VV me postim të çuditshëm në Facebook: Aktivistët janë gati për t’i ndihmuar qytetarët në zonat e vërshuara
Shumë dëme materiale janë shkaktuar pas vërshimeve në Kosovë, derisa vlera e tyre nuk dihet. Lëvizja Vetëvendosje, megjithatë, po shprehet e gatshme për t’i ndihmuar qytetarët, ndonëse nuk ka treguar se në çfarë mënyre.
Përmes një shkrimi në Facebook, VV-ja ka thënë se aktivistët e saj janë gati për të ndihmuar.
“Teksa institucionet qendrore e komuale, emergjencat civile, Policia e FSK, mjekët, Instituti i shëndetit publik, punëtorët e ujësjellësve, po vazhdojnë të jenë në terren duke ndihmuar qytetarët që kanë pësuar nga kjo fatkeqësi, Lëvizja VETËVENDOSJE! Shprehë gatishmërinë vullnetare të aktivistëve gjithandej komunave për të ndihmuar në rast nevoje.” – thuhet tutje.
Komunikata e plotë e LVV-së
Në solidaritet dhe mbështetje me qytetarët e zonave të vërshuara!
Lëvizja VETËVENDOSJE! shprehë gatishmërinë vullnetare të aktivistëve e anëtarëve të saj për të ndihmuar bashkëqytetarët në zonat e vërshuara.
Të shqetësuar kemi përcjellë situatën me vërshimet e djeshme nëpër qytetet dhe fshatrat tona.
Teksa institucionet qendrore e komuale, emergjencat civile, Policia e FSK, mjekët, Instituti i shëndetit publik, punëtorët e ujësjellësve, po vazhdojnë të jenë në terren duke ndihmuar qytetarët që kanë pësuar nga kjo fatkeqësi, Lëvizja VETËVENDOSJE! Shprehë gatishmërinë vullnetare të aktivistëve gjithandej komunave për të ndihmuar në rast nevoje.
Ndërkohë, ftojmë të gjithë qytetarët e vendbanimeve të prekura nga vërshimet që të qëndrojnë të informuar, t’i përcjellin dhe ndjekin udhëzimet e institucioneve tona e sidomos ato të IKSHPK-së lidhur me sigurinë e cilësinë e ujit të pijes.
T’i shmangemi zonave me rrezik të vërshimeve gjatë orëve në vijim. Atyre me potencial të rrëshqitjes së dheut. Të njoftojmë autoritetet sapo të vemë re se dikush gjendet në rrezik dhe të lehtësojmë njoftimin e insitucioneve për t’i dhënë sa më parë ndihmë atyre në nevojë.
E mbi të gjitha të sigurohemi që të jemi prezent në rast të kërkesës për ndihmë nga institucionet.
Qendrat Operative Emergjente janë prej ditës së djeshme të aktivizuara dhe për çdo urgjencë duhet të kontaktojmë në numrin emergjent 112.
