Kërkesa e opozitës në Gjykatë Kushtetuese: Të pezullohet vazhdimi i seancave me rendin e ditës të imponuar nga Dehari

AAK, PDK dhe LDK kanë dorëzuar kërkesë për vlerësim në Gjykatë Kushtetuese.

Aty kërkohet që të pezullohet vazhdimi i seancave, sipas tyre, me rendin e ditës që është imponuar nga Avni Dehari.

Opozita ka kundërshtuar faktin që nga votimi i hapur, është kaluar në votim të mbyllur.

Gjithashtu, edhe mosrespektimi i rendit të ditës nga kryesuesi Dehari, për çka opozita ka kërkuar masë të përkohshme.

Haradinaj ka shkruar në Facebook se moskonstituimi i Kuvendit është bërë lojë e turpshme, duke u shprehur se seancat e përsëritura çdo 48 orë “janë bërë model i papjekurisë sonë shtetërore.

“Loja me moskonstituimin e Kuvendit të Kosovës, është bërë e turpshme, jo vetëm për deputetët e zgjedhur nga populli, por edhe për vetë Kosovën si shtet. Seancat e përsëritura në çdo 48 orë, pa asnjë vendim, janë bërë model i papjekurisë sonë shtetërore. Dëmet nga bllokada që po i bëhët konstituimit të Kuvendit, ka edhe pasoja të rënda politike dhe ekonomike për ne si vend e si shoqëri. Konsiderojmë se ndërrimi i mënyrës së votimit në gjysmë të procesit, me diktat të Vetëvendsjes, është shkelje e rëndë e Kushtetutës. Në një situatë të tillë pa rrugëdalje, e vetmja derë na ka mbetur Gjykata Kushtetuese. Prandaj sot, Grupi ynë Parlamentar me mbështetjen edhe të deputetëve të LDK dhe të PDK, i është drejtuar asaj për të saktësuar shkeljet kushtetuese në këtë proces dhe për të na dhënë zgjidhje se si të dalim nga ky ngërç”, ka shkruar kreu i AAK-së.