Shefi i NATO-s pas dërgimit të trupave shtesë në Kosovë: Nuk heqim dorë nga zgjidhja politike
Shefi i misionit të NATO-s, Jens Stoltenberg, ka thënë se dërgimi i trupave shtesë në veri të Kosovës nuk do të thotë se ata kanë hequr dorë nga zgjidhja politike.
Stoltenberg të martën bëri të ditur se NATO-ja do të dërgojë 700 trupa shtesë në veri të Kosovës për të garantuar sigurinë sipas rezolutës së OKB-së. Madje, edhe një batalion është në gatishmëri nëse është nevoja.
Por, sipas tij, zgjidhja politike përmes dialogut është më e duhura.
“Dërgimi i trupave shtesë në Kosovë nuk do të thotë që NATO-ja heq dorë nga zgjidhja politike e tensioneve”, ka thënë Stoltenberg nga Oslo të enjten, transmeton AnadoluAgency.
Përshkallëzimi në veri kulmoi të hënën, më 29 maj, kur trupat paqeruajtëse të KFOR-it ndërhynë në Zveçan “për të shmangur përplasjet mes palëve dhe për të minimizuar rrezikun e përshkallëzimit”, dhe u sulmuan nga disa protestues të dhunshëm, që qeveria e Kosovës thotë se ishin “banda kriminale serbe”.
Për këtë temë, pritet të diskutohet edhe sot në Moldavi. Atje kancelari gjerman Scholz dhe presidenti francez, Macron pritet të takohen me presidente Vjosa Osmani.
Stoltenberg më herët ka thënë se dhuna kthen prapa Kosovën dhe regjionin. Ka bërë thirrje që Prishtina dhe Beogradi të marrin hapa konkretë për qetësimin e situatës.
Reagimet ndërkombëtare kundër Kosovës erdhën pas aksioneve të Policisë së Kosovës, më 26 maj, në tri komunat në veri të Kosovës, Zubin Potok, Zveçan dhe Leposaviq, për të siguruar qasjen në objektet komunale të kryetarëve të ri të këtyre tri komunave.
Reagime të ashpra ka pasur edhe nga Shtetet e Bashkuara të Kosovës, duke e përjashtuar Kosovën nga ushtrimi Defender 2023.
Kryeministri i Kosovës, Albin Kurti, ka thënë se tërheqja e Policisë mund të bëhet vetëm pas tërheqjes së bandave kriminale.
Në anën tjetër, protestat në veri po vazhdojnë edhe sot.
Atje situata për momentin raportohet të jetë e qetë.
