Haxhiu e shpërndanë në Instagram karikaturën ku kritikohet KFOR-i
Albulena Haxhiu, ministre e Drejtësisë, ka shpërndarë një karikaturë të gazetës Koha, e cila e kritikon KFOR-in për reagimin e saj kundrejt kidnapimit të tre policëve të Kosovës nga Serbia.
Zonja Haxhiu nuk ka shkruar asnjë shkronjë si komentim, megjithatë fotografia e postuar flet mjaftueshëm edhe pa mendimin e “Zonjës së Hekurt të Drejtësisë” (siç e kishte quajtur seriozisht ish-moderatori Rron Gjinovci).
Ndryshe, karikatuara e publikuar nga Koha, vjen pas kritikave të kryeministrit Albin Kurti për mos raportimin e KFOR-it në lidhje me kidnapimin e tre zyrtarëve policorë të Kosovës nga Serbia.
Por çfarë tha KFOR-i mbrëmë?
Misioni i KFOR-it është deklaruar në lidhje me kidnapimin e tre policëve të Kosovës nga Serbia, ngjarje që ndodhi dje.
Në një përgjigje për Nacionalen, KFOR-i ka deklaruar se nuk ka qenë në zonën ku janë “arrestuar” tre policët.
“Misioni i KFOR-it i drejtuar nga NATO, nuk ishte në zonë kur tre policë të Policisë së Kosovës u arrestuan dje nga Policia e Serbisë. KFOR-i ka dërguar një ekip në zonë dhe ka vendosur kontakte me përfaqësuesit e institucioneve në Kosovë dhe të autoriteteve serbe. KFOR-i është gjithashtu në kontakt të rregullt me misionin e udhëhequr nga BE-ja për Sundimin e Ligjit, EULEX.” – thuhet në përgjigjen e tyre.
Tutje, KFOR-i u ka bërë thirrje Kosovës dhe Serbisë të ulin tensionet menjëherë.
“Ne u bëjmë thirrje të dyja palëve që të ulin menjëherë tensionet dhe të përmbahen nga veprimet e njëanshme që mund të çojnë në përshkallëzim të mëtejshëm.” – thuhet tutje.
