Lekaj: Qeveria Kurti është dështim, koalicioni ‘AAK-Nisma’ do të jetë befasia e zgjedhjeve

Deputeti i AAK-së, Pal Lekaj, është shprehur optimist për rezultatin e koalicionit ‘AAK-Nisma’ në zgjedhjet e ardhshme parlamentare.

Ai ka bërë me dije se ky koalicion do të jetë befasia e këtyre zgjedhjeve.

Në një intervistë për gazetën Nacionale, Lekaj ka thënë se koalicioni në fjalë mund të arrijë deri në 20 deputetë.

“Duke u bazuar në punën që kemi bërë, me opozitarizmin institucional në Kuvend, por edhe në tryezat që kemi organizuar dhe informimin e qytetarëve, mendoj se do të jemi befasia e mirë e zgjedhjeve. Nuk mund të flas se sa përqindje, por mendoj se Aleanca bashkë me Nismës dhe të tjerët do të jemi befasia e mirë në këto zgjedhje”, ka thënë Lekaj.

Nëse qytetarët vlerësojnë punën e AAK-së dhe mospunën e qeverisë, ka thënë Lekja, ky koalicion mund t`i marrë edhe 20 deputetë.

“Po. E kam thënë edhe unë këtë. Por, nëse gjykojmë realisht, nëse merret për bazë puna e jonë dhe nëse qytetarët e gjykojnë mos punën e qeverisë qaty jemi”, ka thënë Lekaj.

Ai ka mohuar mundësinë që koalicioni është realizuar nga frika se AAK-ja nuk mund të kalojë pragun zgjedhor.

“Dikush mund të bën pyetje a thua ju frikësua Aleanca pragut zgjedhor. Mund të them që jo, ata që janë shqetësuar për këtë çështje kanë qenë gabim. Aleanca është e qëndrueshme. Aleanca ka qenë e qëndrueshme edhe pa Nismën, dhe pa koalicione tjera që i kemi bërë dhe do të jetë e qëndrueshme si çdo herë”, ka thënë Lekaj.

Deputeti i AAK-së ka theksuar se nuk ju beson sondazheve që e nxjerrin VV-në bindshëm si parti të parë.

“Nuk ju besoj shumë sondazhe, sepse ato mund të porositen dhe numrat mund të lëvizin si të duash. Por nëse zbresin në bazë, në komuna, në fshatra, lagje dhe i pyesim qytetarët, me besoni se çdo i dyti qytetar është i pakënaqur me këtë qeveri”, është shprehur Lekaj.

Ndër të tjera, zyrtari i AAK-së ka drejtuar kritika të ashpra për Qeverinë Kurti.

Sipas tij, kjo qeveri nuk ka bërë asgjë për t`u mbajtur në mend.

“S`ka investime të huaja, s`ka investime strategjike, s`ka investime në institucione arsimore. Ka premtuar 157 çerdhe dhe i ka ndërtuar vetëm 4. A është dështim total. Nëse e marrim shëndetësinë. Sot diku 70 për qind e pacientëve tanë ia mësyjnë Maqedonisë, Serbisë, Kroacisë e Turqisë”, është shprehur Lekaj.

Ai ka vlerësuar se Qeveria Kurti ua ka humbur qytetarëve shpresën se mund të bëhet mirë në këtë vend.

“Kjo qeveria ka qenë ndryshim për të keq, jo për të mirë. Në fund, fal kësaj qeverie kanë migruar 150 qytetarë të profileve të ndryshme, nga fushat e ndryshme. Kjo qeveri ua ka humbur shpresën qytetarëve se ky vend mund të ec përpara”, është shprehu Lekaj.

Rrëfimi për “53 milionëshin”

Në këtë intervistë, ish-ministri i Infrastrukturës, Pal Lekaj, ka fplur edhe për dënimin e gjykatës për rastin e njohur si “53 milionëshi”.

Ai e ka vlerësuar si të padrejtë vendimin e Gjykatës Themelore në Prishtinë, me të cilin është dënuar më 3 vite e 8 muaj burgim.

Ai ka bërë me dije se asnjëherë nuk i ka tejkaluar kompetencat e tij dhe nuk e ka keqpërdorur pozitën e ministrit.

Në një intervistë për gazetën Nacionale, Lekaj ka thënë se është i pastër në këtë proces dhe se në fund do të triumfojë e vërteta.

“Asnjë cent. Dhe le ta dinë qytetarët që Pal Lekaj nuk është i akuzuar se ndonjë cent ka shkuar në xhepat e Palit, të familjes time, apo të rrethit tim. Prandaj, jam i pafajshëm në këtë proces, por që jam kurban i politikes ditore, dhe mendoj se është i padrejtë”, ka thënë Lekaj.

Ai ka vlerësuar se nuk ka hyrë në politikë që të korruptohet.

“Historikisht familja e jeme nuk ka pasur nevojë që të korruptohet. Nuk kam hyr në politikë për tu korruptuar. Sepse çdo herë në aspektin e ekonomisë familjare kam qëndruar mirë”, është shprehur deputeti i AAK-së.

Sipas tij, vendimi i shkalles së parë e ka befasuar për të keq.

“Vendimi i shkallës se parë më ka befasuar për të keq. Sepse e konsideroj vetën të pafajshëm, jo vetëm sa për të thënë se jam i pafajshëm, por për të argumentuar atë. Nëse e marrim atë që është shkrua në aktakuzë, mendoj se e kam gabuar adresën. Sepse edhe pse kamë qenë ministër i Infrastrukturës në atë kohë, unë nuk jam shkak i atyre problemeve që i kam gjetur si ministër në vitin 2017”, ka theksuar ai.