Hamza: 25 vjet liri, mirënjohja për dëshmorët, Çlirimtarët, NATO-n e SHBA-në, është e përjetshme
Kandidati i PDK-së për kryeministër, Bedri Hamza, ka uruar 25 vjetorin e Ditës së Çlirimit të Kosovës.
Hamza ka falënëderuar “Çlirimtarët që ende po sakrifikojnë, mirënjohja për NATO-n, SHBA-në dhe të gjitha shtetet partnere është e përjetshme!”
“Rruga drejt lirisë nisi me vendosmërinë e palëkundur të burrave dhe grave, të rinjve dhe të moshuarve të vendit tonë, që refuzuan ta pranojnë padrejtësinë dhe shtypjen, ndërsa me përkrahjen e madhe ndërkombëtare fitoi kauza jonë e drejtë!” – ka shkruar ndër të tjera ai.
Shkrimi i plotë në Facebook:
25 vjet liri, ndërtim, zhvillim. 25 vjet koordinim, bashkëjetesë dhe fuqizim të shtetit ligjor.
E madhe ishte sakrifica për këtë ditë. E të mëdha janë edhe arritjet në këto 25 vjet.
Nga përpjekjet për mbijetesë, me dashurinë e madhe për atdheun, me bashkëpunimin e ngushtë me bashkësinë ndërkombëtare, ne ia dolëm ta bëjmë shtetin tonë. I ndërtuam gjithë mekanizmat shtetërorë nga fillimi, duke e rindërtuar vendin, me të gjithë e për të gjithë qytëtarët, si një shtëpi të përbashkët, ku respektohen liritë dhe të drejtat e secilit.
Dëshmorët përherë na frymëzojnë me veprat e tyre, ndërsa martirët na e kujtojnë çmimin e lirisë.
Sot u bënë 25 vjet liri, por mirënjohja për ta dhe për Çlirimtarët që ende po sakrifikojnë, mirënjohja për NATO-n, SHBA-në dhe të gjitha shtetet partnere është e përjetshme!
Rruga drejt lirisë nisi me vendosmërinë e palëkundur të burrave dhe grave, të rinjve dhe të moshuarve të vendit tonë, që refuzuan ta pranojnë padrejtësinë dhe shtypjen, ndërsa me përkrahjen e madhe ndërkombëtare fitoi kauza jonë e drejtë!
KOSOVË, përgjithmonë e gëzofsh lirinë!
