Dy viktima në aksidente trafiku e 15 persona të arrestuar, për 24 orë në Kosovë
Dy viktima në aksidente trafiku e 15 persona të arrestuar, për 24 orë në Kosovë
Policia e Kosovës ka publikuar raportin 24-orësh, ku bëhet e ditur për një sërë incidentesh kriminale dhe ngjarjesh në disa rajone të vendit, përfshirë raste të dhunës në familje, vjedhjeve, armëmbajtjes pa leje dhe aksidenteve me pasoja fatale.
Sipas raportit, gjatë kësaj periudhe janë shënuar dy aksidente trafiku me fatalitet, një në Prizren dhe një në Vushtrri, ku si pasojë kanë humbur jetën dy persona. Po ashtu, janë regjistruar 23 aksidente me të lënduar dhe 35 të tjera me dëme materiale.
Në rajonin e Prishtinës, një person është arrestuar për kanosje ndaj ish-bashkëshortes dhe djalit, ndërsa një tjetër rast i dhunës në familje është raportuar në Obiliq, ku viktima ka pranuar trajtim mjekësor. Gjithashtu, janë raportuar raste të vjedhjeve dhe armëmbajtjes pa leje.
Në Gjilan, një person dyshohet për vrasje të rëndë në tentativë dhe ndodhet në arrati, ndërsa një tjetër është arrestuar për kanosje ndaj familjarëve dhe armëmbajtje pa leje.
Raste të dhunës në familje janë raportuar edhe në Gjakovë dhe Pejë, ku disa persona janë arrestuar dhe viktimat janë trajtuar sipas nevojës, përfshirë edhe strehimin në shtëpi të sigurt për një grua me katër fëmijë.
Në Ferizaj është arrestuar një e dyshuar për vjedhjen e targave të një veture, ndërsa në Mitrovicë Jug një aksident trafiku me përfshirjen e tri veturave dhe një këmbësori përfundoi me fatalitet.
Ndërkohë, Policia Kufitare ka ndaluar një shtetas të Serbisë për kalim ilegal të kufirit në Leposaviq.
Sipas statistikave, gjatë 24 orëve janë shqiptuar 2,113 tiketa trafiku, janë arrestuar 15 persona dhe 7 janë dërguar në mbajtje, ndërsa një person është dërguar në vuajtje të dënimit.
Autoritetet bëjnë të ditur se hetimet për rastet e raportuara janë në vazhdim.
