Përleshja e “Plisave” dhe policisë pas ndeshjes, lëndohet një zyrtar policor
Mbrëmë në pallatin e rinisë dhe sporteve në Prishtinë, u zhvillua ndeshja e dytë e gjysmëfinales në basketboll, ku u përballen Sigal Prishtina dhe Trepça.
Në fund, ekipi nga Mitrovica, pra Trepça, fitoi me rezultat të ngushtë karshi Sigal Prishtinës 85:86.
Megjithatë, fitorja mbeti nën hijen e përleshjeve të tifozerisë Plisat me policinë që shpërthyen në sallën, ku u zhvillua ndeshja.
Madje, për këtë çështje ka raportuar edhe Policia e Kosovës. Në raportin 24-orësh, Policia ka njoftuar edhe për lëndimin e një zyrtari policor.
“Pas përfundimit të ndeshjes basketbollistike , disa nga tifozët kanë hedhur gjësende të forta, nder te tjera edhe ulëse të palestrës me ç’rast si pasojë lëndime trupore ka pësuar një zyrtar policor i cili ka pranuar tretman mjekësor. Rasti po hetohet nga njësitet përkatëse” – thuhet në raportin e Policisë së Kosovës.
