Policia e Kosovës ka ndërmarrë masat e nevojshme të sigurisë për mbarëvajtjen e marshit solidarizues paqësor që do të mbahet sot, më 12 shtator, duke filluar nga ora 14:00.

Sipas Policisë, marshi do të zhvillohet në sheshet kryesore “Zahir Pajaziti”, “Nëna Terezë” dhe “Skënderbeu”, ndërsa qëllimi i masave policore është garantimi i sigurisë së pjesëmarrësve, qytetarëve dhe pjesëmarrësve të tjerë në komunikacion.

Policia ka njoftuar se do të angazhojë njësi të ndryshme policore për të garantuar rendin dhe qetësinë publike, si dhe për të siguruar që marshi të zhvillohet pa incidente.

Për shkak të lëvizjes së pjesëmarrësve, pritet të ketë kufizime dhe ndërprerje të përkohshme të qarkullimit në disa nga rrugët e prekura nga aktiviteti. Njësitë e trafikut do të jenë të angazhuara për të orientuar qarkullimin, në rast se paraqitet nevoja për përdorimin e rrugëve alternative.

Sipas planifikimit policor, rrugët që pritet të bllokohen për qarkullim janë “Agim Ramadani”, “Luan Haradinaj” dhe “Enver Zymberi”. Policia ka bërë të ditur se, varësisht nga nevojat operative, mund të ketë ndërprerje të përkohshme të qarkullimit edhe në rrugë të tjera.

Në fund, Policia u ka bërë thirrje qytetarëve dhe pjesëmarrësve në marsh që të respektojnë udhëzimet e zyrtarëve policorë, të tregojnë kujdes dhe të kontribuojnë që aktiviteti të zhvillohet në mënyrë të qetë dhe të sigurt.

Një grua ka vdekur në Fushë-Kosovën pasditen e së premtes.

Sipas policisë së Kosovës, ajo është gjetur e shtrirë në tokë, ndërsa për rastin kanë nisur hetimet.

“Fushë Kosovë, 11.09.2026-19:57. Polica është njoftuar se një person femër kosovare është e shtrirë në tokë, njësitë relevante duke përfshirë edhe ato mjekësore kanë dalë në vendngjarje të cilët kanë konstatuar se vdekjen e viktimës. Trupi i pajete është dërguar ne IML”, thuhet në njoftim.

Kryetari i Aleancës, Ardian Gjini, ka bërë thirrje për pjesëmarrje masive në “Marshin për Liri”, i cili mbahet sot në Prishtinë.

Marshi do të nisë nga sheshi “Skënderbeu”, duke filluar nga ora 14:00, ndërsa Gjini u ka bërë thirrje qytetarëve që t’i bashkohen kësaj ngjarjeje për të përcjellë, siç ka thënë ai, një mesazh të fuqishëm në një moment të rëndësishëm për vendin.

Përmes një postimi në Facebook, Gjini ka ftuar qytetarët që të mblidhen së bashku dhe të marrin pjesë në marsh.

“Sot është dita që të bëhemi bashkë në Prishtinë. Ju ftoj që në ora 14:00 të mblidhemi në sheshin ‘Skënderbeu’ për të ecur krah për krah në Marshin për Liri. Aty do të bashkojmë zërin tonë për të përcjellë mesazhin më të mirë e më të fuqishëm që Kosova mund të japë sot në këtë moment të rëndësishëm”, ka shkruar Gjini.

“Marshi për Liri” organizohet në mbështetje të ish-krerëve të Ushtrisë Çlirimtare të Kosovës, Hashim Thaçi, Kadri Veseli, Rexhep Selimi dhe Jakup Krasniqi, të cilët po përballen me proces gjyqësor në Hagë.

Trafiku urban dhe parkingu te Pallati i Rinisë gjatë ditës së sotme do të jenë falas.

Kështu ka njoftuar kryetari i Prishtinës, Përparim Rama, derisa tha se Prishtina mirëpret të gjithë qytetarët në Marshin për Liri.

“PRISHTINA MIRËPRET TË GJITHË QYTETARËT NË MARSHIN PËR LIRI!

Kryeqyteti gjithmonë do të mbetet shtëpia e dinjitetit dhe e zërit për drejtësi.

Sot, transporti urban në Kryeqytet ështa FALAS!

Parkingu te Pallati i Rinisë, Falas!

Mirë se vini në Prishtinë!”, ka thënë ai.

Nesër në vendin tonë moti pritet të jetë pjesërisht i vranët, ndërsa të dielën kryesisht me diell.

IHMK ka njoftuar se temperaturat pritet të ndryshojnë gjatë fundjavës.

E shtunë, 12 shtator 2026

Gjatë ditës së shtunë, në Kosovë pritet mot pjesërisht i vranët, me intervale të shkurtra me diell. Në disa pjesë të vendit, sidomos gjatë pjesës së dytë të ditës, priten riga shiu, kryesisht me karakter lokal.

Temperaturat minimale do të lëvizin nga 10 deri në 15°C, ndërsa temperaturat maksimale nga 20 deri në 25°C.

Do të fryjë erë nga veriperëndimi, me shpejtësi 1–7 m/s.

E diel, 13 shtator 2026

Të dielën, moti do të jetë kryesisht me diell dhe vranësira të shpërndara, pa reshje të theksuara.

Temperaturat minimale do të lëvizin nga 11 deri në 15°C, ndërsa temperaturat maksimale nga 22 deri në 24°C.

Era do të fryjë nga verilindja, me shpejtësi 1–5 m/s.

