Trump e Zelensky takohen në ShBA: Çka u tha?
Presidenti amerikan Donald Trump të premten shmangu të japë një përgjigje të qartë nëse Ukraina do të duhet të dorëzojë territor si pjesë e një marrëveshjeje paqeje me Rusinë – duke dhënë një deklaratë të paqartë për të ardhmen e luftës.
“Nuk e di kurrë,” tha ai. “Lufta është shumë interesante. Nuk e di kurrë. Thjesht nuk e di kurrë me luftën, me luftën dhe paqen, nuk e di kurrë.”
Trump ka mbajtur qëndrime të ndryshme për këtë çështje. Para takimit të tij me presidentin rus Vladimir Putin në gusht, ai kishte deklaruar se “shkëmbime territoresh” do të ishin të nevojshme për t’i dhënë fund luftës, raporton CNN.
Më vonë, ai ndryshoi qëndrim, duke thënë se beson që Ukraina mund t’i rikthejë të gjitha territoret e pushtuara nga Rusia.
Deklarata e tij e fundit tregon se presidenti po pret të shohë si do të ecin negociatat përpara se të shprehë një opinion të ri.
Ndërkohë, presidenti ukrainas Volodymyr Zelensky tha të premten se kompanitë amerikane të energjisë janë “gati të ndihmojnë” Ukrainën pas sulmeve të fundit ruse ndaj infrastrukturës energjetike të vendit.
“Pata një mundësi shumë të mirë për t’u takuar me kompanitë e mëdha amerikane të energjisë, dhe ato janë gati të na ndihmojnë,” tha Zelensky në Shtëpinë e Bardhë, përkrah presidentit Trump.
“Po, pas gjithë këtyre sulmeve ndaj infrastrukturës sonë, sulmeve ruse e kështu me radhë, pata gjithashtu takime, falë ekipit tuaj, me kompani të fuqishme ushtarake që folën për mbrojtjen ajrore,” shtoi ai.
