Një sulm masiv rus me bomba në qendër të qytetit Sumy të Ukrainës la të vrarë të paktën tre njerëz të premten dhe disa të tjerë pësuan lëndime, përfshirë disa fëmijë, tha guvernatori rajonal, Oleh Hryhorov.

Edhe zona të tjera në rajonin Sumy dhe në juglindje të Ukrainës, më afër vijave të frontit, u ballafaquan me sulme ruse dhe gjithsej u vranë gjashtë njerëz, raporton agjencia e lajmeve “Reuters”.

Guvernatori tha se të lënduarit po transportoheshin në spitale, përfshirë një fëmijë 13-vjeçar në gjendje serioze.

Rajoni Sumy, që është pothuajse vazhdimisht i sulmuar nga forcat ruse, ndodhet në kufirin me Rusinë. Moska në muaj e fundit është munduar që të zgjerojë një zonë neutrale në rajon.

Numri i të vdekurve nga dy tërmetet e forta në Venezuelë javën e kaluar ka shkuar në 2.645, tha të premten Ministria e Informimit.

Sipas kësaj ministrie, Më shumë se 12 mijë të tjerë kanë pësuar lëndime dhe 15 mijë njerëz kanë mbetur të pastrehë si pasojë e kësaj katastrofe, raporton agjencia e lajmeve "Reuters".

Vendet e huaja, përfshirë Shtetet e Bashkuara, i kanë ofruar ndihmë Venezuelës për t’u përballur më lehtë me pasojat që i kanë lënë tërmetet.

Të premten po zhvillohet ndeshja e radhës për Kupën e Botës në futboll, ajo mes Australisë dhe Egjiptit.

Kjo ndeshje në Kosovë po transmetohet nga TV Vala dhe loja aktualisht është në shtesë, sepse rezultati në kohën e rregullt ishte baras, 1 me 1.

Në një moment gjatë komentimit, komentuesit të ndeshjes iu ngatërruan një qytet dhe një shtet i Shteteve të Bashkuara, ku po zhvillohet ndeshja.

“60 minuta lojë në Dallas… Në Teksas, pardon” – tha komentuesi, emri i të cilit, për fatin e tij, për momentin nuk po i kujtohet gazetarit të “Nacionales”.

Pak gjeografi:

Shtetet e Bashkuara janë federatë. Ato përbëhen nga 50 shtete.

Teksasi është shtet i Shteteve të Bashkuara dhe shtrihet në pjesën jugore të tyre, në kufirin me Meksikën.

Teksasi është shteti i dytë më i madh i ShBA-së për nga sipërfaqja, pas Alaskës. Është më i madh se Franca.

Në Teksas, më saktësisht në pjesën verilindore të tij, ndodhet qyteti Dallas. Sidoqoftë, ndeshja mes Australisë dhe Egjiptit nuk po zhvillohet në këtë qytet, prandaj komentuesi i ndeshjes në TV Vala u detyrua që ta përmirësonte veten.

Ndeshja po zhvillohet në stadiumin “AT&T Stadium” në qytetin Arlington, i cili gjithashtu ndodhet në Teksas, rreth 30 kilometra larg Dallasit.

Ekipet e shpëtimit po e vazhdojnë edhe në orët e natës kërkimin për të moshuarin 78-vjeçar nga Prishtina, Xhafer Raçi.

Në një fotografi të siguruar nga gazeta “Nacionale” shihen punëtorët e shpëtimit duke u përgatitur për kërkim natën, me ndihmën e ndriçimit artificial.

Fotografi i Nacionales i ka parë ekipet e kërkim-shpëtimit duke kërkuar nëpër Prishtinë edhe gjatë ditës afër Rrugës “Sali Abazi”.

Sipas familjarëve, i moshuari u largua të enjten rreth orës 08:00 nga shtëpia dhe nuk dinë më asgjë për vendndodhjen e tij.

Familjarët kanë bërë të ditur se e kanë raportuar rastin në Policinë e Kosovës dhe se i moshuari vuan nga demenca.

Ata kanë kërkuar që kushdo që ka ndonjë informatë për vendndodhjen e familjarit të tyre, të lajmërohen në numrin e telefonit: +383 44 737 900.

Shqipëria e ka hapur Shkollën Kombëtare të Fluturimit, e cila synon të shërbejë edhe si qendër rajonale trajnimi për pilotë dhe kontrollorë fluturimi.

