Irani goditet nga një tërmet prej 5,2 shkallësh

Një tërmet me fuqi prej 5,2 shkallësh ndodhi të martën në provincën juglindore të Iranit, Fars.

Sipas Qendrës Kombëtare Sizmologjike të Iranit, qendra e këtij tërmeti ishte në fshatin Dorz, raporton agjencia “Reuters”.

Ndërkohë epiqendra e tërmetit raportohet se ishte dhjetë kilometra nën sipërfaqen e tokës.

Nuk pati raportime për pasoja në njerëz ose dëme material.

Në fillim të këtij muaji, Turqia dhe Siria u goditën nga dy tërmete të fuqishme, duke shkaktuar mbi 47 mijë viktima.

Një tërmet i ri ndodhi të hënën në zonën kufitare mes këtyre dy shteteve, duke lënë tetë të vdekur.