Mbreti Mohammed VI i Marokut të martën e emëroi Fatima Ezzahra El Mansouri-n si kryeministre të vendit, pasi partia e saj liberale-qendrore doli e para në zgjedhjet parlamentare të 23 shtatorit, bëri të ditur pallati mbretëror. Ajo është gruaja e parë që do ta mbajë këtë post të lartë.

Në një deklaratë, pallati mbretëror tha se mbreti kërkoi nga El Mansouri që të formojë një qeveri të re, raporton agjencia e lajmeve “Reuters”.

Partia e Autenticitetit dhe Modernitetit (PAM) e El Mansourit u themelua në vitin 2008 nga një këshilltar i mbretit dhe nga ajo kohë e ka paraqitur veten si kundërpeshë ndaj Partisë për Drejtësi dhe Zhvillim (PJD) duke i mbështetur modernizimin social dhe pikëpamjet me prirje sekulariste.

Maroku është monarki kushtetuese ku mbreti ka kompetenca të gjera mbi politikën e jashtme, mbrojtjen dhe fusha të tjera kyçe.

Sipas kushtetutës së këtij shteti afrikan, mbreti e emëron kreun e qeverisë nga partia politike që e fiton numrin më të madh të ulëseve në Dhomën e Përfaqësuesve.

El Mansouri, avokate që ishte ministre e Banimit në qeverinë në largim dhe kryetare e qytetit Marrakech, do t’i udhëheqë bisedimet për formimin e qeverisë së re dhe do ta dorëzojë listën e anëtarëve të kabinetit për t’u miratuar nga mbreti.

Një burrë që ka kaluar 41 vjet në pritje të zbatimit të dënimit me vdekje në ShBA, pasi ishte shpallur fajtor për vrasjen e një gruaje, është liruar me kusht, pasi prokurorët thanë se dëshmitë e ADN-së që u analizuan rishtazi nuk e lidhin atë me krimin.

Douglas Stewart Carter, i cili tashmë është 71 vjeç, ishte burgosur për vrasjen e Eva Olesen-it në Utah më 1985, raporton televizioni BBC.

Ai ishte dënuar me vdekje, por vazhdimisht pretendonte se është i pafajshëm, duke thënë se një rrëfim që e kishte nënshkruar ishte dhënë nën detyrim.

Gjykata Supreme në Utah vitin e kaluar dha urdhër për gjykim të ri, duke i përmendur si arsyetim shkeljet nga hetuesit, ndërsa një gjykatës të hënën e liroi Carter-in me kusht pavarësisht ankesave nga familja e viktimës. Atij i kërkohet që të mbajë në trup një pajisje me GPS për përcjelljen e vendndodhjes gjatë kohës sa është i lirë me kusht.

Olesen ishte therur disa herë dhe më pas ishte qëlluar me armë në pjesën e pasme të kokës në shtëpinë e saj në Provo të Utah-s në shkurtin e vitit 1985.

Carter-i, i cili me prejardhje është nga Chicago, kishte qenë duke jetuar me nënën e vet në Utah në kohën e vrasjes së gruas. Sipas dokumenteve të gjykatës, policia dyshonte se ai e kishte vrarë Olesen-in gjatë një plaçkitjeje.

Një kapitull i ri në marrëdhëniet mes Shqipërisë dhe Shteteve të Bashkuara të Amerikës shënohet me nisjen e detyrës së Ambasadorit amerikan në Tiranë, David Wendt.

Në rezidencën zyrtare të ambasadës, Trupa e Marinsave të Shteteve të Bashkuara ngriti flamurin amerikan, në një ceremoni që shënoi fillimin e mandatit të ambasadorit të ri.

Në mesazhin e publikuar me këtë rast, Ambasada Amerikane vuri theksin te rëndësia e marrëdhënieve mes dy vendeve dhe e aleancës së tyre. Sipas ambasadës, partneriteti bëhet më i fortë kur Shqipëria dhe SHBA-ja qëndrojnë së bashku, ndajnë përgjegjësitë dhe bashkëpunojnë për një të ardhme më të sigurt dhe më të begatë.

