"Personalitet historik": Qëndrimet e zbutura të Albin Kurtit ndaj Hashim Thaçit në muajt e fundit
Sot po mbahet “Marshi për Drejtësi” në shenjë solidarizimi me ish-liderët e UÇK-së që ndodhen në Hagë. Marshin po e mbështet edhe Vetëvendosja, partia e drejtuar nga Albin Kurti. Por, qysh u zbut Kurti në raport me Thaçin përgjatë dy muajve të fundit?
I pyetur në lidhje me Marshin e sotëm, kryeministri i Kosovës tha të premten se “nuk kishte dëgjuar” për të. Megjithatë, pak orë më pas partia e tij shprehur mbështetje.
Sidoqoftë, cili ishte raporti i Kurtit me Thaçin me anë të disa deklaratave?
Personalitet historik
Për një gazetë shqiptare në Maqedoni, Kurti para disa javësh e vlerësoi si “personalitet historik” ish-presidentin dhe ish-kryeministrin e Kosovës duke çuditur opinionin në Kosovë.
Kurti u pyet për figurën e Demaçit, Rugovën dhe Thaçin. Çka i bashkonte këto tri figura, dhe ku kishin gabuar në procesin e shtetndërtimit?
““Në këtë kohë festimesh e përvjetorësh jubilarë, këto tre figura duhen kujtuar me respekt për kontributet e tyre të cilat kanë qenë sidoqoftë thelbësisht të ndryshme, edhe pse në të njëjtin drejtim: atë të pavarësisë së Kosovës. Pikërisht kjo është gjëja që i bashkon këto tre figura të ndryshme nga njëra-tjetra. Nuk më lejohet mua si kryeministër i të gjithë qytetarëve të Kosovës të komentoj apo të bëj kritika ndaj personaliteteve historike, në kuadër të kontributeve të tyre për Kosovën. Le të merren me këtë gjë historianët. Unë e kam për detyrë t´i respektoj e t´u jem mirënjohës që secili ka dhënë aq sa ka ditur e mundur.” – kishte thënë kryeministri i Kosovës.
Të rrahurat e zemrave
Ish-kundërshtari i madh i Hashim Thaçit në politikë kishte pasur një fjalim mjaft domethënës edhe në përvjetorin e 15 të Pavarësisë së Kosovës, më 17 shkurt.
Ai kishte bërë referencë me fjalimin e Thaçit më 17 shkurt 2008.
“Tani, më lejoni, që duke ndjerë rrahjet e zemrës së stërgjyshërve tanë në veshët tonë unë me privilegjin më të madh do ta lexoj deklaratën e pavarësisë së Kosovës...” – thoshte kryeministri Thaçi në atë ditë.
“Duke e kujtuar atë ditë të ftohtë të 17 shkurtit 2008 teksa festojmë ditëlindjen e sivjetme të shtetit të Kosovës, 15 vjet më pas vazhdojmë të ndjejmë të rrahurat e zemrave të të gjithë atyre që luftuan dhe punuan për atë ditë...” – tha Kurti 15 vjet më vonë.
Kurti në atë fjalim kishte pasur të tjera fjalë që mund të cilësohen si pozitive për Thaçin.
Krahu politik
“Republika jonë erdhi nga lufta e lavdishme e ushtarëve të Ushtrisë Çlirimtare të Kosovës që me luftën e tyre të drejtë arritën t’i përfshijnë edhe aleatët ndërkombëtarë që më 1999 na ndihmuan të çlirohemi nga Serbia pushtuese...” - tha Kurti mes tjerash.
Kush ishin ushtarët e UÇK-së që bënin përpjekje të përfshinin aleatët ndërkombëtarë dhe që komunikuan me ta? Në krye të tyre ishte Hashim Thaçi, si drejtor i Drejtorisë Politike të UÇK-së, e që më vonë do të bëhej edhe udhëheqës i delegacionit të UÇK-së në Rambouillet.
“Ishin po këta aleatë ndërkombëtarë që më 2008 po ata faktorë vendorë në koordinimin e të gjitha atyre veprimeve të nevojshme politike dhe proceseve të domosdoshme diplomatike që kulmuan me shpalljen e pavarësisë së Kosovës në vitin 2008.” – kishte thënë kryeministri.
Pra, Kurti flet për “po ata faktorë vendorë” duke pasur ndërmend pikërisht ish-ushtarët e UÇK-së që arritën t’i përfshijnë ndërkombëtarët. Është e qartë se përsëri ai po i jepte merita ish-presidentit Thaçi.
Nuk dihet se për çfarë arsyesh Kurti ka zbutur qëndrimet e tij ndaj Hashim Thaçit në muajt e fundit.
