Hovenier për propozimin e Ramës për Asociacionin: Serioz dhe i menduar mirë
Ambasadori i ShBA-së, Jeff Hovenier, është intervistuar nga gazetari Adriatik Kelmendi. Në intervistën për emisionin “Rubikon” të Klan Kosovës, Hovenier ka folur për situatën në veri të Kosovës dhe marrëdhënien e trazuar të Qeverisë Kurtit me aleatët perëndimor, përfshirë ShBA-në.
Në këtë intervistë, ambasadori amerikan ka folur edhe për draft-statutin e Asociacionit që e dorëzoi kryeministrit i Shqipërisë, Edi Rama.
Sipas Hovenierit, draft-statuti i Ramës është serioz dhe i menduar mirë.
“Po, gjëja e parë që do ta thosha është se kam pasur mundësi ta lexoj, por jo në detaje, propozimin për Asociacionin e komunave me shumicë serbe që Rama e ka prezantuar, është serioz, është i menduar mirë, por ka shumë ide dhe shumë mënyra se si mund të bëhet. Është një propozim i bërë nga Friedrich Ebert Foundation, që ishte gjithashtu serioz dhe i realizuar me kujdes. Pra ajo që do të thosha është se nuk kemi mungesë të ideve të mira se si mund të bëhet kjo”, ka thënë ai, transmeton Klan Kosova.
