A do të jetë e treta e vërteta për Albulena Haxhiun dhe VV-në?
Dy herë tentuan të shtunën.
Megjithatë, në të dyja votimet për kryetare të Kuvendit, Albulena Haxhiu nuk mori më shumë se 57 vota.
E treta e vërteta pritet të jetë sot për Haxhiun dhe VV-në, në seancën që është caktuar të mbahet nga ora 15:00.
Për t’u bërë kryetare e Kuvendit, Haxhiu që për 4 vjet udhëhoqi ministrinë e Drejtësisë, duhet t’i ketë së paku 61 vota.
Nisma Socialdemokrate ditën e shtunën ka abstenuar në dy votime, kurse Duda Balje nuk ka marrë pjesë fare në votim.
Njëjtë edhe Partia Demokratike e Kosovës, përderisa LDK-ja votoi kundër.
Deputeti për të cilin pati shumë diskutime, Veton Berisha, votoi për.
Si rezultat, VV-ja i ka mangu edhe 4 vota për ta kaluar fazën e parë drejt formimit të institucioneve.
Haxhiu ditën e shtunë paralajmëroi se nuk do ta ndërrojnë kandidaturën.
PDK-ja dhe LDK-ja insistuan se nuk do ta votojnë Albulena Haxhiun, kurse AAK-ja bëri të ditur se në VV kanë votë vetëm për Shqipe Selimin ose Saranda Bogujevcin.
Kjo ka bllokuar sërish situatën, pas asaj me komisionin për verifikimin e mandateve.
Zyrtarë të VV-së, përfshirë edhe vartësin e Haxhiut, Blerim Sallahu, kanë paralajmëruar se mund të ketë zgjedhje të reja.
“Si Lëvizje VETËVENDOSJE!, e kemi përmbushur këtë nen duke e propozuar për kryetare të Kuvendit, znj. Albulena Haxhiu e cila i ka gjithsej 125,327 vota, pra është në 5shen më të votuar në parti dhe gruaja më e votuar në Republikën e Kosovës. Kësisoj, nesër presim që legjitimiteti dhe legaliteti të jetësohen në Kuvendin e Kosovës në mënyrë që të parandalohet shkelja e serishme Kushtetutës nga ata që tashmë e kanë shkelur Kushtetutën posa kanë hyrë në Kuvendin e Kosovës! Ndryshe, nëse Kuvendi mbahet i bllokuar atëherë e vetmja zgjidhje janë zgjedhjet. Pra, marrëveshje për konstituim dhe shpërndarje të Kuvendit, sepse mungesa e vullnetit opozitar për moskonstituim të Kuvendit nënkupton mospranimm të rezultateve zgjedhore”, ka shkruar Sallahu.
Ditën e shtunë edhe Faton Peci e Glauk Konjufca e kanë lutur opozitën për vota. Kjo duke u arsyetuar se aktgjykimi i Gjykatës Kushtetuese e thotë që kryetari i Kuvendit është nga partia që ka më së shumti deputetë.
Megjithatë, VV-ja në të kaluarën, nuk kishte votuar asnjëherë kandidatë të PDK-së ose partive të tjera.
Mbetet të shihet nëse në seancën e sotme do të ketë ndonjë ndryshim të situatës, ose nëse bllokada do të vazhdojë.
