Prokuroria Speciale ia ka kthyer telefonin e konfiskuar Shkëlzen Gashit, ish-këshilltarit të kryeministrit Albin Kurti, njoftoi të mërkurën avokati i tij Arianit Koci.

Gashi ndodhet nën hetime për nxitje të përçarjes, lidhur me ekspozitën për krime lufte në sheshin "Nënë Tereza" në mars.

"Laptopi dhe telefoni i janë kthyer nga Prokuroria Speciale. Pres që edhe rasti me u mbyllë shpejt", shkroi avokati Koci.

Albin Kurti i Vetëvendosjes, ushtrues detyre i kryeministrit, ka pritur në takim Zv/Ndihmës Sekretarin e Përgjithshëm për Partneritete në NATO, të cilit, sipas asaj çka tha Zyra e Kryeminstrit, i ka shpjeguar “konceptin” dhe “nevojën” për krijimin e Xhandarmërisë së Kosovës.

”U diskutua gjithashtu për themelimin e Xhandarmërisë së Kosovës, ku në pyetjen e z. Hamilton, kryeministri në detyrë Kurti shpjegoi konceptin dhe theksoi nevojën e kësaj strukture në forcimin e sigurisë dhe koordinimit me KFOR-in dhe NATO-n në këtë drejtim”, thuhet mes tjerash në komunikatë.

Komunikata:

Kryeministri në detyrë Kurti priti në takim Zëvendës Ndihmës Sekretarin e Përgjithshëm për Partneritete në NATO, ambasadorin Hamilton

Prishtinë, 20 maj 2026

Kryeministri në detyrë i Republikës së Kosovës, Albin Kurti, u takua me Zëvendës Ndihmës Sekretarin e Përgjithshëm për Partneritete në NATO, ambasadorin Kevin Hamilton, në vizitën e tij të parë në vendin tonë.

Gjatë takimit biseduan për thellimin e bashkëpunimit me NATO-n. Kryeministri në detyrë Kurti foli për zhvillimet në vend, përfshirë ato në fushën e teknologjisë dhe të mbrojtjes, si dhe për prodhimin e municionit në Kosovë.

Po ashtu, biseduan për marrëdhëniet e mira me NATO-n, sigurinë në rajon dhe në Kosovë, si dhe zhvillimet politike aktuale.

U diskutua gjithashtu për themelimin e Xhandarmërisë së Kosovës, ku në pyetjen e z. Hamilton, kryeministri në detyrë Kurti shpjegoi konceptin dhe theksoi nevojën e kësaj strukture në forcimin e sigurisë dhe koordinimit me KFOR-in dhe NATO-n në këtë drejtim.

Kryeministri në detyrë, Albin Kurti, ka njoftuar se e ka emëruar së këshilltare të tij Shqipe Mjekiqi, e cila dikur ishte nënkryetare e LDK-së.

Kreu i qeverisë ka bërë me dije se ajo do të kontribuojë me ekspertizën e saj në politikë të jashtme dhe marrëdhënie ndërkombëtare.

“Në ekipin tim si Kryeministër, nga sot u bashkua Shqipe Mjekiqi, për të kontribuar me ekspertizën e saj në politikë të jashtme dhe marrëdhënie ndërkombëtare. Ishte kënaqësi të bashkëbisedojmë mbi nevojat e Kosovës në rrugën e saj drejt anëtarësimit në BE dhe NATO, të arriturat tona socio-ekonomike dhe vlerat demokratike, zhvillimet politike në vendin tonë e në rajon dhe situatën e sigurisë”, ka shkruar ai, duke dhënë detaje tjera.

“Shqipe Mjekiqi ka mbaruar studimet e doktoraturës në Shkenca Politike në Trinity College Dublin, Masterin në politikat e Bashkimit Evropian në London School of Economics dhe studimet bazë në Shkenca Politike në Universitetin e Prishtinës”, ka shkruar ai.

Kur Lumir Abdixhiku ishte zgjedhur në krye të LDK-së, Shqipe Mjekiqi ishte emëruar nënkryetare e LDK-së.

Në mars të vitit 2023, Mjekiqi kishte njoftuar se ishte larguar nga LDK-ja.

ka dhënë dorëheqje të martën nga pozita e nënkryetares dhe anëtares së kryesisë së Lidhjes Demokratike të Kosovës (LDK).

Kryetari i Gjakovës, Ardian Gjini, ka reaguar ndaj rastit të publikuar në emisionin investigativ “Piranjat”, ku drejtoi i një shkolle në Gjakovë tregonte sjellje të pahijshme me nxënësen.

I pari i Gjakovës ka bërë me dije se veprimet e tilla janë të papranueshme dhe thellësisht të rënda.

Në profilin e tij në Facebook, ai ka shkruar se siguria, dinjiteti dhe mbrojtja e fëmijëve janë vija të kuqe të pakontestueshme.

