Zyrtari amerikan: Ukraina është pajtuar me Planin e Paqes përveç disa “detajeve të vogla”
Një zyrtar i lartë amerikan ka deklaruar se Ukraina ka rënë dakord për një marrëveshje që i jep fund luftës me Rusinë, duke lënë vetëm disa "detaje të vogla" për t'u zgjidhur. Kjo deklaratë optimiste vjen në një kohë kur Sekretari i Ushtrisë së SHBA-së, Dan Driscoll, po zhvillon takime intensive në Abu Dhabi me zyrtarë rusë rreth propozimit të administratës Trump, raportoi CNN.
"Ukrainasit kanë rënë dakord për marrëveshjen e paqes," citohet të ketë thënë zyrtari amerikan, duke shtuar se mbeten vetëm detaje teknike për t'u qartësuar.
Megjithatë, qëndrimi publik i Kievit duket më i matur. Rustem Umerov, sekretari i sigurisë kombëtare të Ukrainës, konfirmoi përmes një postimi në platformën X se delegacionet kanë arritur "një mirëkuptim të përbashkët mbi kushtet kryesore". Ai theksoi se Ukraina tani llogarit në mbështetjen e partnerëve evropianë dhe pret një vizitë të Presidentit Zelensky në SHBA për të finalizuar marrëveshjen me Presidentin Donald Trump.
Vetë Presidenti Zelensky u shpreh se pas takimeve në Gjenevë, rruga drejt paqes duket reale dhe ka rezultate solide, por paralajmëroi se "shumë punë mbetet ende për t'u bërë".
Nga ana tjetër, zëdhënësi i delegacionit amerikan, Lt. Col. Jeff Tolbert, i përshkroi bisedimet në Abu Dhabi si pozitive, duke theksuar se SHBA mbetet optimiste për mbylljen e konfliktit.