"Një kapitull i ri nis në Shqipëri! Trupa e Marinsave e Shteteve të Bashkuara ngriti flamurin amerikan në rezidencën zyrtare, teksa Ambasadori Wendt nis detyrën e tij. Nën udhëheqjen e Presidentit Trump, aleancat tona janë më të forta kur qëndrojmë së bashku, ndajmë përgjegjësitë dhe punojmë për një të ardhme më të begatë e më të sigurt për të dy vendet tona", thuhet në reagimin e ambasades amerikane.

Nisja e mandatit të Ambasadorit Wendt vjen si një tjetër moment i rëndësishëm në marrëdhëniet e ngushta mes Tiranës dhe Uashingtonit, me fokus te forcimi i partneritetit dhe bashkëpunimit mes dy vendeve.

Prokuroria Themelore në Pejë ka kërkuar paraburgim për S.O. dhe arrest shtëpiak për E.O., të dyshuar për kultivim të kanabisit.

Sipas Prokurorisë, dy të pandehurit dyshohet se gjatë vitit 2026, në fshatin Isniq të Deçanit, në bashkëkryerje kanë kultivuar bimë të dyshuara Kanabis Sativa, me qëllim prodhimin e narkotikëve ose substancave psikotrope.

Për masat e kërkuara do të vendosë gjykata kompetente.

Komandanti i Forcës së Sigurisë së Kosovës, Gjenerallejtënant Bashkim Jashari, ka pritur në takim Komandantin e Regjimentit të Operacioneve Speciale të Republikës së Shqipërisë dhe Komandantin e Komandës së Forcave të Operacioneve Speciale të Republikës së Kroacisë.

Në njoftimin e FSK-së është thënë se gjatë takimit është diskutuar për bashkëpunimin e ndërsjellë, koordinimin dhe shkëmbimin e përvojave profesionale ndërmjet Forcës së Sigurisë së Kosovës dhe forcave partnere.

“Në këtë kuadër, temë e diskutimit ishte edhe ushtrimi “Valor Shield 2026”, si një mundësi për bashkëpunim dhe shkëmbim të përvojave ndërmjet forcave pjesëmarrëse. Gjeneral Jashari vlerësoi bashkëpunimin e vazhdueshëm me forcat partnere të Shqipërisë dhe Kroacisë, duke theksuar rëndësinë e partneritetit dhe angazhimeve të përbashkëta në funksion të zhvillimit profesional dhe rritjes së kapaciteteve të Forcës së Sigurisë së Kosovës”, është thënë në njoftim.

PDK-ja në Fushë Kosovë ka akuzuar Vetëvendosjen se anëtari i Listës Serbe në Kuvendin Komunal ka votuar në të njëjtën linjë me pushtetin, lidhur me propozimet e Vetëvendosjes.

Në një reagim, dega e PDK-së tha se votat ngrenë pikëpyetje për bashkërendim politik.

Sipas saj, anëtari i Listës Serbe nuk e mbështeti propozimin e PDK-së për 100 euro për familjet me më shumë se një fëmijë në kopshte private.

PDK-ja kërkoi transparencë dhe tha se do t’i publikojë votimet konkrete.

Kryetari i komunës së Prishtinës, Përparim Rama ka njoftuar se në kuvendin komunal sot është votuar buxheti për vitin 2027.

Në një shkrim në Facebook, ai ka thënë se mbi 161 milionë euro janë për shkolla, shërbime publike e investime.

Mes tjerash, Rama njoftoi se Lëvizja Vetëvendosje ka votuar kundër.

“URIME, PRISHTINË! BUXHETI PËR VITIN 2027 U VOTUA.

Mbi 161 milionë euro për qytetarët e Kryeqytetit: për shkollat, shërbimet publike dhe investimet që e çojnë Prishtinën përpara.

I falënderoj asamblistët që votuan pro. Sot treguan përgjegjësi ndaj qytetarëve dhe i dhanë Kryeqyteti Prishtina mundësinë të planifikojë e të punojë. Vetëvendosje, natyrisht votoj kundër!”, tha ai.

Deputeti i Aleancës, Burim Ramadani, ka treguar për prioritet që duhet t`i këtë Kosova në fushën e sigurisë.

Ai ka treguar për pesë ligjet që duhet të miratohen në këtë fushë.

