Pyetja që po e bëjnë të gjithë: Pse nuk e qiti në votim Avni Dehari raportin? Heshtje në VV

Një pyetje sot po i përbashkon të gjithë. Analistë, shoqëri civile e gazetarë.

Pavarësisht se ishin 100 deputetë në sallë, kryesuesi Avni Dehari, deputet i VV-së, nuk e hedhi në votim raportin për verifikimin e mandateve të deputetëve.

Ai fillimisht ftoi në konsultime partitë, veprim i cili për opozitën ishte në kundërshtim me rregulloren.

Pasi u kthye nga takimi, Avni Dehari bëri diçka krejt të pazakontë.

Nuk e hudhi në votim raportin, dhe e ndërpreu sërish mbledhjen. Kjo duke e arsyetuar me mungesën e konsultimeve.

Pavarësisht se ishin në sallë 100 deputetë.

Për t’u miratuar ky raport, do të duheshin vetëm shumica e thjeshtë. Pra, shumica e deputetëve që ishin prezentë.

Pavarësisht insistimit të gazetarëve në konferencë, për këtë nuk dhanë përgjigje përfaqësuesit e Vetëvendosjes.

Gazetarja e Nacionales, Besarta Hoti i pyeti ata se a ishin në dijeni që me 52 vota, do të kalohej kjo procedurë.

Këtu, ish-ministrja e Drejtësisë, Albulena Haxhiu u përgjigj:

“Është jashtëzakonisht e rëndësishme që të ketë unifikim të qëndrimeve të grupeve parlamentare”.

Mimoza Kusari – Lila e Alternativës po ashtu refuzoi të jepte përgjigje konkrete, duke përmendur zgjedhjet e reja.

“Shiqoni, edhe një herë, në aspektin procedural, ju lutem a ka mundësi që ta kthejmë aty ku shimica e pyetjeve janë, raporti s’u rikthye në votim për arsye se ka pasë kuorum, por ai është rrëzu me votë, për procedurën tutje duhet të deklarohet, nuk mundemi me e thënë hidheni në votim”

Ne kishim kuorum, dokumenti është rrëzu, tani nëse opozita nuk dëshiron të bisedojmë fare, atëherë po mbesim kështu, ose po drejtohemi në zgjedhje të reja” – tha ajo, transmeton Nacionale.

Dimal Basha ndërkaq nuk u përgjigj fare në asnjë prej pyetjeve, duke bërtitur para gazetarëve në lidhje me Lidhjen Demokratike të Kosovës.

“Unë mendoj që një problem është te LDK, për mosvotimin e verifikimit të mandatave, ata janë të vetmit që kemi dhënë dëshmi që kanë vjedhë vota, kanë deputet jolegjitim në këtë Kuvend, ka njerëz që janë votu e qëndrojnë jashtë.

Edhe përfaqësues nga opozita, kanë insistuar se ky raport do të duhej të hidhej në votim.

Kryetari i PDK-së, Memli Krasniqi, tha se fakti që nuk doli në votim, tregon që VV-ja s’i ka votat.

E LDK-ja, me një komunikatë për media, theksoi se pushteti nuk e respektoi rregulloren e Kuvendit.

Edhe organizata joqeveritare KDI, theksoi se ky raport do të duhej të dilte edhe sot në votim.

Kjo ishte e përcaktuar edhe me skenarin që u publikua në media, por i cili duket se nuk i bëri përshtypje pushtetit.