Në ceremoninë e mbajtur në Komandën e Forcës Ajrore në Rinas, kryeministri Edi Rama tha se Tirana do ta ftojë edhe Kosovën, nëse ka interes që pjesëtarët e saj të trajnohen dhe certifikohen në këtë shkollë. Sipas tij, e njëjta mundësi do t’u ofrohet edhe vendeve të tjera fqinje që janë anëtare të NATO-s.

Forca e Sigurisë së Kosovës aktualisht nuk ka aeroplanë apo helikopterë ushtarakë, por pjesëtarët e saj janë dërguar më parë në trajnime ndërkombëtare për pilotë, përfshirë edhe në Shqipëri.

Qeveria shqiptare e ka cilësuar hapjen e shkollës si pjesë të modernizimit të Forcës Ajrore dhe forcimit të kapaciteteve mbrojtëse. Ministri i Mbrojtjes, Ermal Nufi, tha se programi do të përgatisë pilotë dhe kontrollorë fluturimi sipas metodologjive të NATO-s.

Në programin e parë do të përfshihen 25 kandidatë. Forca Ajrore Shqiptare pritet të nxjerrë nga pesë pilotë të trajnuar në vit, për pesë vitet e ardhshme. Shkolla do të përgatisë edhe personel teknik për mirëmbajtjen e dy helikopterëve mësimorë Bell 505.

Rama tha se projekti është realizuar me mbështetjen e kompanisë izraelite “Elbit Systems”, të cilën e përmendi si një prej aktorëve të rëndësishëm në industrinë ushtarake. Sipas tij, pilotët që do të dalin nga kjo shkollë do të kenë aftësi për të shërbyer edhe në kuadër të NATO-s.

Qeveria shqiptare ka rritur së fundmi buxhetin për mbrojtje me rreth 110 milionë euro shtesë, me synimin që financimi i sektorit të arrijë në 2.6 për qind të Prodhimit të Brendshëm Bruto. Rama paralajmëroi gjithashtu shtimin e helikopterëve Black Hawk nga Shtetet e Bashkuara, pa dhënë numër të saktë.

Shqipëria synon të zgjerojë kapacitetet e saj ushtarake edhe përmes Shkollës Kombëtare të Forcave Speciale, e cila po ashtu planifikohet të hapet në bashkëpunim me “Elbit Systems” dhe të jetë e hapur për Kosovën dhe vendet aleate të rajonit.

Ndeshja mes Meksikës dhe Anglisë në Kupën e Botës në futboll, e planifikuar për të dielën në mbrëmje, raportohet se do të luhet disa orë më herët, në mesditë sipas kohës lokale në Meksikë, raportuan të premten mediat lokale të shtetit organizator.

Televizioni BBC raporton se ndeshja pritet të zhvillohet të dielën nga ora 20:00 sipas kohës lokale në Kosovë (19:00 në Britani).

Ndeshja e 1/16-ës së finales do të luhet në stadiumin “Estadio Azteca”, raporton agjencia e lajmeve “Reuters”. Meksika, bashkë me Shtetet e Bashkuara dhe Kanadanë, është njëra nga organizatoret e Kupës së Botës këtë vit.

Loja mes Meksikës e Anglisë fillimisht ishte planifikuar të fillonte në orën 18:00 sipas kohës lokale, por ndeshjes i është ndërruar orari për shkak të rrezikut nga stuhitë, raportuan mediat meksikane, duke cituar burime me njohuri rreth çështjes.

Meksika e ka eliminuar Ekuadorin në rundin paraprak me rezultat 2 me 0, ndërsa Anglia e ka mposhtur Republikën Demokratike të Kongos me rezultat 2 me 1.

Kur shteti nis e sillet xhandarçe me prodhuesit vendorë, ai po luan lojëra marrëzie që një ditë do t’i sjellin veçse trofe e çmime marrëzie. Ekonomia albinkurtiste funksionon me çykë zori kështu: shtresa shoqërore gjithnjë e më të varura nga sadaka që merret nga thesari publik e nga rëndimi i taksave. Por ky shfrytëzim vampirik i atij që punon e që paguan taksa herët a vonë do t’i shkatërrojë themelet ekonomike të vendit. Albini e mbajti besën vetëm për një gjë: e paramendoi Kosovën të varfër, e bëri Kosovën të varfër e për gjynah. Dikur imagjinata e tij, e shprehur në manifeste e traktate brenda partisë, shkonte deri atje sa kërkonte hapjen e kuzhinave popullore tek të cilat fshatarët do të sillnin me bidona qumësht të freskët. Kur të mbërrijmë në ato nivele mbijetese sa edhe ushqimi të duket si i racionuar, duhet t’ia kujtojmë vetes se u bëmë bashkëpunëtorë vullnetarë të ligësisë duke operuar me të njejtën logjikë si lleftistët. Shahet e urrehet i vyeri e ndërmarrësi, rëndohet samari i taksapaguesit, përfitojnë badihavxhinjtë.

