Halimi për letrën e Sveçlës drejtuar Gjermanisë: Dëmton rëndë imazhin e Kosovës
Ministri i Punëve të Brendshme të Kosovës, Xhelal Sveçla ka drejtuar një kërkesë shtetit të Gjermanisë, duke kërkuar që kosovarët të lejohën të hynë në Gjermani me pasaportë të skaduar.
Kërkesa e siguruar nga Kallxo.com, thuhet se ka ardhur pas mungesës së materialit për pasaporta.
Tutje në kërkesë thuhet se foshnjat e sapolindura në Gjermani nga prindër me leje qëndrimi në Gjermani, të cilët kanë fluturuar në Kosovë për të marrë pasaportë RKS të paraqiten me keto dokumente: leje qëndrimi e vlefshme gjermane e njërit prej prindërve që udhëton me foshnjën, certifikata gjermane e lindjes së foshnjës, certifikata kosovare e lindjes.
Halimi në një prononcim për Nacionalen, ka thënë se nuk është faji te pandemia por te paaftësia e Qeverisë, e cila për gjysmë mandati nuk arriti ta zgjidhë këtë problem.
Tutje Halimi ka thënë se kjo letër e dëmton rëndë imazhin e Kosovës te një vend mik si Gjermania, duke tërhequr vërejtjen se Qeveria duhet ta dijë se para synimit për anëtarësim në organizata të huaja, duhet të i zgjidh probleme të tilla bazike.
Reagimi i plotë i Halimit:
Do të ishte komike po të mos kishte pasoja në rëndimin e jetesës së qytetarëve dhe bashkatdhetarëve tanë, si dhe në dëmtimin e imazhit të shtetit tonë, letra e Ministrit të Brendshëm drejtuar shtetit gjerman.
Përmes kësaj letre, ai i kërkon Gjermanisë që t'i lejojë qytetarët dhe mërgimtarët e Kosovës të udhëtojnë me pasaportë të skaduar deri në qershor 2023.
Është e pabesueshme që një qeveri e tërë të mos mund ta zgjidh një problem kaq bazik për gati gjysmë mandati.
Shumë shtete kanë hasur në probleme me furnizim në shumë artikuj—përfshirë letrën që përdoret për shtypjen e pasaportave dhe dokumenteve tjera; mirëpo nuk kanë arritur në nivele të tilla paaftësie. Pra, nuk është problemi te pandemia, por te paaftësia.
Përveç pengesave në udhëtim për shtetasit tanë, kjo papërgjegjësi dëmton rëndë imazhin e Kosovës në sytë e një shteti mik si Gjermania. Para se t'ia mësyjë anëtarësimit në BE, Qeveria e Kosovës duhet të zgjidh probleme të tilla bazike, të shkaktuara nga paaftësia e kësaj të fundit.
