Takimi i shtatë: Në Bruksel sërish diskutohet për dinarin
Zv/kryeministri i Kosovës, Besnik Bislimi, e drejtori i zyrës për Kosovën në Serbi, Petar Petkoviq, sot do të takohen sërish në Bruksel.
Dhe tema, sërish është e njëjtë. Gjetja e zgjidhjes për dinarin.
Lajmin e kishte bërë të ditur gjatë javës zëdhënësi i BE-së, Petar Stano.
“Kryengociatorët do të takohen të mërkurën këtu në Bruksel, dhe do të vazhdojnë diskutimet për gjetjen e zgjidhjes së përkohshme të qëndrueshme për personat e prekur nga vendimi i Bankës Qendrore të Kosovës për operacionet me para të gatshme. Dhe në pritje të këtij takimi të mërkurën, Bashkimi Evropian pret që të dyja palët të tregojnë fleksibilitet dhe gatishmëri për të arritur një kompromis”, tha të hënën, zëdhënësi i BE-së, Peter Stano.
Do jetë ky takimi i shtatë me radhë ku diskutohet zbatimi i rregullores së BQK-s. Palët akoma nuk kanë gjetur zgjidhje, teksa në tryezë është ende propozimi për kompromis i prezantuar nga Miroslav Lajçak, në fund të muajit mars.
Me 12 maj, ka kaluar periudha kalimtare e Bankës Qendrore dhe nga e diela, euro është valuta e vetme për transaksione në Kosovë.
Sipas kryeministrit të vendit, Albin Kurti, nëpërmjet rregullores së BQK-së po synohet ligjshmëria, transparenca.
“Banka Qendrore e Republikës së Kosovës, e ka sqaruar se qëllimi është ligjshmëria, transparenca dhe jo ndëshkimi dhe dënimi. Janë ata të cilët janë më lartë se para nesh dhe prin në këtë proces të tranzicionit sa më të lëmuar të kalimit si mjet pagese. Rregullorja e BQK-së nuk është për të dalë kundër dinarit, por për euron si mjeti i vetëm për pagesa në Kosovë”, është shprehur Kurti.
BQK, ka njoftuar se e ka përmbyllur edhe periudhën tremujore tranzitore për siç thuhet, “zbatim i lehtësuar i rregullores për operacione me para të gatshme”.
BQK-ja ka sqaruar, ditë më parë, se pas përmbylljes së periudhës transitore ka licencuar tetë degë të institucioneve financiare në komunat me shumicë serbe, në Leposaviq, Zveçan, Graçanicë, Shtërpcë dhe një në Shillovë të Gjilanit, duke vendosur edhe 38 bankomatë apo pajisje të ngjashme të vetëshërbimit financiar.
Vendimi për dinarin kishte shkaktuar shumë reagime nga ndërkombëtarët, duke kërkuar nga qeveria që të bëjnë një fushatë më të gjatë informuese për serbët e Kosovës.
Në anën tjetër, përfaqësuesit e qeverisë e vlerësuan vendimin që sipas tyre, është marrë nga institucioni i pavarur në Bankën Qendrore të Kosovës.
Për këtë vendim, Kurti pati me dhjetëra takime me ambasadorët e QUINT-it e zyrtarë të tjerë ndërkombëtarë.
