Hoti reagon ashpër: Tendenca për përdorimin e RTK-së kundër mediave kritike, duhet të marrë përgjigje
Deputeti i LDK-së, Avdullah Hoti, ka reaguar ashpër pas zhvillimeve të fundit në RTK, dhe raportimit të rrejshëm kundër Nacionales e Periskopit.
Hoti ka thënë se zhvillimet janë tepër shqetësuese, si dhe përdorimi i RTK-së kundër mediave kritike, duhet të marrë përgjigje.
Deputeti i LDK-së ka kërkuar nga Opozita që me veprime ligjore, ta ndërprejë udhëheqjen e mediumit nga komisarët e Kurtit.
Postimi:
Zhvillimet në mediumin e vetëm publik të Republikës së Kosovës, RTK, janë tepër shqetësuese.
Tendenca për përdorim të këtij mediumi publik kundër gazetarisë kritike duhet të marrë përgjigje sipas kushtetutës dhe ligjit.
Është e qartë se Bordi dhe menaxhmenti i RTK-së nuk kanë as fuqi dhe as vullnet për tu marrë me situatën e krijuar.
Është obligim shtetëror i Kuvendit të Kosovës të ndërpresë degradimin e mediumit publik.
Është obligim shtetëror i opozitës në veçanti të ndërmarrë veprimet kushtetuese e ligjore, në Kuvend dhe jashtë Kuvendit, për të ndërprerë udhëheqjen e mediumit publik nga ‘komisarët politik të Kurtit’ përmes kukullave të tyre të vendosura në Bordin dhe menaxhmentin e RTK-së.
Komisionet përkatëse Parlamentare janë vonuar që të ftojnë për raportim Bordin bashkë me menaxhmentin e RTK-së dhe Drejtorin e AKI-së, si hap i parë në veprimet që duhet të ndërmerren.
