Afrim Haliti: Mujka u punësua përkundër thirrjeve të VV-së dhe Kurtit se do ta luftonin nepotizmin
Analisti, Afrim Haliti ka komentuar punësimin e Faruk Mujkës, ish-nënkryetar i komunës së Mitrovicës dhe anëtar i Lëvizjes Vetëvendosje, është zgjedhur Kryeshef Ekzekutiv i Ndërmarrjes Hidroekonomike “Ibër-Lepenc”.
Përmes një postimi në Facebook, Haliti ka përmendur kohë, që sipas tij Mujka bënte pjesë në partinë e themeluar nga gruaja famëkeqe e Millosheviqit - Mirjana Markoviq, në vitin 1996.
“Faruk Mujka i ishte bashkuar partisë 'E Majta Jugosllave' me 24 korrik 1996, dy vite pasi që kjo parti ishte themeluar nga gruaja famëkeqe e Millosheviqit - Mirjana Markoviq. Viti 1996 ishte koha më e tmerrshme për popullin shqiptar nën shtypjen serbe të orkestruar nga burri i Mirjanës, mirëpo kjo nuk e kishte penguar Faruk Mujkën aspak që të futej në gjirin e serbëve si një i ashtuquajtur asokohe "shqiptar i ndershëm". Djemë e vjaza tjera shqiptare në atë kohë kishin kapur pushkët dhe po bëheshin gati për luftën që do të përfundonte njëherë e përgjithmonë epokën e Millosheviqëve e Markoviqëve në Kosovë”, ka shkruar Haliti.
Tutje ai ka thënë se Mujka u punësua në Ibër-Lepenc, përkundër thirrjeve të kahmotshme të Vetëvendosjes dhe Albin Kurtit se do ta luftonin nepotizmin dhe punësimet partiake ndër tjera.
“Apo ashtu kishim menduar? Sepse mbetjet e tyre për fatin tonë të keq ende po sorrollaten nëpër Kosovë siç është puna me këtë mbetjen Faruk Mujka i cili së pari iu bashkua Vetëvendosjes që kishte kohë që ishte shndërruar në azil rehabilitimi të secilit "shqiptar të ndershëm, jugosllavofil e serbofil" dhe tani qenka rehatuar si kryeshef i Ibër-Lepencit përkundër thirrjeve të kahmotshme të Vetëvendosjes dhe Albin Kurtit se do ta luftonin nepotizmin dhe punësimet partiake ndër tjera. Mirë se vini në Kosovën distopike”, ka përfunduar Haliti.
