Çitaku shpreh keqardhje “për mentalitetin që prodhon” kënga e Edona Llalloshit për Albin Kurtin
Vlora Çitaku e Partisë Demokratike të Kosovës ka shprehur keqardhjr “për mentalitetin që prodhon” kënga e Edona Llalloshit për Albin Kurtin.
Simbas Çitakut, këndimi dhe thurrja heroike e Llalloshit ndaj Kurtit “është përtej marrëzisë” dhe madje edhe “e rrezikshme”.
Postimi i plotë:
Çfarë pamë nga tubimi i LVV-së në Zvicër ishte një nivel tjetër i marrëzisë.
E di që është e vështirë të kontrollosh çdo veprim të mbështetësve. Ata mund të të shkruajnë këngë, të bëjnë tatuazhe, madje edhe të ngrenë shtatore. Edhe kjo është e dëmshme për shëndetin demokratik, por deri diku e kuptueshme, sepse nuk kontrollohet lehtë.
Por kur një deputete i kushton këngë liderit në një ngjarje të organizuar nga vet partia, dhe lideri rri aty duke rrahur shuplakë, kjo nuk është më thjesht shije e keqe apo folklor politik. Kjo është përtej marrëzisë.
Kjo është e rrezikshme.
Jo për shkak të kualitetit të këngës, ai s’ka asnjë rëndësi, por për shkak të mentalitetit që promovon.
