Ish- Kryeministri i Kosovës, Ramush Haradinaj, ka kujtuar shtatëvjetorin e dorëheqjes së tij nga posti i kryeministrit, duke theksuar se arsyet që e shtynë të marrë atë vendim mbeten të pandryshuara.

Përmes një postimi, Haradinaj rikujtoi se kishte dhënë dorëheqje për herë të dytë nga drejtimi i Qeverisë së Kosovës për t’u paraqitur në Dhomat e Specializuara në Hagë si qytetar dhe jo si kryeministër.

Ai po ashtu përsëriti qëndrimin e tij se Kosovës po i bëhej presion i padrejtë lidhur me çmimin e njohjes nga Serbia, ndërsa theksoi se ndarja e vendit dhe krijimi i një “Dodik Republike” në Kosovë kanë qenë dhe mbeten të papranueshme.

“Qëndrimi im atëherë ishte i qartë dhe i palëkundur. Ai mbetet i njëjtë edhe sot”, ka shkruar Haradinaj.

“Lidhja me Popullin” ka bërë të ditur se është anuluar tubimi i planifikuar për pasditen e së dielës para selisë së Lidhjes Demokratike të Kosovës, i cili ishte paralajmëruar si mbështetje për kryetarin e partisë, Lumir Abdixhiku.

Sipas njoftimit, vendimi është marrë pas një kërkese nga autoritetet e LDK-së, me qëllim që procesi të zhvillohet pa pengesa.

Organizatorët kanë bërë thirrje që shqyrtimi i nismës për shkarkimin e Abdixhikut të zhvillohet në mënyrë demokratike, transparente dhe në përputhje me vullnetin e elektoratit për një LDK të bashkuar dhe të fortë.

Në fund të reagimit, “Lidhja me Popullin” ka falënderuar qytetarët për mirëkuptimin dhe përgjegjësinë e treguar.

Prokuroria Themelore në Mitrovicë ka kërkuar nga Gjykata Themelore caktimin e masës së paraburgimit ndaj të dyshuarit me inicialet B.R., i cili dyshohet për veprat penale “Vrasja në tentativë” dhe “Mbajtja në pronësi, kontroll ose posedim të paautorizuar të armëve”.

Sipas Prokurorisë, ngjarja ka ndodhur të shtunën, kur i dyshuari dyshohet se ka sulmuar me thikë viktimën B.M., duke i shkaktuar disa plagë në kokë, në anën e majtë të brinjëve dhe prapa kraharorit.

Si pasojë e lëndimeve të rënda trupore, viktima po trajtohet në Klinikën e Kirurgjisë Torakale të Qendrës Klinike Universitare të Kosovës.

I dyshuari u arrestua më 18 korrik dhe, me urdhër të prokurorit të shtetit, është ndaluar. Tashmë, Prokuroria ka kërkuar caktimin e paraburgimit, ndërsa vendimi përfundimtar pritet të merret nga Gjykata Themelore në Mitrovicë.

Shumë mërgimtarë nga Kosova kanë mbetur të bllokuar në pikëkalimin kufitar Bajakovë–Batrovc, në kufirin mes Kroacisë dhe Serbisë, duke pritur që nga ora 02:00 për të vazhduar udhëtimin.

Ermina Përlaskaj, këshilltare në Ministrinë e Punëve të Jashtme të Kroacisë, tha për klankosova.tv se pritjet e gjata janë pasojë e fluksit të madh të udhëtarëve gjatë sezonit turistik veror dhe ndërrimit të turistëve gjatë fundjavës, tha për klankosova.tv.

Ajo theksoi se pika kufitare Bajakovë–Batrovc është një nga hyrjet kryesore në zonën Shengen, ndaj autoritetet kroate kryejnë kontrolle të detajuara të dokumenteve, çka rrit kohën e përpunimit dhe shkakton kolona të gjata.

Nënkryetarja e Partisë Demokratike, Vlora Çitaku, ka kritikuar ashpër politikën e jashtme të Qeverisë, duke kujtuar se vendi po vazhdon të izolohet dhe të dëmtojë marrëdhëniet me aleatët strategjikë, ndërkohë që Serbia po e zgjeron bashkëpunimin me Shtetet e Bashkuara të Amerikës.

Në një postim, Çitaku ka përmendur marrëveshjen e re për Dialogun Strategjik ndërmjet SHBA-së dhe Serbisë, e cila, sipas saj, përfshin sektorë të rëndësishëm si inteligjenca artificiale, energjia, gazi i lëngshëm amerikan dhe hulumtimet hapësinore.

Ajo ka akuzuar kryeministrin Albin Kurti se kishte refuzuar bashkëpunimin për gazin e lëngshëm amerikan, duke e cilësuar këtë vendim si pasojë të “kryeneçësisë”.

Çitaku ka përmendur gjithashtu publikimin e një raporti kritik për Kosovën, vetëm disa ditë pas vizitës në vend të këshilltarit të posaçëm të presidentit amerikan Donald Trump. Sipas saj, zhvillime të tilla nuk janë rastësi, por rezultat i mënyrës se si është udhëhequr politika e jashtme e Kosovës gjatë viteve të fundit.