Col Mehmeti

Ligjërisht shteti gjithmonë është në të drejten e vet supreme që të trokasë te dera me inspektorë.

Rrapëllima e këpucëve të inspektorëve kah ngjitën shkallëve vërtet është e pakëndshme përballë një rutine të qetë pune.

Dhe prapë shteti është i absolvuar nga çfarëdo faji përderisa hapëron me mandatin e tij.

Kështu shfaqet kudo polariteti mes shtetit inspektues që do të gjejë një tojë të palidhur, një shkarje çfaredo, dhe një kompanie që duhet të jetë ne terezi me dokumentacion.

Etikisht është tërbuese e revoltuese kur për pak momente inspektimit i luhen penjtë nga një vullnet destruktiv i partisë-shtet që luftën e madhe e ka me biznesin e shpirtin ndërmarrës.

Albinkurtistët e kanë shitur në shoqëri dhe shoqëria e ka shitur te albinkurtistët urrejtjen e egër kundrejt çdo modeli të suksesshëm në biznes e ndërmarrësi.

Kjo luftë ideologjike mban pankartën ‘Eat the rich’ dhe shkakton sa hap e mbyll sytë panik kolektiv kurdo që luan me fjalët ‘oligark’ e ‘oligarkë’.

Në vitin 2014, Albin Kurti e kapi për kapistre si mushkën partinë e tij dhe e detyroi të bëhej pjesë e një koalicioni siç mendohej asohere të besëlidhej me LDK-në, Aleancën e Nismën.

Kur Albinin e pyetën të tijët se cili ishte hajri i kësaj pune – pra të bëheshin aleatë me armiqtë e tyre – ai do t’iu përgjigjjej: “Neve nuk na duhen ministri e poste. Do të këmbëngulim vetëm për ATK-në se me të i shkatërrojmë bizneset e PDK-së”.

Pra, këtu është banaliteti i një filozofie që sot gjen zbatim me shtetin që është në dorën e atyre që nga 2014 deri më 2016 e bënë terrorizmin mjet legjitim të arritjes së qëllimeve politike.

Administrata tatimore kthehet në një levë ideologjike antikapitaliste me të cilën qërohen hesapet me këdo që ka një bazë të pavarur.

Cilido biznes shihet si “i PDK-së” dhe i “atyre”, ndonëse VV-në e sollën në pushtet jo pak edhe dhurimet e bëra nga po të njejtat biznese.

Imazhet më të gënjeshtërta janë zakonisht ato që qetësojnë një pjesë të madhe të hallkut.

Imazh i tillë është kur e përfytyrojmë ‘oligarkun’ që vetëm majmet në pasuri të pafundme.

Dhe përballë tij janë qindra, mijëra njerëz, mbase një shumicë, që janë në shpirt oligarkë e arrivista të gubtë, por thjesht janë zero me xhufkë kur vjen puna për guxim, kreativitet e risimtari.

Noli dikur e kishte kapur fare mirë këtë kur thoshte se këtupari “bujku është më bej se beu”.

Në një botë që shpërblen gjithmonë kreativitetin e guximin, një masë e madhe lakmitare që bëhet sikur nuk e do kamjen nuk i këmben rolet edhe sikur të sjellë në fuqi një regjim ‘ndëshkues’.

Në më të mirën e vet, një regjim si VV-ja ia del mbanë vetëm në shkatërrimin e atij pak bereqeti prodhimtar të vendit siç ka bërë me mbylljen e mijëra bizneseve të vogla dhe afiksimin e bizneseve të mëdha.

Megjithëse kjo marrëzi e përplasi vendin në krahët e importeve të frikshme, kurrë më shumë se sot nuk ka pasur të ‘kënaqur’.

Paraja publike harxhohet në një sistem mortifikues sadake.

Mirëmbahen kategori vampirike të atyre që nuk paguajnë nga xhepat e atyre që janë taksapagues.

Është gabim të thuhet se Kurti nuk e mbajti besën e dhënë për vizionin e tij ekonomik.

Paradoksalisht, ai është i pari që e sheh Kosovën ashtu siç e mendoi.

