Deputetja e Lidhjes Demokratike të Kosovës, Janina Ymeri, ka reaguar pas tërheqjes së Bekim Sejdiut nga kandidatura për president.

Ymeri ishte njëra nga gjashtë deputetët e LDK-së që kundërshtuan akordin ndërmjet Lumir Abdixhikut dhe Albin Kurtit për kandidaturën e Sejdiut.

Pas njoftimit të këtij të fundit, ajo shkroi shkurt:

“Rrnoftë Lidhja Demokratike e Kosovës. Rrnoftë demokracia e Republikës së Kosovës”

Deputeti i Lidhjes Demokratike të Kosovës, Arben Gashi, është deklaruar lidhur me zhvillimet e fundit politike në vend.

Ai ka vlerësuar se çështja tashmë mbetet në duart e Gjykatës Kushtetuese, nga e cila pritet të përcaktohet rruga e mëtejshme.

Sipas Gashit, që nga 5 gushti është tejkaluar afati kushtetues me të cilin është përballur subjekti fitues i zgjedhjeve.

“PREJ SOT PARADITE, FJALËN E KA GJYKATA KUSHTETUESE. Që nga 5 gushti, fituesi i zgjedhjeve është përballur me një afat kushtetues të tejkaluar. Kjo nuk është më çështje retorike politike, por çështje e zbatimit të Kushtetutës. Tash le të flasë Gjykata. Pas vendimit, do të dihet rruga përpara dhe përgjegjësia politike për secilin”, ka thënë Gashi.

Ish-presidentja, tashmë deputetja e LDK-së, Vjosa Osmani ka falënderuar të propozuarin për president nga Abdixhiku dhe Kurti, Bekim Sejdiu, pasi ky i fundit u tërhoq nga gara, meqenëse nuk kishte vota të mjaftueshme në Kuvend.

Osmani ka shkruar, se Sejdiu tregoi dinjitet me mënyrën se si e përballoi situatën.

E plotë:

Bekim Sejdiu meriton falënderim.

Jo vetëm për gatishmërinë për t’i shërbyer vendit, por edhe për mënyrën se si e përballoi një proces ku personalja shpesh u vendos mbi institucionalen.

Ndoshta pikërisht këtu qëndron humbja jonë më e madhe: jo vetëm që nuk arritëm të zgjedhim Presidentin, por humbëm edhe një tjetër mundësi për të treguar se në Kosovë mund të ndërtojmë konsensus rreth njerëzve me dije, integritet dhe dinjitet.

Politika kalon. Fushatat mbarojnë. Zgjedhjet përsëriten. Por mënyra se si një njeri sillet kur vihet në sprovë, mbetet.

Dhe ndonjëherë, edhe kur një përpjekje politike nuk përfundon me sukses, ajo lë pas diçka më të rëndësishme: një dëshmi të karakterit.

Prandaj, faleminderit Bekim, për gatishmërinë për t’i shërbyer Republikës dhe për dinjitetin që tregove deri në fund

Pozita e presidentit të Kosovës është shndërruar në një “kurth” politik për kandidatët e propozuar gjatë krizës së gjatë institucionale.

Brenda pak muajsh, pesë kandidatura janë tërhequr. Emri i fundit është ai i Bekim Sejdiut, kandidati jopartiak për të cilin ishin pajtuar Albin Kurti dhe Lumir Abdixhiku.

Sejdiu njoftoi tërheqjen pasi u bë e qartë se nuk e kishte mbështetjen e nevojshme parlamentare.

Ai vlerësoi se kandidatura e tij ishte përfshirë në përplasjet e brendshme politike, duke humbur qëllimin fillestar të zhbllokimit institucional.

Përpara tij, nga gara ishin tërhequr Glauk Konjufca dhe deputetja Fatmire Mulhaxha-Kollçaku, kandidatët fillestarë të Lëvizjes Vetëvendosje.

Emrat e tyre ishin paraqitur për seancën e 5 marsit, por nuk ishin hedhur në votim për shkak të mungesës së kuorumit.

Më 27 prill, Konjufca dhe Mulhaxha-Kollçaku i tërhoqën kandidaturat, duke i hapur rrugë një formule tjetër presidenciale.

Vetëvendosje më pas propozoi Feride Rushitin dhe Hatixhe Hoxhën.

Në raundin e parë të votimit, Rushiti mori 63 vota, ndërsa Hoxha nuk mori asnjë. Procesi dështoi përfundimisht për mungesë kuorumi.

Rushiti më vonë konfirmoi se nuk ishte më në diskutime për presidente dhe se do ta vazhdonte angazhimin në organizatën e saj.

Pra, Hoxha nuk u tërhoq formalisht por kandidatura e saj dështoi në votim. Rushiti, ndërkaq, u largua nga diskutimet pas dështimit të procesit.

