Stërvitje ushtarake të Serbisë në kufi, Kurti: Është provim, bëhet fjalë për njësi që kanë trajnuar Radoiçiqin
Kryeministri Albin Kurti ka folur për stërvitjet ushtarake të Serbisë në kufirin me Kosovën.
Ai ka bërë me dije se këto stërvitje janë provokim i radhës i Serbisë.
Sipas tij, bëhet fjalë për njësi të cilat e kanë trajnuar kryekriminelin e kryeterroristin Milan Radoiçiq.
“Ky është një provokim i Serbisë, e cila dëshiron ta cenojë integritetin territorial të Kosovës, bëhet fjalë për njësi të cilat e kanë trajnuar kryekriminelin e kryeterroristin Milan Radoiçiq, për vrasjen e policit heroit Afrim Bunjaku. Por tregon pafuqinë e tyre, sepse në Kosovë nuk ka struktura ilegale, të cilat mund ta cenojnë stabilitetin institucional, integritetin territorial, sovranitetin, paqen e sigurinë. E nga kjo pafuqi e tyre për të bërë diçka brenda Kosovës, paskan shkuar afër kufirit për tu përpjekur të demonstrojnë forcën. Do ta kem një adresim në mbledhjen e qeverisë”, ka thënë Kurti.
Para gazetarëve, ai ka thënë se për këtë çështje i kanë njoftuar edhe ndërkombëtarët.
“Është provokim, ne për këtë u kemi shkruar faktorëve ndërkombëtarë. Do ta kemi një adresim edhe në mbledhjen e qeverisë së Republikës së Kosovës e cila mbahet sot. Por forcat tona janë të përgatitura, kufiri ynë është i mbrojtur, dhe këtë e bëjmë me forcën e sigurisë së Kosovës, me policinë e Kosovës, me Agjencinë e Kosovës për Inteligjencë dhe me partnerët tanë ndërkombëtarë në veçanti me KFOR-in. Pra në njërën anë është e vërtetë që demonstrojnë destruktivitet dhe agresivitet, por në anën tjetër kjo është edhe shprehje e frikës edhe e pafuqisë së tyre që Republika e Kosovës është më e fortë se kurrë, më e përparuar se kurrë, dhe nuk mund të na ndalin pavarësisht se çfarë planesh kanë apo çfarë dëshirash nuk ju treten ende”, ka thënë ai.