Në traktatin e tij të çmendurisë, të shkruar më 2016, vizioni partiak për ekonominë përmblidhej e bardha në të zezë kështu:

“Kuzhinat popullore për të varfërit (edhe duke grumbulluar ushqimin që hidhet nga restoranet) dhe biznesi i rrjetit të shpërndarjes për qumështin e freskët nga blegtorët e komunës (në bashkëpunim me Drejtorinë e Bujqësisë) janë të nevojshme.”

Këtu nuk shfaqej një ide shumëplanëshe që prodhuesit e qumështit të ndihmoheshin nëpërmjet politikave të duhura fiskale.

Mosdija ekonomike kompensohej me fantazinë e lirë ku mjafton të kesh një lopë cicëpjellore e një bidon e qumështin ta çosh hazër në pikat që bëjnë mbledhjen e tij.

Albin deshët, Albin morët!

Një vajzë me inicialet A.Gj. ka humbur jetën, teksa ndodhej në bregdet për pushime me familjen.

Ngjarja ka ndodhur në plazhin Porto Novo, i njohur ndryshe si një nga plazhet e rrezikshme për shkak të rrymave.

29-vjeçarja kishte qenë duke pushuar në këtë zonë, ku ndodhet edhe një tabelë që paralajmëron rrezikun nga rrymat detare.

Shoqata e prodhuesve të qumështit mbajti një takim urgjent me anëtarësinë për të diskutuar situatën e krijuar pas ndërprerjes së grumbullimit të qumështit të freskët nga fermat e tyre nga qumështorja VITA.

Gjatë takimit, kërkesa kryesore e anëtarëve ishte organizimi i një takimi të menjëhershëm me përfaqësuesit e qumështores, me qëllim që të gjendet një zgjidhje dhe të rifillojë sa më shpejt grumbullimi i qumështit.

Sipas informacioneve të prezantuara në takim, kërkesa kryesore e qumështores është përfundimi dhe publikimi sa më i shpejtë i rezultateve të mostrave të marra, si kusht për rifillimin e grumbullimit.

Për këtë arsye, Shoqata e Prodhuesve u bën thirrje urgjente Ministrisë së Bujqësisë, respektivisht Agjencisë së Ushqimit dhe Veterinarisë, që të përshpejtojnë procedimin e rezultateve, në mënyrë që të mundësohet dorëzimi i qumështit të freskët dhe të shmangen humbjet eventuale të sasisë së prodhuar, veçanërisht duke pasur parasysh temperaturat e larta që po mbizotërojnë.

Shoqata paralajmëron se, nëse situata nuk zgjidhet me urgjencë, do të jetë e vështirë të shmangen protestat eventuale të fermerëve.

Gjykata e Lartë në Serbi ia ka caktuar 30 ditë paraburgim shtetasit të Kosovës, Osman Selmani, i arrestuar më 1 korrik nga policia e Serbisë.

Ministria e Punëve të Brendshme e Serbisë njoftoi se Selmani u arrestua në pikëkalimin kufitar në Mutivodë, nën dyshime për krime lufte.

“Ekzistojnë dyshime të bazuara se më 14.06.1999, në vendin Sofali, Prishtinë, në bashkëkryerje me disa pjesëtarë të UÇK-së, me armë të ftohta dhe armë zjarri, në mënyrë mizore dhe tinëzare, ua ka marrë jetën civilëve të nacionalitetit serb, çiftit bashkëshortor Vlladimir dhe Persa Stanisavljeviq”, thuhet në njoftimin e MPB-së të Serbisë.

Osman Selmani është arrestuar para dy dite, më 1 korrik, në pikën kufitare në Mutivodë, teksa po kthehej në vendlindje.

Ndërsa familjarët e tij në menyrë kategorike i kanë hedhur poshtë këto pretendime të autoritetëve serbe.

Reagimi nga familja e të arrestuarit.

"Ju njoftojmë se babai ynë, Osman Selmani, është arrestuar më 01.07.2026 në pikën kufitare Mutivodë, teksa po kthehej nga vendlindja e tij. Aktualisht, ai ndodhet në Prokurorinë për Krime Lufte në Beograd, përballë akuzave të cilat ne, si familje, i konsiderojmë të pabazuara dhe të pavërteta. Ne besojmë në pafajësinë e tij dhe do të qëndrojmë pranë tij deri në zbardhjen e plotë të së vërtetës. Kemi besim se drejtësia do të mbizotërojë dhe e vërteta do të dalë në pah.Ju falënderojmë nga zemra për çdo mbështetje, lutje dhe fjalë inkurajuese në këto momente të vështira për familjen tonë".