Gjatë kësaj kohe, u përmendën edhe emra si: Murat Jashari, Andin Hoti etj.

Presidenca, ndërkaq, mbetet nyja kryesore e krizës politike, pasi zgjedhja kërkon praninë e së paku 80 deputetëve në raundin e parë.

Sekretarja e Përgjithshme e Partisë Demokratike të Kosovës, Vlora Çitaku, ka komentuar procesin gjyqësor që po zhvillohet në Hagë ndaj ish-krerëve të Ushtrisë Çlirimtare të Kosovës.

Në emisionin “DPT te Fidani” në Klan Kosova, ajo ka thënë se pret që vendimi përfundimtar i gjykatës të mbështetet në provat dhe faktet e administruara gjatë gjykimit.

Çitaku ka vlerësuar se aktakuza e ngritur nga Prokuroria është e pabazë, duke thënë se kjo mund të kuptohet edhe pa pasur ekspertizë juridike.

“Unë po dua të besoj që vendimi do të merret bazuar në faktet që janë ofruar në sallën e gjyqit dhe nuk duhet të jesh ekspert i ligjit për ta kuptuar se sa e pabazë është aktakuza e ngritur nga Prokuroria”, ka deklaruar Çitaku.

Deklarata e saj vjen në prag të zhvillimeve vendimtare në procesin gjyqësor ndaj ish-krerëve të UÇK-së në Hagë.

Një pjesëtar i forcave të armatosura britanike ka vdekur në një aksident rrugor në Ukrainë, ka njoftuar Ministria e Mbrojtjes e Mbretërisë së Bashkuar.

Familja e personit është njoftuar dhe “ka kërkuar një periudhë qetësie para se të publikohen hollësi të mëtejme”, thuhet në deklaratën e Ministrisë së Mbrojtjes, raporton televizioni BBC.

Televizioni britanik merr vesh se incidenti i së shtunës nuk ishte rezultat i ndonjë veprimi armiqësor.

Qeveria britanike në të kaluarën ka pranuar se një numër i vogël i pjesëtarëve të personelit britanik ndodhen në Ukrainë për t’i mbështetur forcat e armatosura të saj dhe për t’i ofruar siguri stafit diplomatik.

Nuk është e qartë se në cilën degë të shërbimeve të armatosura ishte pjesëtari që ka mbetur i vdekur në aksident ose çfarë roli kishte.

Për vdekjen e këtij pjesëtari ngushëllime ka shprehur sekretari i Mbrojtjes i Mbretërisë së Bashkuar, Wes Streeting, i cili tha se “ky është një lajm shumë pikëllues për familjen dhe për ata që po mbajnë zi me të në forcat tona të armatosura”.

Konstituimi i Kuvendit është bërë në kundërshtim me Kushtetutën dhe mund ta vërë në pikëpyetje edhe zgjedhjen e Qeverisë Kurti 4.

Kështu ka deklaruar Enver Hasani, ish-kryetar i Gjykatës Kushtetuese, në një intervistë për Radion Evropa e Lirë.

Hasani pret që Kushtetuesja të vendosë masë të përkohshme dhe ta pezullojë veprimtarinë e Kuvendit deri në shqyrtimin përfundimtar të rastit.

Në këtë skenar, Kuvendi nuk do të mund të mblidhej, ndërsa fati i Qeverisë së sapozgjedhur do të mbetej pezull.

PDK-ja iu drejtua Kushtetueses, duke kërkuar masë të përkohshme lidhur me konstituimin e Kuvendit më 13 shtator.

Sipas Hasanit, procesi nuk e ka ndjekur rrugën e përcaktuar me nenin 67 të Kushtetutës dhe nenin 12 të Rregullores së Kuvendit.

“Konstituimi i Kuvendit të dielën nuk ka ndjekur asnjë rrugë kushtetuese të përcaktuar me Kushtetutën e Republikës së Kosovës”, tha ai.

Hasani e cilësoi “fund e krye arbitrar” konstatimin e kryetares së Kuvendit, Albulena Haxhiu, se institucioni nuk mund të mbetet peng.

Sipas tij, Haxhiu nuk mund të provojë se PDK-ja ka sabotuar procesin ose ka hequr dorë nga e drejta kushtetuese.

Ai argumentoi se tërheqja e kandidatit të PDK-së duhet parë në kontekstin e gjendjes së stërzgjatur jokushtetuese gjatë konstituimit të Kuvendit.

“Nuk do të ishte profesionale që Gjykata, tani kur çështja është e qartë, të lejonte funksionimin e Kuvendit të Kosovës”, deklaroi Hasani.

Ai tha se gjendja e krijuar prodhon pasoja nga betimi i deputetëve deri te vendimi për zgjedhjen e Qeverisë Kurti 4.

