Të martën mot i vranët dhe me riga shiu, temperatura deri në 13 gradë
Instituti Hidrometeorologjik i Kosovës ka paralajmëruar se dita e martë do të karakterizohet nga mot më i rënduar krahasuar me pjesën tjetër të javës, me vranësira të dendura dhe reshje të dobëta shiu në pjesë të ndryshme të vendit.
Sipas parashikimit, “mot i vranët dhe vende-vende me riga shiu” pritet të mbajë gjatë ditës së martë, ndërsa reshjet do të jenë me intensitet të ulët dhe të shpërndara lokalisht. Temperaturat minimale do të lëvizin nga -1°C deri në 2°C, ndërsa ato maksimale nga 10°C deri në 13°C, çka e mban treguesin termik në vlera tipike pranverore, pavarësisht vranësirave.
Instituti thekson se java në tërësi do të jetë “kryesisht stabile dhe me temperatura tipike pranverore”, por se e marta mbetet përjashtim, pasi “mbi territorin e vendit parashihen vranësira më të dendura, të cilat vende-vende mund të sjellin riga shiu me intensitet të ulët”.
Era të martën pritet të fryjë nga verilindja me shpejtësi prej 1 deri në 7 m/s, ndërsa në orët e mëngjesit vazhdojnë të jenë të mundshme ngrica të dobëta dhe mjegull e lokalizuar, sidomos në zonat kodrinore-malore.
Në ditët tjera të javës parashihen intervale më të gjata me diell dhe mot më i kthjellët, ndërsa e premtja pritet të jetë dita më e ngrohtë dhe më stabile, me mot “kryesisht me diell” dhe temperatura maksimale deri në 14°C.
