Ushtrim të ndikimit: Aktakuzë ndaj një përmbaruesi privat dhe një avokateje

Prokuroria Themelore në Prishtin ka ngritur aktakuzë ndaj një përmbaruesi privat dhe një avokateje.

Ata dyshohen për ushtrim të ndikimit.

Komunikata:

Prokuroria Themelore në Prishtinë ngrit aktakuzë ndaj të pandehurve Sh.Sh për shkak të veprës penale ushtrimi i ndikimit nga neni 424 të KPRK-së dhe I.I për shkak të veprës penale keqpërdorimi i pozitës apo autoritetit zyrtar nga neni 414 i KPRK-së

Prishtinë 30.05.2025 – Prokuroria Themelore në Prishtinë – Departamenti i Krimeve të Rënda – Njësiti për Krime Ekonomike dhe Korrupsion, pas një pune të gjatë dhe të suksesshme hetimore ka ardhur në përfundim se ekziston dyshimi i bazuar mirë se në veprimet e të pandehurës Sh.Sh, në cilësinë e avokates dhe përfaqësueses së palës së dëmtuar, janë plotësuar elementet e veprës penale Ushtrimi i Ndikimit nga neni 424 par. 1 të KPRK-së.

Ndërkaq, gjithashtu ekziston dyshimi i bazuar mirë se i pandehuri I.I., në cilësinë e përmbaruesit privat, duke keqpërdorur detyrën zyrtare, me qëllim të përfitimit të kundërligjshëm pasuror për veten dhe tjetrin, në mënyrë të kundërligjshme ka tejkaluar kompetencat e tij zyrtare dhe duke mos i përmbushur detyrat e tij zyrtare, me të cilat veprime ka kryer veprën penale Keqpërdorimi i pozitës apo autoritetit zyrtar nga neni 414 par. 2 të KPRK-së. Të pandehurit me veprimet e tyre kanë realizuar përfitim të kundërligjshëm pasuror, si dhe të dëmtuarit i kanë shkaktuar dëm material në vlerë prej 25,000 € (njëzet e pesë mijë Euro).

Prokuroria Themelore në Prishtinë vazhdon të mbetet e përkushtuar në luftimin veprave penale të korrupsionit zyrtar dhe veprave penale kundër detyrës zyrtare.