Deputetja e LDK-së, Hykmete Bajrami, ka kritikuar mënyrën e mbajtjes së mbledhjes së Qeverisë dhe vendimet për ndarjen e mjeteve publike, duke kërkuar që ato të analizohen një nga një.

Përmes një reagimi në Facebook, Bajrami ka thënë se mbledhjet e Qeverisë po mbahen në mënyrë elektronike dhe gjatë natës, ndërsa ka ngritur pikëpyetje për mënyrën dhe shpejtësinë me të cilën, sipas saj, merren vendimet për ndarjen e mjeteve.

“Aq të zënë janë, sa që mbledhjet e Qeverisë i mbajnë elektronike, edhe atë bile natën, me gjuhën e Albinit në terr”, ka shkruar Bajrami.

“Pse, a mos po marrin vendim me i kompensu bujqit? Ata që punojnë ditë e natë që ne ta kemi sofrën plot. Atyre që breshëri ua shkatërroi për pak minuta mundin dhe të ardhurat e një viti të tërë”, ka shkruar ajo.

Bajrami kujtoi se për fermerët e dëmtuar “s’ka asnjë vendim”.

Deputetja e LDK-së ka kërkuar që vendimet e kësaj mbledhjeje dhe mënyra e ndarjes së parasë publike të shqyrtohen veç e veç.

“Vendimet e kësaj mbledhjeje dhe mënyrën se si po ndahet paraja publike duhet të analizohen një nga një”, ka deklaruar Bajrami.

Ajo ka akuzuar se për interesa politike dhe partiake gjenden koha dhe buxheti, ndërsa qytetarët dhe fermerët që punojnë e prodhojnë vazhdojnë të presin.

“Kur është puna për qytetarët e fermerë që punojnë e prodhojnë, ata presin. Deri kur presin?”, ka përfunduar Bajrami.

Një aksident i rëndë trafiku me pasoja fatale ka ndodhur në autostradë, rreth 29 kilometra larg Vërmicës.

Si pasojë, një person ka humbur jetën, ndërsa dy persona të tjerë kanë pësuar lëndime dhe janë dërguar për trajtim mjekësor.

Zëdhënësi i Policisë, Bajram Krasniqi, ka bërë të ditur për Klan Kosova se rasti është raportuar rreth orës 20:27. Sipas tij, në aksident janë përfshirë dy automjete, një kamion dhe një veturë.

"Në aksident janë përfshirë dy automjete (një kamion dhe një veturë). Në vendin e ngjarjes pos njësive policore janë thirrur edhe ekipet mjekësore. Si pasojë e aksidentit, sipas ekipit mjekësor një person është pa shenja jete, kurse dy të tjerë kanë pësuar lëndime dhe janë bartur për trajtim mjekësor."

Shërbimi Meteorologjik i Izraelit ka lëshuar një paralajmërim se gjatë fundjavës priten reshje shiu “tepër të pazakonshme” dhe “të pashembullta” që mund të shkaktojnë vërshime dhe pengesa të tjera.

“Ka gjasa që të përjetojmë një ngjarje shumë domethënëse dhe tepër të pazakonshme të shiut për këtë kohë të vitit” në natën mes së shtunës dhe të dielës, tha Shërbimi Meteorologjik.

Reshjet më të dendura priten përgjatë bregdetit verior, në rajonin Sharon dhe në zonën metropolitane të Tel-Avivit, raporton gazeta “The Times of Israel”.

“Shiu pritet të shoqërohet me shtrëngatë, vetëtimë dhe madje edhe breshër. Vërshimet dhe pengesat urbane janë mundësi reale në qytetet bregdetare për shkak të intensitetit të shiut, përfshirë zonën e Tel-Avivit dhe qytetet në Shfela” – tha më tej Shërbimi Meteorologjik.

Në përgjithësi, është shumë e pazakonshme që Izraeli të ketë reshje shiu në muajt e verës, edhe pse pati reshje të lehta para dy javësh në Jerusalem dhe në disa zona përreth tij.

