Ushtria izraelite kryen sulme ajrore në Liban, thotë se e shënjestroi Hezbollahun

Ushtria izraelite ka konfirmuar se ka kryer sulme ajrore në jug të Libanit, duke thënë se vuri në shënjestër operativë të të ashtuquajturës njësi e ndërtimit e Hezbollahut.

Operativët u vunë në shënjestër përderisa ishin grumbulluar në një qendër të Hezbollahut, e cila, sipas ushtrisë izraelite, përdorej për të “prodhuar pajisje të përdorura nga terroristët e organizatës për ta rivendosur infrastrukturën e terrorit” që ishte shkatërruar gjatë luftimeve të vitit të kaluar.

Sipas ushtrisë izraelite, aktivitetet e operativëve përbëjën shkelje të armëpushimit, raporton gazeta “The Times of Israel”.

Më vonë, ushtria izraelite lëshoi paralajmërim për banorët e dy qytezave në jug të Libanit para sulmeve ajrore kundër infrastrukturës së Hezbollahut.

Ushtria publikoi harta ku u shfaqën zonat që do të viheshin në shënjestër në qytezat Taybeh dhe Tayr Debba.