Xhandarmëria serbe demoloi shtëpitë e ish-ushtarëve të UÇPMB – Pamje nga bastisja
12 shtëpi të ish-ushtarëve të Ushtrisë Çlirimtare për Preshevë, Medvegjë dhe Bujanovc, janë bastisur nga ana e xhandarmërisë serbe.
Kjo u konfirmua po ashtu edhe nga njëri prej ish-ushtarëve të UÇPMB-së, Nadir Sefedini.
“Po, janë thyer 12 objekte në Bujanovc dhe Zarbicë. Ngjarja ka ndodhur të hënën më 6 mars”, tha Sefedini për Klankosova.
Tashmë janë publikuar edhe pamje të shtëpive të demoluara.
Këtë e ka konfirmuar edhe nënkryetari i Bujanocit, Shqiprim Musliu.
POSTIMI:
Në emër të Lëvizjes së Progresit Demokratik reagojmë fuqishëm ndaj bastisjeve dhe presionit të qytetarëve shqiptarë e në veçanti ndaj familjes së z.Nadir Sefedinit nga xhandarmeria serbe.
Dhuna të cilën e kanë ushtruar në mëngjesin e 6 marsit nuk e justifikon arsyen në letër, por vetëm qëllimin e njejtë e me veprime të përsëritshme për frikësimin e banorëve nëpërmjet dhunës psiqike e fizike ndaj qytetarëve shqiptarë e pronave të tyre.
Këto veprime kanë vetëm një qëllim final, pasigurinë e qytetarëve duke rrezikuar paqen dhe stabilitetin në Luginë të Preshevës por edhe në rajon. Për rastin në fjalë jemi duke i njoftuar autoritetet ndërkombëtare si dhe qeveritë në Kosovë dhe Shqipëri, që të ndërmarrin masa konkrete ndaj veprimeve të tilla antinjerëzore e antishqiptare.