“Dënoj me ashpërsinë më të madhe aktin e papranueshëm dhe thellësisht të rëndë të shfaqur në emisionin investigativ "Piranjat". Siguria, dinjiteti dhe mbrojtja e fëmijëve tanë janë vija të kuqe të pakontestueshme për institucionet tona, mbi të cilat nuk ka dhe nuk do të ketë kurrë asnjë kompromis. Në emër të Komunës së Gjakovës dhe në emrin tim personal, distancohem plotësisht dhe pa asnjë rezervë nga ky individ dhe çdo veprim i tij i turpshëm, i cili bie ndesh me moralin njerëzor dhe misionin e shenjtë të arsimit. Personi në fjalë është pezulluar menjëherë nga pozita e drejtorit të shkollës sipas procedurave ligjore në fuqi, ndërsa komuna ka ofruar dhe do të vazhdojë të ofrojë bashkëpunim të plotë e të pakushtëzuar për organet e rendit dhe prokurorinë me qëllim që ky rast të marrë dënimin maksimal ligjor”, ka shkruar ai.

Ai ka bërë me dije se personi në fjalë nuk ka qenë pjesë e strukturave të AAK-së.

“Dua të sqaroj opinionin publik se personi në fjalë nuk ka qenë pjesë e strukturave të Aleancës që nga viti 2021. Megjithatë, si kandidat për Kryeministër dhe nënkryetar i Aleancës, kam kërkuar menjëherë konfirmimin zyrtar nga kryetari i Degës në Gjakovë, Flamur Fetahaj, për të siguruar se ky individ nuk ka asnjë lloj lidhjeje apo angazhimi me ne. Ky le të jetë një mesazh i prerë për secilin që tenton të keqpërdorë emrin dhe logon e Komunës apo të Aleancës për veprime të tilla të turpshme. Dua të siguroj të gjithë qytetarët, prindërit dhe nxënësit se sistemi arsimor në Gjakovë do të mbetet një mjedis i sigurt për fëmijët tanë, dhe kushdo që tenton ta cenojë këtë siguri do të përballet me forcën më të rreptë të ligjit dhe me largim të menjëhershëm nga institucionet tona”, ka shkruar ai.

Bartësja e listës së LDK-së për zgjedhjet e 7 qershorit, Vjosa Osmani, i ka reaguar numrit dy të VV-së, Glauk Konjufca, i cili dje ka fyer profesionin e “frizerkave”.

Ajo ka bërë me dije se asnjë grua që punon nuk duhet të jetë objekt përqeshjeje.

Në profilin e saj në Facebook, ajo ka shkruar se gruaja e lodhur nga puna vlen më shumë se mijëra fjalët tuaja boshe.

“Veç puna e çon përpara Kosovën. Jo urrejtja e përçmimi! Asnjë grua që punon nuk duhet të jetë objekt përqeshjeje! As gruaja në sallon. As gruaja në market. As gruaja në shkollë. As gruaja në spital. As gruaja në zyre. As gruaja në Universitet. As gruaja që mban biznes. As gruaja që mban familje. As gruaja që punon pa u ndalur, edhe kur askush nuk ia sheh mundin. Gratë janë shtylla e Kosovës. Janë heroinat tona të çdoditshme, që punojnë, kujdesen, krijojnë, shërbejnë, rrisin fëmijë, paguajnë taksa, dhe ndërtojnë jetë me djersën e tyre. Gruaja e lodhur nga puna vlen më shumë se mijëra fjalët tuaja boshe”, ka shkruar ajo.

Kandidati për deputet nga PDK-ja, Artan Behrami, akuzoi Lëvizjen Vetëvendosje se nuk është distancuar nga metodat me të cilat, sipas tij, erdhi në pushtet.

"Asnjëherë nuk u distancua nga dhuna politike, nga gazi lotsjellës, nga tentim-atentatet për kauza të rrejshme," deklaroi Behrami gjatë një debati televiziv.

Ai shtoi se premtimet e VV-së kanë mbetur të parealizuara.

"Sot, për të gjitha ato për të cilat kanë protestuar — asnjë nuk është bërë. I njëjti demarkacion, e njëjta fusnotë, e njëjta pako e Ahtisaarit," tha ai.

Ministria e Industrisë, Ndërmarrësisë, Tregtisë dhe Inovacionit njoftoi se ka gjobitur KEDS-in me 40,000 euro, pas konstatimit të parregullsive në njehsorët elektrikë të konsumatorëve.

Vetëm gjatë dy ditëve të fundit, nga 19 njehsorë të verifikuar në laboratorin e Agjencisë së Metrologjisë, 7 kanë rezultuar pa afat vlefshmërie, ndërsa një tjetër është gjetur pa lejim tipi.

Raportet janë proceduar në Inspektoratin Qendror të Mbikëqyrjes së Tregut, i cili shqiptoi gjobat ndaj KEDS-it.