Nëse konstituimi shpallet jokushtetues, sipas tij, Kushtetuesja duhet ta konstatojë edhe jokushtetutshmërinë e vendimit për zgjedhjen e Qeverisë.

Gjykata, shtoi Hasani, duhet ta rikthejë procesin në afatet kushtetuese për konstituimin e Kuvendit.

Ai sqaroi se tejkalimi i afatit 30-ditor nuk prodhon automatikisht zgjedhje të reja.

Po ashtu, rrëzimi eventual i votimit të parë për Qeverinë nuk do ta përjashtonte rundin e dytë të procedurës kushtetuese.

Hasani paralajmëroi se kriza mund të ndikojë edhe në zgjedhjen e presidentit, për të cilën aktualisht nuk duket se ekzistojnë votat e nevojshme.

Sipas tij, Kurti po ushtron presion mbi opozitën, duke paralajmëruar mundësinë e zgjedhjeve.

“As kjo, mësa duket, nuk po pi ujë”, tha Hasani, duke shtuar: “I laguri për shi nuk ka dert”.

Policia e Kosovës i ka bërë të gjitha përgatitjet për 16 shatorit, ditën kur Gjykata Speciale do të shpall verdiktin për ish-krerët e UÇK-së.

Përmes një komunikate për media, policia ka treguar se ka ndërmarrë masa të sigurisë lidhur me zhvillimet e parapara për 16 shtator.

Policia ka bërë të ditur se ka ndërmarrë masat e nevojshme policore për garantimin e sigurisë dhe ruajtjen e rendit publik.

“Policia e Kosovës, lidhur me zhvillimet e parapara për datën 16 shtator, ku pritet të merret verdikti përfundimtar i Gjykatës Speciale në Hagë ndaj ish-krerëve të UÇK-së, ka ndërmarrë masat e nevojshme policore për ofrimin e sigurisë, ruajtjen e rendit e qetësisë publike si dhe mbarëvajtjen e të gjitha aktiviteteve që parashihen”, është thënë në komunikatë.

Policia ka bërë të ditur se ka zhvilluar takime informuese dhe koordinuese me strukturat përkatëse dhe partnerët ndërkombëtarë.

“Sipas praktikave të mëhershme të ndërtuara, me qëllim të mirëmbajtjes dhe avancimit të partneritetit, kur pritet të ketë zhvillime, aktivitete apo tubime publike, menaxhmenti i PK-së mban takime informuese dhe koordinuese me drejtorët e departamenteve, divizioneve dhe drejtorët e drejtorive rajonale, përfshirë edhe takime me partnerë ndërkombëtarë, si: KFOR, EULEX, përfaqësues nga Ambasada Amerikane, Zyra e BE-së dhe OSBE-ja”, thuhet në komunikatë, duke dhënë detaje tjera.

“Një takim i tillë u mbajt edhe sot në Drejtorinë e Përgjithshme të PK-së, ku u prezantua plani dhe angazhimet policore lidhur me zhvillimet e parapara që ndërlidhen me datën 16 shtator”, thuhet në komunikatë.

Ish-komandanti i UÇK-së, Daut Haradinaj, është fyer nga një ish-polic i ish-Jugosllavisë.

Derisa Haradinaj ka kërkuar liri për ish-krerët e UÇK-së në Hagë përmes një video në Facebook, ish-polici serb Milinko Babovic ka komentuar duke e fyer Haradinajn dhe luftën çlirimtare.

Ky koment ka nxitur disa reagime të kumtuesve në Facebook.

Fatkeqësisht, ky koment fyes ndaj Haradinat dhe luftës çlirimtare u ka pëlqyer disa shqiptarëve.

Komenti fyes i ish-policit serb ka marrë tre “lajke” nga shqiptarët.

Gazeta Nacionale ka mësuar se Milinko Babovic ka shërbyer si polic në rajonin e Dukagjin gjatë luftës në Kosovë.

Forumi Rinor Shqiptar ka njoftuar se të martën, më 15 shtator, do të organizojë marshim në Shkup, në mbështetje të ish-krerëve të UÇK-së.

Marshimi do të mbahet në sheshin “Skënderbej”, nga ora 18:00, në prag të aktgjykimit përfundimtar në Hagë.

“LIRI PËR ÇLIRIMTARËT!”, thuhet në njoftimin e organizatorëve.

Ata kanë ftuar shqiptarët të marrin pjesë, duke deklaruar se synojnë të përcjellin solidaritet dhe mbështetje për katër ish-krerët e UÇK-së.

“UÇK-ja është pjesë e historisë dhe lirisë së shqiptarëve. Luftëtarët e lirisë meritojnë vetëm drejtësi”, thuhet në njoftim.