Osmani, deputetes britanike: Faleminderit për ekspozimin e agjendës destruktive të Serbisë

Në një postim në rrjetin social “X”, Presidentja e Republikës së Kosovës, Vjosa Osmani, ka shprehur mirënjohje ndaj deputetes britanike Alicia Kearns për përpjekjet e saj për të ekspozuar agjendën e dëmshme dhe destabilizuese të Serbisë.

Osmani më tej ka premtuar të ruajë vlerat e përbashkëta dhe të forcojë demokracinë në vend.

“Faleminderit Alicia Kearns për përpjekjet tuaja të palodhura në ekspozimin e agjendës destruktive dhe destabilizuese të Serbisë. Falënderoj të gjithë nënshkruesit për mbështetjen e tyre të fuqishme për sovranitetin dhe demokracinë e Kosovës. Së bashku, ne do të ruajmë vlerat tona të përbashkëta dhe do të forcojmë demokracinë!”, ka shkruar Osmani.

Në postimin e Kearns, të cilin Osmani e ka shpërndarë, ajo ka shkruar se “ne kemi nevojë për diplomaci parandaluese, ku të sigurohemi që të ketë ekuilibër në marrëdhëniet tona dhe të mos përsërisim gabimet e së kaluarës”.