Trump kërkoi publikimin e dosjeve për alienë, çka tha Obama para pak ditësh për këtë?
Presidenti i Shteteve të Bashkuara të Amerikës, Donald Trump të enjten tha se do të udhëzojë Pentagonin dhe agjenci të tjera federale që të publikojnë dokumente qeveritare që lidhen me jetën jashtëtokësore dhe UFO-t.
“Nisur nga interesi i jashtëzakonshëm i treguar, do ta udhëzoj Sekretarin e Luftës dhe departamentet e agjencitë e tjera përkatëse që të fillojnë procesin e identifikimit dhe publikimit të dosjeve qeveritare që lidhen me jetën aliene dhe jashtëtokësore, fenomenet ajrore të paidentifikuara (UAP), objektet fluturuese të paidentifikuara (UFO), si dhe çdo informacion tjetër të lidhur me këto çështje shumë komplekse, por jashtëzakonisht interesante dhe të rëndësishme,” tha ai në një postim në Truth Social.
Nuk ishte menjëherë e qartë se çfarë informacioni përmbajnë këto dokumente apo kur do të bëhen publike.
Deklaratat e Trump vijnë pasi ish-presidenti Barack Obama tërhoqi vëmendje mediatike gjatë fundjavës, kur në një intervistë me prezantuesin e podcastit Brian Tyler Cohen dukej sikur konfirmonte ekzistencën e alienëve.
“Ata janë realë, por unë nuk i kam parë,” tha Obama kur u pyet nëse alienët janë të vërtetë.
Ish-presidenti më vonë sqaroi në një postim në Instagram se po i referohej mundësisë statistikore të ekzistencës së jetës në planetë të tjerë, duke pasur parasysh përmasat e pafundme të universit.
“Por distancat mes sistemeve diellore janë aq të mëdha sa gjasat që të jemi vizituar nga alienë janë të ulëta, dhe gjatë presidencës sime nuk pashë asnjë provë që jashtëtokësorët kanë pasur kontakt me ne,” shtoi ai.
