Maqedonci nga Budapesti: Anëtarësimi në NATO e BE, i paalternativë
Anëtarësimi i Kosovës në Organizatën e Atlantikut të Veriut (NATO) dhe në Bashkimin Evropian “nuk ka alternativë” si orientimi dhe aspirata kyçe strategjike, ka thënë ministri kosovar i mbrojtjes, Ejup Maqedonci, duke folur nga Budapesti ku po merr pjesë në Forumin e Sigurisë që po zhvillohuet mes Ministerialit të Bashkëpunimit të Mbrojtjes së Evropës Qendrore dhe Ballkanit Perëndimor.
“Shfrytëzova rastin që të pranishmit t’i informoj për zhvillimin e kapaciteteve të Forcës së Sigurisë së Kosovës dhe rrugën përpara bazuar në Planin e Përgjithshëm të Tranzicionit si dhe nevojave konform zhvillimeve të fundit në ambientin e përgjithshëm të sigurisë”, ka shkruar Maqedonci në Facebook.
Postimi i plotë:
Në kuadër të vizitës zyrtare në Hungari për pjesëmarrje në ministerialin e Bashkëpunimit të Mbrojtjes së Europës Qendrore dhe Ballkanit Perëndimor, kisha kënaqësinë që gjithashtu të marr pjesë në Forumin e Sigurisë së Budapestit, që po zhvillohet për herë të parë në kryeqytetin hungarez.
Së bashku me Ministrin e Mbrojtjes së Malit të Zi, z. Dragan Krapoviq, isha pjesë e panelit në të cilin u diskutua për "Europën Qendrore dhe Ballkanin Perëndimor në arkitekturën e re europiane të sigurisë". Në fjalën time shpreha qëndrimin se orientimi strategjik dhe aspirata e Republikës së Kosovës për anëtarësim në NATO dhe BE nuk ka tjetër alternativë.
Shfrytëzova rastin që të pranishmit t'i informoj për zhvillimin e kapaciteteve të Forcës së Sigurisë së Kosovës dhe rrugën përpara bazuar në Planin e Përgjithshëm të Tranzicionit si dhe nevojave konform zhvillimeve të fundit në ambientin e përgjithshëm të sigurisë.
Gjatë qëndrimit në Budapest gjithashtu zhvillova takim me Ministrin e Mbrojtjes së Hungarisë, z. Kristóf Szalay-Bobrovniczky. Me homologun hungarez përveç situatës së përgjithshme të sigurisë dhe impaktin e tyre ne rajonin tone, gjithashtu diskutuam për mundësitë e thellimit të bashkëpunimit dypalësh në fushën e mbrojtjes.
