PSD me aksion simbolik para Qeverisë, kërkon përgjegjësi për vdekjet në vendet e punës
Partia Socialdemokrate ka vazhduar me aksionet simbolike kundër Qeverisë Kurti.
Para ndërtesës së Qeverisë së Kosovës, kjo parti sot ka mbajtur një aksion simbolik, duke kërkuar përgjegjësi për vdekjen e punëtoreve në vende e tyre të punës.
Anëtarja e Kryesisë së PSD-së, Donjeta Demolli, ka bërë me dije se derisa punëtoret vazhdojnë të vdesin, Qeveria nuk merr asnjë veprim.
“Ndërsa punëtorët e ndërtimit punojnë dhjetar metra mbi tokë pa siguri fizike, me paga t’ulta, e pa sigurim shëndetësor. Qeveria e Kosovës nuk e ka lëvizë gjendjen e mjerueshme që e ka gjet, as për një centimetër. Sa ishte opozitar Albin Kurti na fliste për solidaritet e organizim, sot praktikat shfrytëzuese fillojnë në zyrën e tij”, ka thënë ajo para mediave.
Ajo ka treguar se vetëm në pjesën e parë të këtij viti, 12 punëtor kanë humbur jetën.
“Vetëm në 6 muaj e parë të këtij viti 12 punëtorë e kanë humbë jetën në vendin e punës. Një nga ta ndërsa ishte duke punuar në një projekt të qeverisë. Për këtë qeveri, këto raste janë veç numra regjistrash në spitalet e shtetit”, është shprehur ajo, raporton EO.
