Agjentët e futbollit sfidojnë rregullat FIFA-s, industria e tyre në rrezik të ‘shuhet’
Siç kanë kuptuar mediat britanike, agjentët më të fuqishëm në botën e futbollit do të mblidhen për t’u bërë gati për t’i sfiduar rregullat e reja të FIFA-s, që kufizojnë fitimet e tyre gjatë transferimeve të lojtarëve.
Një grup agjentësh kryesorë që kanë shumicën e yjeve të futbollit në dorë, po takohen në Londër të mërkurën për të diskutuar hapat e ardhshëm në luftën e tyre kundër rregullave, pasi kanë zhvilluar diskutime rreth veprimeve ligjore gjatë dy javëve të fundit.
Një organ evropian që përfaqëson agjentët tha se 'e gjithë industria' rrezikohej të 'shuhej' pasi FIFA prezantoi rregullore që kufizonin sasinë e parave që agjentët mund të fitonin nga një transferim.
Agjentët pretendojnë se FIFA nuk u angazhua siç duhet me ta në hartimin e rregullave të reja dhe se ata do të lënë jashtë biznesit 'mijëra' përfaqësues të lojtarëve më pak të njohur.
FIFA ka thënë se kanë kryer një “proces të gjerë konsultimi me të gjithë aktorët kryesorë të futbollit ndërkombëtar”. Por agjentët kryesorë duke përfshirë Jonathan Barnett, i cili përfaqëson Gareth Balen dhe Jack Grealishin, kundërshtuan fuqishëm pretendimin e FIFA-s. Kështu bënë edhe organet përfaqësuese të agjentëve.
“Agjentët nuk janë konsultuar në cilësinë zyrtare dhe vendimet e FIFA-s nuk kanë marrë në konsideratë perspektivën nga ana jonë; në vend të kësaj, ato rregulla janë bërë në mënyrë të njëanshme”, tha Shoqata Evropiane e Agjentëve të Futbollit (EFAA).
“Ne ende nuk kemi takuar një grup agjentësh anembanë botës, të cilët nuk janë të shqetësuar për potencialin e një kufiri jashtëzakonisht të ulët të tarifës, as nuk kemi takuar një agjent të vetëm në favor të një kufiri të tillë - një pozicion befasues, pasi ne mendojmë se kjo duhet të vendoset kur të gjitha palët të jenë ulura në një tryezë.
“Këto rregullore do të kenë pasoja të rënda për mbarëvajtjen e futbollit dhe karrierën e mijëra agjentëve të vegjël dhe të mesëm në mbarë botën. Ne do të bëjmë gjithçka për të mbrojtur profesionin tonë dhe për të bllokuar zbatimin e kësaj rregullore”, thanë ndër të tjera nga EFAA.
Këshilli i FIFA-s miratoi rregulloret e tij të agjentëve të futbollit në Katar më 16 dhjetor, me organin qeverisës duke i përshkruar ato si "një hap historik drejt krijimit të një sistemi më të drejtë dhe më transparent të transferimeve në futboll".
Rregulloret përcaktojnë që një agjent që përfaqëson një lojtar që fiton më shumë se 200,000 dollarë (165,000 £) në vit, mund të fitojë jo më shumë se tre për qind të pagesave ndaj tij ose asaj në çdo transaksion. Kur përfaqësojnë një klub blerës dhe një futbollist në të njëjtën grup pagese, agjentët mund të fitojnë jo më shumë se gjashtë për qind nga pagesat e çdo lojtari. Kur përfaqëson një klub shitës, fitimi i një agjenti kufizohet në 10 për qind të tarifës së transferimit.
Shumica e rregulloreve të publikuara të premten, do të zbatohen nga e hëna, megjithëse kufiri për tarifat e agjentëve nuk do të hyjë në fuqi deri më 1 tetor.
