Inflacioni mujor rritet me 0.3 pikë përqindje në prill
Inflacioni në Kosovë vijon të mbetet i lartë. Sipas raportit të fundit të Agjencisë së Statistikave të Kosovës për muajin prill 2023, çmimet e konsumit kanë treguar një rritje të moderuar me një inflacion mujor prej 0.3 për qind.
Rritja e çmimeve gjatë këtij muaji ka qenë e ndikuar kryesisht nga rritja e disa kategorive të produkteve.
Përkatësisht, çmimet e pajisjeve telefonike dhe të telefaksit kanë rritur me 27.2 për qind, shërbimet për transport me 5.6 për qind, veshjet dhe këpucët me 1.5 për qind, pije alkoolike me 1.5 për qind, ujërat minerale, pije joalkoolike, lëngjet nga pemët dhe perimet me 1.2 për qind, dhe pemët me 0.8 për qind.
Këto rritje kanë kontribuar në rritjen e indeksit të tërësishëm të çmimeve të konsumit me 0.3 për qind në krahasim me muajin e kaluar.
Në të kundërt, vërehet një rënie e çmimeve për disa kategori të tjera. Për shembull, çmimet e qumështit, djathit dhe vezëve kanë rënë me 1.4 për qind, ndërsa çmimet e perimeve kanë rënë me 0.6 për qind.
Nëse krahasojmë inflacionin në prill 2023 me atë të një viti më parë, vërehet një rritje e dukshme. Norma vjetore e inflacionit të llogaritur nga IHÇK ishte 6.3 për qind. Rritja e indeksit të tërësishëm të çmimeve të konsumit në këtë periudhë ka qenë e ndikuar nga rritja e çmimeve në shumë kategori të produkteve.
“Inflacioni mujor i matur nga indeksi i harmonizuar i çmimeve të konsumit ishte 0.3% në muajin prill 2023.Indeksi i tërësishëm i harmonizuar i çmimeve të konsumit ishte më i lartë në një mesatare prej 0.3% në muajin prill 2023, krahasuar me muajin mars 2023. Kjo kryesisht është shpjeguar me ngritjen e çmimeve të konsumit të nëngrupet e COICOPI-it: pajisje telefonike dhe të telefaksit (27.2%); shërbime për transport (5.6%); veshje dhe këpucë (1.5%); pije alkoolike (1.5%); ujë mineral, pije joalkoolike, lëngje nga pemët dhe perimet (1.2%); dhe pemë (0.8%), me një ndikim të përbashkët të këtyre nëngrupeve prej 0.4%. Ndërsa rënie e çmimeve vërehet të grupet dhe nëngrupet e COICOP-it: qumësht, djathë dhe vezë (-1.4%); dhe perimet (-0.6%), me një ndikim prej (-0.1 për qind) në IHÇK. Norma vjetore e inflacionit e matur në muajin prill 2023 me muajin prill 2022 ishte 6.3%", - thuhet mes tjerash në njoftimin e ASK-së.