Altin Krasniqi, djali i Jakup Krasniqit, i ka kushtuar disa vargje emocionuese babait të tij, vetëm pak ditë para shpalljes së vendimit në Hagë.

Në dedikimin e tij, ai rikujton vitet që babai i tij ka kaluar në paraburgim, duke shprehur shpresën për drejtësi dhe liri. Përmes vargjeve, Altini vë në pah qëndrueshmërinë, dinjitetin dhe besnikërinë e të atit ndaj idealeve të tij, pavarësisht viteve të gjata në paraburgim.

“Sytë e lodhur, por kurrë të dorëzuar.Rrudhat u shtuan, por mendja kurrë nuk u plak.Rruga që zgjodhe nuk ishte e lehtë, por ëndrrën për një Kosovë të lirë e bëre realitet.”

Duke iu referuar datës 16 shtator, Altin Krasniqi shpreh besimin se vendimi do të sjellë drejtësi për babain e tij dhe bashkëluftëtarët.

“Më 16 shtator, nëse do të ketë drejtësi, ti, bashkë me shokë, do të jetoni në liri. Më 16 shtator bëhen 16 vite, 2 muaj e 1 ditë burg, vetëm pse atdheun e deshe më shumë se veten”

Platforma “Liria ka Emër” ka ftuar krerët institucionalë dhe partiakë që t’i bashkohen marshit të madh për liri, i cili do të mbahet më 12 shtator në përkrahje të çlirimtarëve të Kosovës.

Organizatorja e platformës, Eliza Hoxha, ka konfirmuar në emisionin “Rubikon” se ftesa u është drejtuar të gjithë krerëve institucionalë dhe partiakë, por deri më tani nuk kanë marrë konfirmim për pjesëmarrje nga të gjithë.

“Ne i kemi ftuar të gjithë sikur në çdo marsh. Ftesa ka qenë publike, por u ka shkuar edhe të gjitha institucioneve dhe krerëve institucionalë e partiakë, të gjithëve me email, me mundësinë që të vijnë në marsh dhe mund të adresohen nëse dëshirojnë”, ka thënë Hoxha.

Sipas Hoxhës, Bedri Hamza dhe Ardian Gjini e kanë konfirmuar pjesëmarrjen si folës në marsh. Në mesin e folësve pritet të jenë edhe vajza e dëshmorit Bajram Selmani, vajza e Salih Mustafës – Calit, Buna, si dhe Hysni Gucati, në emër të organizatave të dala nga lufta.

Amir Rrahmani ka njoftuar se nuk do të jetë më pjesë e kombëtares së Kosovës.

Kapiteni i Kosovës e ka bërë të ditur vendimin përmes një postimi në rrjetet sociale, duke njoftuar se pas dhjetë vitesh të kaluara me Kosovën, shtatë prej tyre si kapiten, ka vendosur t’i japë fund aventurës së tij me fanellën dardane.

Rrahmani numëron 67 paraqitje me Kosovën, ndërsa ka shënuar shtatë gola. Ai e ka bartur shiritin e kapitenit në 42 ndeshje, kurse debutimin e kishte bërë në vitin 2014.

Një ditë para “Marshit për Liri”, Lutfi Haziri nga Lidhja Demokratike e Kosovës ka publikuar një pjesë të dëshmisë së ish-presidentit Ibrahim Rugova, të dhënë në Hagë gjatë procesit gjyqësor kundër ish-presidentit serb, Slobodan Millosheviq.

Në pjesën e publikuar nga Haziri, Rugova flet për krijimin e Ushtrisë Çlirimtare të Kosovës. Sipas tij, UÇK-ja u krijua nga populli dhe patriotët, në kohën kur kishte nisur sulmi ushtarak ndaj Kosovës.

“Ajo ka qenë një organizatë që është krijuar nga populli, nga patriotët, kur ka filluar sulmi ushtarak mbi Kosovën, dhe kanë luftuar për lirinë e Kosovës.”

Kryetari i Partisë Demokratike të Kosovës, Bedri Hamza, u ka bërë thirrje qytetarëve që t’i bashkohen “Marshit për Liri”, i cili do të mbahet nesër në sheshin “Skënderbeu” në Prishtinë, në mbështetje të Hashim Thaçit, Kadri Veselit, Jakup Krasniqit dhe Rexhep Selimit, të cilët po mbahen në Hagë.

Përmes një video-adresimi, Hamza ka kërkuar pjesëmarrje sa më masive në këtë marsh, me synimin që ai të jetë më i madhi i organizuar ndonjëherë në Kosovë.

“Le ta shohë bota një popull që nuk e harron të kaluarën e vet, që nuk i braktis ata që i dhanë formë lirisë së tij dhe që nuk hesht kur tentohet të rishkruhet historia e tij. Më 16 shtator, presim vendimin lirues. Por nesër, flet populli. Në orën 14:00, në sheshin “Skënderbeu”, të qëndrojmë të gjithë bashkë. Për të vërtetën. Për lirinë. Për Kosovën! Për UÇK-në! Ju presim në shesh!”, tha kryetari i PDK-së.

Në adresimin e tij, Hamza theksoi se liria nuk përfaqëson vetëm një moment të së kaluarës, por edhe një përgjegjësi që duhet të mbrohet vazhdimisht.

“Çdo brezi, të paktën një herë gjatë jetës, i kërkohet të dëshmojë se çfarë kujton, çfarë vlerëson dhe për çfarë është i gatshëm të qëndrojë. Nesër është momenti ynë. Është momenti i secilit prej jush. Nesër, Kosova duhet të ngrihet në këmbë, e bashkuar, si një trung i vetëm”, tha Hamza.