Rohde: Duhet kohë për të formuar një qeveri, me rëndësi të jetë e qëndrueshme

Ambasadori i Gjermanisë në Kosovë, Jorn Rohde, ka theksuar rëndësinë e formimit të një qeverie të qëndrueshme në vend, duke e krahasuar situatën aktuale politike me zhvillimet në Gjermani pas zgjedhjeve të fundit.

Në një deklaratë për Ekonomia Online, Rohde tha se krijimi i një qeverie kërkon kohë, por se stabiliteti politik dhe një shumicë solide janë thelbësore për funksionimin e demokracisë dhe përballimin e sfidave globale.

“E dini, si në vendin tim, sapo patëm zgjedhje. Duhet kohë për të formuar një qeveri. Më e rëndësishmja është që të kemi një qeveri të qëndrueshme me një shumicë të mirë dhe konsensus për të formuar qeverinë e re. Dhe kështu po shoh drejt Gjermanisë. Shpresojmë të formojmë një qeveri deri javën e ardhshme. Dhe mendoj se është e vetëkuptueshme, e përmenda edhe në një intervistë javën e kaluar, që, e dini, veçanërisht në këto kohë të paqëndrueshme gjeopolitike, ajo që është në interes të vendeve dhe të popujve është të kenë qeveri të qëndrueshme”, tha Rohde për Ekonomia Online.