Pas takimit me LDK-në, kryeministri në detyrë dhe kryetari i Lëvizjes Vetëvendosje, Albin Kurti, ka bërë të ditur se bisedimet mes palëve për çështjen e presidentit kanë hyrë në një fazë më konkrete.

Sipas tij, takimi është zhvilluar në një atmosferë të hapur dhe serioze, teksa palët, sipas tij, kanë shënuar përparim krahasuar me diskutimet e mëparshme. Kurti tha se, përveç kritereve dhe parimeve që janë trajtuar deri më tani, këtë herë janë përmendur edhe emra të caktuar.

Ai shtoi se identiteti i personave të diskutuar nuk do të bëhet publik në këtë fazë.

“Diskutimi ishte i hapur, i sinqertë dhe serioz. Do t’i vazhdojmë bisedimet, pasi është rritur mirëbesimi dhe për herë të parë kemi diskutuar edhe për emra të veçantë. Nuk janë emra që i kemi pyetur paraprakisht nëse do të donin të ishin president apo presidente, sepse paraprakisht duhet të dakordohemi mes vete”, tha Kurti

Investimi prej 2.11 milionë eurosh është për Rahovecin, por në grafikën e publikuar nga Qeveria e Kosovës në hartë është fokusuar Obiliqi.

Qeveria e Kosovës ka njoftuar për një investim prej 2.11 milionë eurosh në Komunën e Rahovecit, në kuadër të Projektit për Banimin Social Adekuat. Mirëpo, krahas lajmit për investimin, vëmendjen e merr edhe një gafë jo fort e vogël në materialin grafik që shoqëron postimin.

Në grafikë shkruhet qartë “Komuna Rahovec – 2.11 milionë euro”, por komuna e theksuar në hartën e Kosovës nuk është Rahoveci. Pozita dhe forma e zonës së shënuar përkojnë me Komunën e Obiliqit, në pjesën qendrore të vendit.

Obiliqi ndodhet në pjesën qendrore të Kosovës, pranë Prishtinës, ndërsa Rahoveci shtrihet në Rrafshin e Dukagjinit, dukshëm më në jugperëndim.

Avokatët e Andrew dhe Tristan Tate kanë pranuar në dokumentet gjyqësore se vëllezërit e famshëm të rrjeteve sociale kanë gënjyer online për pasurinë e tyre.

Sipas avokatëve, pretendimet për burime të pakufizuara financiare, kriptomonedha dhe pasuri luksoze nuk janë të vërteta, raportoi "Forbes."

Mes luksit të paraqitur online ishin një Bugatti Chiron Pur Sport me vlerë 7 milionë dollarë dhe një Aston Martin prej 2.1 milionë dollarësh.

Por automjetet nuk ishin në pronësi personale të tyre. Avokatët thanë se ato ishin marrë me qira ose përmes kontratave korporative.

Edhe koleksioni i shtrenjtë i orëve të Andrew Tate nuk dëshmon se ai i zotëronte realisht modelet që shfaqte.

Avokatët thanë se imazhi i pasurisë ekstreme përdorej për të promovuar bizneset e tyre online, përfshirë kurse për fitimin e parave.

“Sa më hiperbolik dhe i jashtëzakonshëm të ishte postimi, aq më shumë gjasa kishte të gjeneronte shikime dhe pëlqime”, deklaruan ata.

“Në fund të fundit, ata po luanin një rol”, shtuan avokatët.

Deputetja e LDK-së, Hykmete Bajrami, ka kritikuar MASHT-in për vonesat në ndarjen e mjeteve për blerjen e teksteve shkollore.

Ajo ka thënë se, pesë ditë para 1 shtatorit, prindërit ende nuk i kanë marrë mjetet.

Bajrami ka ironizuar negociatat për çmimet dhe ka ngritur shqetësimin për komunat pa librari.

Ajo i ka cilësuar “amatera”, duke kritikuar ndryshimin e mënyrës së furnizimit me libra.