“Këto nuk janë rastësi. Janë pasojë e një politike që e ka zëvendësuar diplomacinë me propagandën, partneritetin me arrogancën dhe interesin shtetëror me kultin e liderit”, ka shkruar ajo.

Nënkryetarja e PDK-së ka thënë se Kosova dikur ishte në qendër të vëmendjes së botës demokratike, ndërsa sot, sipas saj, po rrëshqet drejt periferisë së interesimit të qendrave ndërkombëtare të vendimmarrjes.

Facebook po përballet me probleme teknike që penguan funksionimin normal të platformës për mijëra përdorues në vende të ndryshme të botës.

Sipas platformës “Downdetector”, e cila regjistron raportimet për ndërprerjet e shërbimeve digjitale, numri i ankesave u rrit ndjeshëm rreth orës 10:39, sipas kohës lindore të Shteteve të Bashkuara. Brenda një kohe të shkurtër u evidentuan 3.555 raportime, ndërsa pak minuta më herët ishin regjistruar vetëm pesë raste.

Problemet e raportuara përfshinin pamundësinë për t’u kyçur në llogari, vështirësi në përdorimin e funksioneve kryesore, si dhe pengesa gjatë publikimit të fotografive dhe videove. Disa përdorues deklaruan se nuk mund të dërgonin mesazhe as përmes aplikacionit Messenger.

Ndërprerja duket se ka prekur veçanërisht versionin e Facebook-ut për kompjuter, i cili po rezulton i paarritshëm. Platforma është në pronësi të kompanisë Meta.

Një rast i dhunës në familje është raportuar të shtunën në Podujevë, ku një burrë dyshohet se ka sulmuar fizikisht djalin e tij.

Sipas Policisë së Kosovës, rasti ka ndodhur më 18 korrik 2026, rreth orës 08:00.

I dyshuari dyshohet se e ka goditur viktimën fizikisht dhe me një mjet të fortë. Pas incidentit, ai ka tentuar të hidhej nga kati i dytë i shtëpisë, por veprimi është parandaluar falë ndërhyrjes së njësive relevante policore.

Me vendim të prokurorit, i dyshuari është ndaluar për 48 orë.

Rasti është duke u hetuar nga organet kompetente.

Ushtria amerikane ka njoftuar se ka përfunduar një tjetër valë sulmesh ajrore ndaj Iranit, duke shënuar natën e tetë radhazi të bombardimeve amerikane në territorin iranian, raportoi The New York Times.

Sipas Komandës Qendrore të Shteteve të Bashkuara, CENTCOM, sulmet kishin në shënjestër objekte ushtarake iraniane të vëzhgimit bregdetar dhe të mbrojtjes ajrore, kapacitete detare, si dhe depo për ruajtjen e raketave dhe dronëve.

CENTCOM bëri të ditur gjithashtu se forcat amerikane kishin goditur pjesëtarë të Gardës Revolucionare Islamike të Iranit, të cilët dyshohet se kishin marrë pjesë në sulmet e së premtes ndaj ushtarëve amerikanë në Jordani. Ushtria amerikane nuk dha hollësi të tjera për vendndodhjen apo përmasat e këtyre goditjeve.

Në një deklaratë të publikuar të shtunën, CENTCOM tha se vala e fundit e bombardimeve kishte për qëllim të “ndëshkonte shpejt” forcat iraniane për sulmin ndaj një baze amerikane në Jordani.

Nga ky sulm u vranë dy ushtarë amerikanë, ndërsa një pjesëtar tjetër i forcave amerikane vazhdon të konsiderohet i zhdukur.

Pikat kufitare të Kosovës janë karakterizuar nga qarkullim i qetë gjatë mëngjesit të së dielës, pa kolona të gjata apo vonesa të konsiderueshme për udhëtarët që hyjnë në vend.

Bazuar në të dhënat e Qendrës Kombëtare për Menaxhim Kufitar, pritja më e gjatë është regjistruar në pikëkalimin te Dheu i Bardhë, ku qytetarët po presin deri në 15 minuta.

Në Bërnjak, Han të Elezit, Jarinje dhe Merdarë, koha e pritjes për hyrje në Kosovë arrin deri në 10 minuta.

Ndërkaq, në pikat e tjera kufitare situata paraqitet edhe më e favorshme, me pritje që variojnë nga tri deri në pesë minuta.

Një person është arrestuar nga Policia e Kosovës nën dyshimin se ka sulmuar me thikë një person tjetër në Mitrovicën e Jugut.

Sipas njoftimit të policisë, incidenti dyshohet se ka ndodhur rreth orës 01:30. Si pasojë e sulmit, viktima ka pësuar lëndime trupore dhe fillimisht është dërguar për trajtim në Spitalin Rajonal të Mitrovicës.

Për shkak të gjendjes shëndetësore, i lënduari është transferuar më pas në Qendrën Klinike Universitare të Kosovës për trajtim të mëtejshëm.

Gjatë këqyrjes së vendit të ngjarjes, hetuesit kanë sekuestruar një thikë, e cila dyshohet se është përdorur në sulm.

I dyshuari është intervistuar dhe, me vendim të prokurorit kompetent, është dërguar në mbajtje për 48 orë.

Rasti është cilësuar si “vrasje në tentativë”, ndërsa Sektori Rajonal i Hetimeve po vazhdon veprimet për sqarimin e plotë të rrethanave.