtë. Propozoj gjykatës që të pandehurin ta gjejë fajtor dhe ta dënojë sipas ligjit”, tha ai.

Kryeprokurori i Shtetit ka kërkuar sqarime nga Kryeprokurorja e Prokurorisë Themelore në Pejë për rastin e vrasjes së trefishtë në fshatin Gllogjan.

Pasi gjykata ka shpallur të pafajshëm tre të dyshuarit këtë javë, Kryeprokurori i Shtetit ka kërkuar raport me shkrim lidhur me kronologjinë e veprimeve të ndërmarra nga ana e Prokurorisë në Pejë për këtë rast.

“Në bazë të kompetencave të tij ligjore, Kryeprokurori i Shtetit ka kërkuar nga Kryeprokurorja e Prokurorisë Themelore në Pejë raport me shkrim lidhur me kronologjinë e veprimeve të ndërmarra nga ana e Prokurorisë Themelore në Pejë për rastin e vrasjes së trefishtë në fshatin Gllogjan, pasi që Gjykata Themelore në Pejë, më datë 24 gusht 2026, ka marrë aktgjykim lirues ndaj personave të akuzuar për këtë rast”, është thënë në komunikatën për media të Prokurorit të Shtetit.