"Vrasje, dëbim të shqiptarëve, plaçkitje": Dushko Arsiq dënohet me 13 vite burgim për krime lufte
Sot është mbajtur seanca ndaj Dushko Arsiqit, serbit që akuzohet për krime lufte gjatë luftës në Kosovë në vitin 1999. Gjykata Themelore në Prishtinë e ka shpallur fajtor Arsiqin për krime lufte ndaj shqiptarëve në luftën e fundit. Trupi gjykues i Gjykatës Themelore e ka dënuar Arsiqin me 13 vite burg.
Sipas aktakuzës, Arsiq ngarkohet se ka marrë pjesë në vrasjen e shqiptarit Brahim Shala më 20 prill 1999 në Butovc të Prishtinës. Ai gjithashtu akuzohet se ka malltretuar fizikisht dhe psiqikisht të dëmtuarin Artan Krasniqin. Arsiq akuzohet se ka qenë pjesë e policisë serbe dhe grupeve paramilitare, ndërsa aktakuza e bënte përgjegjës Arsiqin për keqtrajtim të civilëve shqiptarë, plagosje e vrasje.
Më saktë, Arsiq akuzohej se më 20 prill të vitit 1999 ka marrë pjesë në vrasjen e B.Sh në Butovc të Prishtinës, si dhe ka maltretuar fizikisht e psiqikisht të dëmtuarin A.K.
Arsiq akuzohej, siç raportone Betimi për Drejtësi, “se ka marrë pjesë në ekzekutimin e tani të ndjerit B.Sh., ashtu që më 20 prill 1999, në fshatin Butovc të Komunës së Prishtinës, në vendin e quajtur “varrezat e Maqedoncve”, derisa viktima kishte qenë duke ecur, e kanë gjuajtur me pushkë automatike dhe pasi që e kanë goditur, e kanë urdhëruar të dëmtuarin A.K., i cili atë kohë ishte 15 vjeçar, që trupin e viktimës B.Sh., ta mbajë në shpinë edhe pse i dëmtuari ka pasur lëndime të konsiderueshme fizike për shkak se i akuzuari paraprakisht e kishte maltretuar fizikisht dhe psiqikisht, veprime këto të sanksionuara sipas ligjeve vendore, zakoneve të luftës dhe Konventave Ndërkombëtare të Gjenevës dhe Protokolleve Shtesë.”
Aktakuza e bënte përgjegjës Arsiqin edhe për keqtrajtimin e civilëve shqiptarë, plagosje, si dhe për vrasje. Në aktakuzën, që u ngrit më 2 nëntor të 2022, Prokuroria Speicale shkruante se ekziston dyshimi i bazuar se Arsiq në bashkëryerrje me pjesëtarë të tjetër policisë serbe dhe grupeve të tjera paramilitare, ka marrë pjesë në dëbimin dhe shpernguljen e qytetarëve nga Prishtina dhe rrethina.
Tutje, në aktakuzë, Arsiq ngarkohej edhe me veprën penale se bashkë me një grup tjetër kishte filluar plaçkitjen e shtëpive dhe se ia ka vënë zjarrin pronës së shqiptarëve, duke pasur si qëllim dëmtimin e tyre.
Sjellim ndër mend që Arsiq ishte deklaruar i pafajshëm për akuzat për krime lufte në drejtim të tij.
“Ashtu siç kam deklaruar edhe paraprakisht, asnjëherë nuk kam qenë në Butovc apo në Kolovicë dhe nuk e di dhe nuk mund të them asgjë për këtë ngjarje”, kishte deklaruar Arsiq.
