SHBA u kërkon qytetarëve të saj të largohen menjëherë nga Rusia

SHBA u ka thënë qytetarëve të saj që të largohen menjëherë nga Rusia për shkak të luftës në Ukrainë dhe rrezikut të arrestimit ose ngacmimit arbitrar nga agjencitë ruse të zbatimit të ligjit, raporton The Guardian.

Në një deklaratë, ambasada amerikane në Moskë tha: Qytetarët amerikanë që banojnë ose udhëtojnë në Rusi duhet të largohen menjëherë. Tregoni kujdes të shtuar për shkak të rrezikut të ndalimeve të gabuara. Mos udhëtoni në Rusi.

SHBA ka paralajmëruar vazhdimisht qytetarët e saj që të largohen nga Rusia. Paralajmërimi i fundit i tillë publik ishte në shtator pasi Presidenti Vladimir Putin urdhëroi një mobilizim të pjesshëm.

“Shërbimet ruse të sigurisë kanë arrestuar shtetas amerikanë me akuza të rreme, kanë veçuar shtetasit amerikanë në Rusi për ndalim dhe ngacmim, u kanë mohuar atyre trajtim të drejtë dhe transparent dhe i kanë dënuar në gjyqe sekrete ose pa paraqitur prova të besueshme”, raportohet të ketë thënë ambasada.

“Autoritetet ruse zbatojnë arbitrarisht ligjet lokale kundër punonjësve fetarë shtetas amerikanë dhe kanë hapur hetime të dyshimta penale kundër shtetasve amerikanë të përfshirë në veprimtari fetare”.

Në anën tjetër, zyrtarët ukrainas kanë thënë se Rusia po përgatitet të nisë një ofensivë të re rreth njëvjetorit të luftës.