Kostot e ndërtimit në Kosovë po shënojnë rritje të vazhdueshme. Sipas Agjencisë së Statistikave të Kosovës, gjatë tremujorit të dytë të vitit 2026, shpenzimet e ndërtimit u rritën me 0,9% krahasuar me tremujorin paraprak dhe me 4,4% në krahasim me të njëjtën periudhë të vitit 2025.

Shtrenjtimi vjetor u udhëhoq kryesisht nga:

• Transporti, me një rritje prej 11,2%;
• Pagat, të cilat u rritën me 8,6% për shkak të mungesës së fuqisë punëtore;
• Kostot e tjera (+5,6%), materialet ndërtimore (+4,4%) dhe energjia (+2,3%).
  I vetmi zë që shënoi rënie ishin makineritë (-0,9%).

Në nivel tremujor, rritja prej 0,9% u nxit më së shumti nga energjia (+2,3%) dhe pagat (+2,0%).

Në strukturën e kostove për ndërtesat e banimit, peshën kryesore e mbajnë materialet me 69,8%, ndërsa pagat zënë 16,4%. Për shkak të kësaj peshe të lartë, çdo luhatje në lëndët e para dhe krahun e punës ndikon drejtpërdrejt te kompanitë ndërtimore.

Ky presion i vazhdueshëm inflacionist pritet të bartet te çmimet përfundimtare të pronave, duke ndikuar drejtpërdrejt në tregun e patundshmërive, ofertën dhe ritmin e investimeve në vend.

Kryetari i LVV-së, Albin Kurti, ka shprehur optimizëm për arritjen e një marrëveshjeje me LDK-në për presidentine ri.

Para takimit me Lumir Abdixhikun, Kurti tha se synimi është gjetja e një emri të përbashkët dhe shmangia e zgjedhjeve të reja.

“Ashtu siç jemi marrë vesh, në mënyrë që vendit bashkërisht t’ia sjellim emrin për Presidentin e ri dhe t’i evitojmë zgjedhjet e reja të panevojshme”, ka deklaruar Kurti.

Ai ka kërkuar që bisedimet të mbeten konfidenciale deri në arritjen e një marrëveshjeje.

“Do të jemi të hapur karshi jush sa i përket procesit, por deri kur të kemi marrëveshje na duhet ta ruajmë konfidencialitetin e bisedimeve”, tha Kurti.

Të paktën 95 njerëz kanë vdekur dhe qindra të tjerë janë ende të zhdukur pas vërshimeve në zonat kufitare mes Nepalit e Kinës në Himalaje. Zyrtarët thanë se janë goditur edhe disa zona në Indi.

Katastrofa u shkaktua nga një rrjedhë e baltës, ujit dhe mbetjeve që dolën nga shtrati i një lumi që kalon mes Kinës e Nepalit. Shtëpi, rrugë, ura e qendra energjetike u morën me vete nga uji e balta në Nepal, ndërsa zyrtarët në Tibet thanë se kanë frikë për “viktima të shumta”, raporton gazeta “The Guardian”.

Autoritetet lëshuan paralajmërime ku qytetarëve në disa distrikte u bëhej thirrje për të qëndruar larg lumenjve Bhote Koshi, Trishuli dhe Narayani në Nepal.

Zyrtarët thanë se 384 turistë, përfshirë 291 nga shtete si India, ShBA-ja, Britania e Malajzia, janë raportuar të zhdukur. Nepali tha se 44 pjesëtarë të personelit ushtarak dhe 30 oficerë policorë gjithashtu janë raportuar të zhdukur. Së paku një australian është në listën e të zhdukurve.

Zyrtarë të bordit të turizmit në Nepal thanë se shumica e të zhdukurve me gjasë janë turistë nga India dhe diaspora indiane që po merrnin pjesë në një pelegrinazh në Malin Kailash në Tibet, vend i shenjtë për hindusët.

Vërshimet mendohet se u nxitën nga një ortek i përbërë nga akulli e gurët që u shkëput nga një akullnajë.