Në profilin e tij në Facebook, Ramadani ka shkruar se mezi pres që të fillojë punën për këtë çështje.

“Këto janë 5 ligje prioritare në siguri dhe mbrojtje. Mezi pres të filloj punën në kornizën ligjore të sigurisë sonë kombëtare. Në Komisionin e Industrisë dhe atë për Siguri, i ofroj kontributin tim profesional Ministrit të Mbrojtjes dhe asaj të MINT-it. Hajdeni të punojmë, mjaft kohë është humbur! Unë nuk jam në politikë për vete. Jam në shërbim të sigurisë kombëtare. Kosova duhet të fillojë një kapitull të ri në siguri. 1. Ligji për Industrinë e Mbrojtjes2. Ligji për Parandalimin dhe Përballimin e Kërcënimeve Hibride3. Ligji për Edukimin e të rinjve në fushën e sigurisë dhe mbrojtjes. 4. Ligji për Pensionimin e Parakohshëm në Policinë e Kosovës. 5. Ligji i ri për Tregtinë e Mallrave Strategjike. Këto pesë ligje janë veçanërisht prioritare dhe duhet të miratohen brenda 3 muajve të mandatit të ri të institucioneve. Ndërkohë, do të flas për Strategjitë që janë të domosdoshme”, ka shkruar ai.

Presidentja e Komisionit Evropian, Ursula von der Leyen, do të vizitojë Kosovën të enjten, më 1 tetor, si pjesë e turneut të saj në Ballkanin Perëndimor.

Në Prishtinë, ajo pritet të takohet me ushtruesen e detyrës së presidentes, Albulena Haxhiu, dhe kryeministrin Albin Kurti. Bisedimet do të fokusohen në rrugën drejt BE-së, integrimin gradual dhe Planin e Rritjes për rajonin.

Von der Leyen do të vizitojë gjithashtu Shqipërinë, Malin e Zi dhe Maqedoninë e Veriut. Serbia dhe Bosnja e Hercegovina nuk janë pjesë e këtij turneu dhe pritet të vizitohen më vonë.

Vizita zhvillohet në një kohë kur Komisioni Evropian po përgatit udhërrëfyes për disa vende kandidate, me qëllim përcaktimin e reformave dhe hapave drejt anëtarësimit në BE.

Një llogari e dyshimtë në rrjete sociale ka publikuar një koment me përmbajtje të rëndë kërcënuese në profilin zyrtar të ish-kryetarit të Aleancës, Ramush Haradinajt.

Profil i shkruar në gjuhën cirilike nën emrin "Goran Gogo Frkz", i cili sipas të dhënave fillestare paraqitet si një profil rus apo me mbështetje ruse, ka lënë një mesazh ekstremisht fyes dhe degradues në seksionin e komenteve.

Në këtë reagim shkruhet tekstualisht: "Oooo teroristicki kozojebu , jebat cemo ti sve zensko u familiji brzih dana" (Përkthimi: "Ooo terrorist..., do t’ia q*jmë krejt femrat e familjes tënde brenda pak ditësh").

Gjuha e përdorur mbart një mesazh të pastër agresioni digjital dhe paralajmërimi për sulm ndaj integritetit dhe sigurisë së familjes Haradinaj.

Ky incident vjen në një moment mjaft delikat të aktualitetit politik në vend. Përgjatë zhvillimeve të fundit lidhur me proceset në Gjykatën e Hagës, në Kosovë janë shtuar ndjeshëm edhe diskutimet që propozojnë Ramush Haradinajn për President të Republikës.

Ky rast pason një fushatë më të gjerë sulmesh digjitale ndaj kësaj familjeje.

Vetëm pak javë më parë, edhe vëllai i tij, ish-gjenerali i UÇK-së Daut Haradinaj, denoncoi publikisht se ka pranuar kërcënime direkte nga ushtarë rusë dhe serbë që gjenden në frontin e Ukrainës. Ndonëse Daut Haradinaj i kishte cilësuar ata publikisht si "zagarë" që nuk e shqetësojnë, përsëritja e skenarit të njëjtë tashmë ndaj Ramush Haradinajt ngre alarme të reja.