Këshilli për Mbrojtjen e Konsumatorit diskutoi gjithashtu mënyrat e kompensimit të dëmit ndaj konsumatorëve të prekur.

Kryetari i PDK-së, Bedri Hamza, ka vazhduar vizitat nëpër familje të ndryshme.

Familje e radhës që ka vizituar nga ai është familja Hyseni nga Vushtrria.

Ai ka bërë me dije se familjeve kosovare po iu rendohet gjendja çdo ditë.

Sipas tij, Kosova nuk mund të ecë përpara kur familjet mezi e përballojnë muajin.

“Vizitat nëpër familjet tona anekënd Kosovës po tregojnë të njëjtën pamje: njerëz të ndershëm, me vullnet të madh për punë dhe që kanë dhënë shumë për Kosovën, por me brenga e shqetësime që po rëndohen çdo ditë. Edhe në familjen Hyseni në Vushtrri dëgjova të njëjtat halle që sot i kanë shumë familje: çmime dhe tatime të larta, paga të pamjaftueshme dhe shpenzime të mëdha për shëndetësinë që paguhen nga xhepi i tyre”, ka shkruar ai, duke shtuar se kështu Kosova nuk mund të ec përpara.

“Kosova nuk mund të ecë përpara kur familjet mezi e përballojnë muajin. Qytetarët kanë nevojë për një shtet që punon për mirëqenien e tyre, jo për propagandë e kriza të pafundme politike. Me qeverinë tonë, ndryshimi i shumëkërkuar do të vijë për çdo familje të Kosovës”, ka shkruara ai.

Analisti Artan Demhasaj e ka kritikuar kryeministrin në detyrë, Albin Kurti, për pretimet elektorale.

Ai ka bërë me dije se zotimet se Kosova së shpejti do të prodhojë plumba janë propagandë.

Në profilin e tij në Facebook, ai ka shkruar se në zgjedhjet e dhjetorit, sipas Kurtit, Kosova ka prodhuar dronë, kurse tash po premton prodhimin e plumbave.

“Në zgjedhjet e kaluara të 28 dhjetorit prodhuam dronë në Gjilan, tash në zgjedhjet e qershorit po prodhojmë plumba e municion në Gjakove. Imagjinojeni sikur të kishim zgjedhje prapë në vjeshtë – garant do të fillonim të prodhonim tanke, raketa, madje edhe avionë ushtarakë! Çfarë manipulimi dhe çfarë manipuluesi! Pra, tani jemi thjesht në pritje të rrenës së radhës nga Albin Pinokio, baba i gënjeshtrës”, ka shkruar ai.

Asociacioni i Komunave të Kosovës e dërguar në Gjykatën Kushtetuese Rregulloren e Qeverisë Nr. 07/2025 për Procedurën e Pranimit në Shërbimin Civil.

Kjo pasi asociacioni ka vlerësuar se kjo rregullore cenon autonominë lokale dhe përbën ndërhyrje direkte në kompetencat kushtetuese të pushtetit lokal.

Drejtori ekzekutiv i Asociacionit të Komunave të Kosovës, Sazan Ibrahimi, ka vlerësuar se komunat janë më të drejtën e tyre.

“E drejta e vetëqeverisjes lokale është kategori kushtetuese dhe garantohet me Kushtetutën e Republikës së Kosovës, me ligjet në fuqi dhe me Kartën Evropiane për Vetëqeverisjen Lokale. Komunat ushtrojnë kompetencat e tyre vetanake, të zgjeruara dhe të deleguara përmes organeve përfaqësuese dhe në përputhje me parimet e decentralizimit dhe subsidiaritetit. Pushteti qendror ka të drejtë të ushtrojë vetëm kontrollin e ligjshmërisë ndaj akteve komunale, por jo të ndërhyjë në kompetencat kushtetuese dhe autonome të komunave. Çdo veprim që tejkalon këtë kufi përbën cenim të rendit kushtetues dhe të autonomisë lokale”, ka deklaruar ai, raporton EO.

Sipas Ibrahimit, rregullorja në fjalë centralizon procedurat e rekrutimit të stafit komunal dhe redukton autonominë funksionale të komunave.

“Në këtë frymë, Asociacioni i Komunave të Kosovës vlerëson se Rregullorja e Qeverisë Nr. 07/2025 për Procedurën e Pranimit në Shërbimin Civil përfaqëson ndërhyrje të drejtpërdrejtë në kompetencat e komunave, duke centralizuar procedurat e rekrutimit të stafit komunal dhe duke reduktuar autonominë funksionale të pushtetit lokal. Një qasje e tillë bie ndesh me Kushtetutën e Republikës së Kosovës, me parimin e subsidiaritetit dhe me standardet evropiane të vetëqeverisjes lokale”, është shprehur ai.